ធនាគារចិន សម្រេចផ្អឹបគណនីធនាគារពលរដ្ឋកូរ៉េខាងជើងទាំងអស់
- 2016-02-23 20:36:12
- ចំនួនមតិ 0 | ចំនួនចែករំលែក 0
ធនាគារចិន សម្រេចផ្អឹបគណនីធនាគារពលរដ្ឋកូរ៉េខាងជើងទាំងអស់
ចន្លោះមិនឃើញ
ធនាគារជាច្រើននៅភាគឦសានប្រទេសចិន រួមទាំងធនាគារឧស្សាហកម្ម និងពាណិជ្ជកម្មចិន ICBC ដ៏ធំបំផុតមួយផង បានផ្អឹបទុកគណនីសន្សំប្រាក់ ដោយដាក់ចេញបម្រាមលើការផ្ទេរប្រាក់ ដកប្រាក់នានា ចំពោះពលរដ្ឋកូរ៉េខាងជើង។ នេះបើតាមសេចក្ដីរាយការណ៍របស់សារព័ត៌មានកូរ៉េខាងត្បូងម្សិលមិញ។
បើយោងទៅតាមបុគ្គលិកធនាគារ ICBC ម្នាក់ លោក Chosun Ilbo ប្រចាំទីក្រុង Dandong ខេត្ត Liaoning ជាប់ព្រំដែនកូរ៉េខាងជើង បានលើកឡើងថា វិធានការនេះ ត្រូវបានដាក់ចេញកាលពីចុងខែធ្នូឆ្នាំ ២០១៥។ លោកនិយាយថា "ខាងធនាគារមិនបានពន្យល់ហេតុផលច្បាស់លាស់ឡើយ ដែលចេញវិធានការបែបនេះទេ ប៉ុន្តែវាប្រហែលជាទាក់ទងនឹងទំនាក់ទំនងរវាងប្រទេសចិន និងកូរ៉េខាងជើង កាន់តែធ្លាក់ចុះ"។
អ្នកជំនាញកូរ៉េខាងជើងម្នាក់ សុំមិនបញ្ចេញឈ្មោះប្រាប់កាសែតខាងលើថា "ទំនាក់ទំនងក្រុងប៉េកាំង និងព្យុងយ៉ាង បានប្រែជាល្អក់កករនឹងគ្នា តាំងពីខែធ្នូ ឆ្នាំ២០១៥ មកម្ល៉េះ បន្ទាប់ពីក្រុមចម្រៀងនារី Moranbang កូរ៉េខាងជើង បានលុបចោលការប្រគំតន្ត្រីនៅក្រុងប៉េកាំង"។
ចំណែកសារព័ត៌មានកូរ៉េខាងត្បូង ផ្សាយថាការរឹតបន្តឹងចំពោះគណនីពលរដ្ឋកូរ៉េខាងជើង អាចជាការរឹតបន្តឹងបន្ថែម ក្រោយសេចក្ដីសម្រេចរបស់អាមេរិក ក្នុងការបន្ថែមទណ្ឌកម្មលើក្រុងព្យុងយ៉ាង បន្ទាប់ពីមានការតេស្តនុយក្លេអ៊ែរ និងមីស៊ីលជាបន្តបន្ទាប់។
កាលពីថ្ងៃទី៧ កុម្ភៈកន្លងទៅ កូរ៉េខាងជើង បានបាញ់រ៉ុកកែតចម្ងាយឆ្ងាយដាក់ផ្កាយរណបចូលទៅគន្លងតារាវិថី ដែលជាការបំពានសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ ឯកាលពីខែមករា ក្រុងព្យុងយ៉ាង បានប្រកាសពីជោគជ័យក្នុងការសាកគ្រាប់បែកអ៊ីដ្រូហ្សែនក្រោមដីផងដែរ៕
ចុចអាន៖ Girls’ Generation កូរ៉េខាងជើង លុបចោលការសម្ដែងនៅចិនទាំងគ្មានហេតុផល
ចុចអាន៖ មូលហេតុនៅពីក្រោយការទះដៃគ្រប់គ្នា ពេល គីម ជុងអ៊ុន បង្ហាញមុខ
ប្រែសម្រួល៖ ឡេង ភារុណ ប្រភព៖ Reuters