ហៃ វណ្ណា សហគ្រិនវ័យក្មេងកម្ពុជា ហ៊ានបោះទុនបើកក្រុមហ៊ុននៅប្រទេសជប៉ុន

2014-10-21 21:58:41
ចំនួនមតិ 0 | ចំនួនចែករំលែក 0

ចន្លោះមិនឃើញ

VACS international Inc គឺជាក្រុមហ៊ុនមួយ ដែលបានបង្កើត ដើម្បីបម្រើសេចក្តីត្រូវការរបស់អតិថិជនលើផ្នែកធនធានមនុស្ស បច្ចេកវិទ្យាព័ត៌មាន និងអចលនៈទ្រព្យ។ ក្រុមហ៊ុននេះ បានលេចចេញជារូបរាង កាលពីខែមីនា ឆ្នាំ២០១៤ ដោយចំណាយទុនជាង៥ម៉ឺនដុល្លារ មានទីតាំងស្ថិតនៅទីក្រុង Tokyo ប្រទេសជប៉ុន។ សហគ្រិនវ័យក្មេង ដែលនាំមុខគេ ក្នុងការបង្កើតក្រុមហ៊ុនខាងលើគឺ លោក ហៃ វណ្ណា រួមនឹងមិត្តភ័ក្ដិ ៣នាក់ ផ្សេងទៀត ជាជនជាតិជប៉ុនជួយជ្រុំជ្រែង។

កើតក្នុងឆ្នាំ១៩៨៦ នៅភូមិល្វាក្រោម ឃុំស្តៅ ស្រុកកងមាស ខេត្តកំពង់ចាម។ លោកមានឪពុកជាបុគ្គលិកបម្រើការងារនៅសណ្ឋាគារ និងម្តាយជាស្ត្រីមេផ្ទះ។ លោកបានប្រលងជាប់សញ្ញាបត្របាក់ឌុប កាលពីឆ្នាំ២០០៦ និងបានឡើងមករាជធានីភ្នំពេញ បន្តការសិក្សានៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចមុខវិជ្ជា Informatics economic ។

លោកបានពិពណ៌នាថា ពេលឡើងមករស់នៅរាជធានីភ្នំពេញ ធ្វើឲ្យលោកកាន់តែខិតខំប្រឹងប្រែងរៀនសូត្រជាងមុន ព្រោះពេលនេះលោកមើលឃើញពិភពលោកកាន់តែធំទូលាយ ក្រោយពីអាចប្រើ និងធ្វើការស្រាវជ្រាវតាមប្រព័ន្ធអ៊ីនធឺណិត និងអ៊ីមែល ដែលជាបណ្ណាល័យគ្មានដែនកំណត់។ លោកផ្តើមដាក់អាហារូបករណ៍សិក្សា ទៅប្រទេសជប៉ុននៅវិទ្យាស្ថានសហប្រតិបត្តិ ការណ៍កម្ពុជា-ជប៉ុន និងបានប្រលងជាប់ជាស្ថាពរកាលពីឆ្នាំ២០០៨ ក្រោយឆ្លងកាត់ការពិនិត្យប្រវត្តិរូបសង្ខេប និងការធ្វើតេស្ដភាសាជប៉ុន។ លោកបានបោះបង់ការសិក្សានៅសាកលវិទ្យាល័យត្រឹមឆ្នាំទី២។ លោកថា ទុនភាសាជប៉ុន ដែលបានសិក្សាក្រៅម៉ោង តាំងពីនៅស្រុកកំណើតមក គឺជាគ្រឹះមួយធ្វើឲ្យលោកជោគជ័យ ក្នុងការប្រជែងយកអាហារូបករណ៍សិក្សានៅប្រទេសជប៉ុន។

នៅឆ្នាំ២០០៨ វណ្ណា បានចាកចេញពីប្រទេសកម្ពុជាដើម្បីបន្តការសិក្សានៅសាកលវិទ្យាល័យDigital Hollywood University លើជំនាញ Digital Communication តាមរយៈអាហារូបករណ៍ឈ្មោះថា Yomiurishimbun Scholarship ពីក្រុមហ៊ុនកាសែត Yomiuri Newspaper។ ទីនេះហើយដែលធ្វើឲ្យលោកយល់ដឹងកាន់តែច្រើនទាក់ទងនឹងជំនាញរចនាគេហទំព័រ និងផ្នែកទំនាក់ទំនងអន្តរជាតិ។ លោកសិក្សាបណ្តើរ ធ្វើការបណ្តើរ ជាអ្នកចែកចាយការសែតឲ្យក្រុមហ៊ុន Yomiuri Newspaper រយៈពេល៤ ឆ្នាំ ហើយនៅឆ្នាំ២០១៣ លោកបានបញ្ចប់ការសិក្សាថ្នាក់បរិញ្ញាបត្រជាស្ថាពរ។

ដោយចាប់អារម្មណ៍ខ្លាំងលើគម្រោងអាជីវកម្មផ្ទាល់ខ្លួន លោក វណ្ណា រួមនឹងមិត្តភ័ក្ដិជប៉ុន ៣ នាក់ផ្សេងទៀតបានរួមគ្នាបង្កើតក្រុមហ៊ុនមួយឈ្មោះថា VACS international Inc នៅឆ្នាំ២០១៤ ក្រោយពីបានចូលបម្រើការងារនៅក្រុមហ៊ុនឯកជនមួយចំនួន ១១ ខែ។ ក្រុមហ៊ុនថ្មីនេះបានចំណាយដើមទុនចំនួន ៥ ម៉ឺនដុល្លារ។

