ល្អាងកំពង់ត្រាច តំបន់ទេសចរណ៍ ដែលកំពុងមានការទាក់ទាញ

2016-02-18 12:02:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ធ្វើដំណើរចម្ងាយប្រមាណជា ៣៨គីឡូម៉ែត្រ នៅភាគខាងកើតនៃក្រុងកំពត តាមផ្លូវជាតិលេខ៣៦ គេនឹងទៅដល់រមណីយដ្ឋានមួយកន្លែងមានឈ្មោះថា «ល្អាងកំពង់ត្រាច» ដែលស្ថិតនៅក្នុងឃុំដំណាក់កន្ទួតខាងត្បូង ស្រុកកំពង់ត្រាច ខេត្តកំពត។

លោក សយ ស៊ីណុល ជាប្រធានមន្ទីរទេសចរណ៍ខេត្តកំពត បានឲ្យដឹងថា ល្អាងកំពង់ត្រាចមិនត្រឹមតែគេស្គាល់ថាជាតំបន់ទេសចរណ៍ប៉ុណ្ណោះទេ តែជាកន្លែងសក្ការៈបូជាថែមទៀតផង។ លោកបន្ថែមថា ភ្នំកំពង់ត្រាចបានទាក់ទាញប្រជាជនជិតឆ្ងាយទាំងជាតិនិងអន្តរជាតិមកទស្សនា និងដើម្បីបួងសួងសុំសេចក្តីសុខ។

នៅភ្នំកំពង់ត្រាច គេឃើញមានល្អាងមួយដែលមានអង្កត់ផ្ចិត (វិជ្ឈមាត្រ) ប្រមាណជា ៣០ម៉ែត្រ ហើយដីនៅទីនោះមាន ៧ពណ៌ផ្សេងគ្នា ព្រមទាំងមានល្អាងតូច៤ថែមទៀត ដោយល្អាងខ្លះមានកាំជណ្តើរឡើងកម្ពស់ប្រមាណ ៤ម៉ែត្រ និងមានថ្មដែលដុះចេញដូចទៅនឹងរូបសត្វផ្សេង។

លោក សយ សីណុលបានមានប្រសាសន៍ថា នៅមុនទសវត្សឆ្នាំ៧០ គេបានយកទីតាំងល្អាងកំពង់ត្រាចធ្វើជាកន្លែងថតភាពយន្តថែមទៀត។

ភ្នំកំពង់ត្រាចជារមណីយដ្ឋានប្រវត្តិសាស្ត្រមួយរបស់ទឹកដីខេត្តកំពតដែលប្រជាជខ្លះហៅថា «ភ្នំបាក់» ដោយសារតែភ្នំនោះមានលក្ខណៈខុសប្លែកពីភ្នំដទៃត្រង់នៅចំកណ្តាលភ្នំមានវាលធំដែលមានពន្លឺថ្ងៃចាំងចូល ដែលហាក់ប្លែកពីល្អាងធម្មតា។ ភ្នំកំពង់ត្រាចមានបរិមាត្រប្រមាណជា៤គីឡូម៉ែត្រ និងកម្ពស់ប្រមាណជា២០០ម៉ែត្រ ហើយក្បែរភ្នំនោះក៏មានវត្តមួយហៅថា «វត្តគិរីសិសា»៕

សូមទស្សនារូបភាព នៃល្អាងកំពង់ត្រាច ខាងក្រោមនេះ៖