សុខ សោម៉ាវត្តី កុងត្រាតួឯករឿងដំបូងឲ្យផលិតកម្មថ្មី!

2014-09-18 15:57:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ សុខ សោម៉ាវត្តី បានចុះកុងត្រាថតជាតួឯកក្នុងរឿងដំបូងរបស់ផលិតកម្ម Mega Film បើទោះបីជាកំពុងតែមមាញឹកថតក្នុងតំណែងដូចគ្នាឲ្យផលិតកម្ម LD យ៉ាងណាក៏ដោយ។

សូមចុចអាន៖ Wow…បេក្ខជនខ្លាំងមិនចាញ់ម្ចាស់ដើម Coach រកកន្លែងរិះគន់មិនឃើញសោះ!

បើតាម លោក វ៉ន ប៊ុនស៊ីម ជានាយកគ្រប់គ្រងផលិតកម្មបាននិយាយថា រឿងនេះមានចំណងជើងថា "កំណប់ឪខ្ញុំ" ជាសាច់រឿងបែបកំប្លែងលាយឡំដោយមនោសញ្ចេតនាស្នេហាជាដើម។ មូលហេតុដែលឈានដល់ការសម្រេចជ្រើសរើសតួស្រីខាងលើ ដោយសារមើលឃើញថា សោម៉ាវត្តី មានអត្តចរិតសមស្របទៅនឹងសាច់រឿង។ តួឯករូបនេះ មានបទពិសោធន៍គ្រប់គ្រាន់នៅក្នុងការសម្ដែងផងដែរ។

ម្យ៉ាងទៀត ក្នុងនាមជាអ្នកគ្រប់គ្រងផលិតកម្ម ក៏បានប្រជុំពិភាក្សាទៅលើសោភ័ណភាព មានន័យថា រូបសម្រស់របស់ពិធីការិនីរូបនេះរួចហើយ។ ក្រុមការងារបានលើកឡើងដូចគ្នាថា អាចទទួលយកបាន ហើយសក្ដិសមនៅក្នុងសាច់រឿងនេះ ទោះមិនបានល្អឥតខ្ចោះយ៉ាងណាក៏ដោយ។

ផលិតកម្មភាពយន្តមាននិន្នាការមិនចម្លងខាងលើ នឹងចាប់ផ្ដើមថតជាផ្លូវការ ចំពោះវណ្ណកម្មដំបូងនៅដើមខែតុលាខាងមុខ និង បន្តដំណើរការថតជាង ១ ខែ ដើម្បីថតបញ្ចប់ទៅតាមផែនការកំណត់ ឬអាចយូរជាងនេះ អាស្រ័យលើស្ថានភាពជាក់ស្ដែងរបស់តួអង្គនីមួយៗ និង ភាពខុសឆ្គងដោយបច្ចេកទេស។ លោកបន្ថែមថា រឿងនេះត្រូវចរាចរណ៍លើរោងភាពយន្ត នៅចុងឆ្នាំ ២០១៤ ឬអាចដើមឆ្នាំ២០១៥។

អ្នកគ្រប់គ្រងផលិតកម្មជឿជាក់ថា វណ្ណកម្មដំបូងអាចទទួលបានជោគជ័យមិនខាន បើផ្អែកលើបទពិសោធន៍ក្នុងវិស័យភាពយន្តតាំងពីឆ្នាំ ១៩៩៣ ហើយមានការចូលរួមសម្ដែងដោយ សុខ សោម៉ាវត្តី និង សមាជិកសំខាន់ៗរបស់ក្រុមកំប្លែង នាយ ពែកមី។

ទោះបីជាយ៉ាងណា អ្នកស្រី សុជាតា ម្ដាយរបស់តួឯកស្រីខាងលើបានប្រាប់ថា អ្នកស្រីបានចេញមុខទៅចុះកុងត្រាជំនួសកូនស្រីជាមួយផលិតកម្ម Mega Filmរួចហើយកាលពីពេលថ្មីនេះ ដោយសារ សោម៉ាវត្តី មមាញឹកថតរឿងឲ្យផលិតកម្ម LD មិនអាចទៅដោយខ្លួនឯងបាន ខណៈប្ដីក៏រវល់ដូចគ្នា។ ប៉ុន្តែតារាសម្ដែង និង ពិធីការិនីរូបនេះ មានពេលវេលាគ្រប់គ្រាន់សម្រាប់ថតរឿងឲ្យ Mega Film៕

អត្ថបទ៖ សំ ជំនាញ