សហគ្រិនវ័យក្មេង ដែលជាតំណាងឲ្យសមាគមយុវជនអាស៊ានផងនោះ បានលើកឡើងថា ការបើកក្រុមហ៊ុនខ្លួនឯង នឹងធ្វើឲ្យលោកអាចមានពេលវេលាច្រើន ដើម្បីរួមចំណែក ក្នុងការងារសង្គម។ ដូច្នេះបំណងប្រាថ្នា បើកក្រុមហ៊ុនផ្ទាល់ខ្លួននេះ គឺមានតាំងពីនៅរៀនសាកលវិទ្យាល័យមកម្ល៉េះ។

មកដល់ពេលនេះ បន្ទាប់ពីបានដំណើរការជាង ៧ ខែ ក្រុមហ៊ុន VACS international Inc កំពុងទទួលបានការគាំទ្រពីអតិថិជន ជាពិសេសសេវាកម្ម ផ្នែកធនធានមនុស្ស ព្រោះលោកមានទំនាក់ទំនងល្អជាមួយនិស្សិតសិក្សានៅជប៉ុន កូរ៉េ និងចិន។ ដូច្នេះការងាររបស់លោកគឺណែនាំនិស្សិតឲ្យក្រុមហ៊ុន និងណែនាំក្រុមហ៊ុនឲ្យស្គាល់និស្សិត។ ការងារនេះលោកផ្ដោតចំពោះនិស្សិត និងក្រុមហ៊ុនណាត្រូវការធនធានមនុស្ស ក្នុងតំបន់អាស៊ានតែប៉ុណ្ណោះ។

ប៉ុន្តែពេលដំណើរការដំបូង លោក វណ្ណា ក៏ជួបឧបសគ្គច្រើនដែរ ក្នុងនោះមានការទំនាក់ទំនង និងទំនុកចិត្តពីអតិថិជន។ លោកបានព្យាយាមទាក់ទងទៅ ក្រុមហ៊ុនតូច ធំ។ ទីបំផុតក្រុមហ៊ុនទាំងនោះបានសាកល្បង និងទទួលស្គាល់សេវាកម្មរបស់ក្រុមហ៊ុន រួចបានណែនាំតៗគ្នា។

សម្រាប់លោក វណ្ណា ហេតុផលចម្បង ដែលនាំឲ្យលោកមកដល់ចំណុចនេះ គឺការព្យាយាម អត់ធ្មត់ និងនិន្នាការមិនបោះបង់។លោកថា “ទាំងអស់នេះ មានសារៈសំខាន់ណាស់។ ខ្ញុំជាមនុស្សម្នាក់ដែលចូលចិត្តធ្វើអ្វី ដែលមានប្រយោជន៍ ចំពោះមនុស្សទូទៅ និងមិនអាត្មានិយម។ជាក់ស្តែងកាលពីឆ្នាំ២០១១ ខ្ញុំបានចូលរួមជាមួយ ASEAN Community ក្នុងនាមជា Administrator ដែល កាលនោះ ASEAN Community គ្រាន់តែជាគេហទំព័រធម្មតាប៉ុណ្ណោះ។ ប៉ុន្តែឥឡូវ វាក្លាយជាសហគមន៍មួយ ដែលទទួលស្គាល់ពីរដ្ឋលេខាធិការអាស៊ាន។ វាប្រើសម្រាប់ចែករំលែកព័ត៌មានពីប្រទេសអាស៊ានទៅបណ្ដាប្រទេសនានា នៅជុំវិញពិភពលោក។ ម្យ៉ាងខ្ញុំជាមនុស្សចូលចិត្តធ្វើការងារជាក្រុម និងអាចសម្របសម្រួលបានល្អ ពេលមានប៉ះទង្គិចតិចតួច។ ដូច្នេះបំណងប្រាថ្នារបស់ខ្ញុំគឺចង់បានសង្គមមួយ ដែលត្រចះត្រចង់ មិនមែនសម្រាប់តែមនុស្សមួយក្តាប់តូចនោះទេ”។

ទៅថ្ងៃអនាគត VACS international Inc គ្រោងបើកស្នាក់ការក្រុមហ៊ុននៅតាមបណ្តាប្រទេសអាស៊ានទាំងមូល ព្រមទាំងសម្ពោធគេហទំព័រ ASEAN CAREER ក្នុងពេលឆាប់ៗ។ ខណៈអាស៊ាននឹងធ្វើសមាហរណកម្មនៅឆ្នាំ២០១៥ លោក ហៃ វណ្ណា បានផ្តាំផ្ញើទៅយុវជនទាំងអស់ គួរត្រៀមខ្លួន ដោយខិតខំប្រឹងប្រែងរៀនសូត្រ។ ទី១ គឺជំនាញភាសា អង់គ្លេសអាចទំនាក់ទំនងបាន ។ ទី២ យុវជនគួរជ្រើសរើសជំនាញណាដែលខ្លួនចូលចិត្ត ជាជាងរៀនជំនាញ ដែលខ្លួនចង់រៀន ព្រោះអ្វីដែលចូលចិត្ត គឺយើងអាចធ្វើបានល្អជាង៕

អានអត្ថបទ៖ អ្នកសុំទានកំពូលស្អាតបំផុតលើលោក មិនឃើញមិនជឿ! ចុចត្រង់នេះ

អត្ថបទ៖មៃ សុខលីម

រូបភាព៖ផ្តល់ឲ្យ