ការមើលរូបថតចាស់ៗរំលឹកអនុស្សាវរីយ៍ អាចជួយសុខភាពផ្លូវចិត្តបានច្រើនយ៉ាង
- 2016-02-24 15:31:43
- ចំនួនមតិ 0 | ចំនួនចែករំលែក 0
ការមើលរូបថតចាស់ៗរំលឹកអនុស្សាវរីយ៍ អាចជួយសុខភាពផ្លូវចិត្តបានច្រើនយ៉ាង
ចន្លោះមិនឃើញ
ធ្លាប់ទេ អង្គុយមើលរូបថតពីមុនៗ នឹកឃើញអ្វីមួយ រួចញញឹមម្នាក់ឯងដោយមិនដឹងខ្លួន? តាមការស្រាវជ្រាវថ្មីមួយធ្វើឡើងនៅសាកលវិទ្យាល័យប្រទេសអង់គ្លេស និងសហរដ្ឋអាមេរិក បានបង្ហាញថាការមើលរូបថតចាស់ៗ រួចនឹកឃើញអនុស្សាវរីយល្អៗ ជួយអារម្មណ៍អ្នកបានប្រសើរឡើង។
ការស្រាវជ្រាវពីរផ្សេងគ្នា ដឹកនាំដោយលោកស្រីបណ្ឌិត Erica Hepper សាស្ត្រាចារ្យនៃសកលវិទ្យាល័យ Surrey ប្រទេសអង់គ្លេសផ្នែកចិត្តវិទ្យា និង លោកសាស្ត្រាចារ្យ Clay Routledge នៃសកលវិទ្យាល័យ North Dakota State សហរដ្ឋអាមេរិក ។ សាស្ត្រាចារ្យទាំងពីរបានឲ្យដឹងថា ជាមធ្យមមនុស្សអាចរំឭកអនុស្សាវរីយរបស់ខ្លួនឡើងវិញក្នុងរយៈពេល១ដង ក្នុង១សប្ដាហ៍ ដូចជាការស្ដាប់តន្ត្រីដែលពួកគេចូលចិត្តឬ មើលរូបថតចាស់ៗរបស់ខ្លួន។
សាស្ត្រាចារ្យ Routledge ជាមួយសហការីបានបង្ហាញលទ្ធផលស្រាវជ្រាវ តាមរយៈទស្សនាវដ្ដី Memory ថា ការរំលឹកទៅអតីតកាល ទាក់ទងនឹងបទពិសោធន៍ពីមុនៗ គឺបានផ្សារភ្ជាប់ទៅនឹងជីវិតបច្ចុប្បន្នរបស់មនុស្ស។ នៅពេលមនុស្សឃើញរូបថតចាស់ៗ របស់ខ្លួន ពួកគេមានអារម្មណ៍ ថាស្រលាញ់ និងឲ្យតម្លៃខ្លួនឯង ជួយបង្កើនចិត្តចង់ចូលរួមក្នុងសង្គម។ ពេលមានអារម្មណ៍ឯកាវាបានជួយឲ្យពួកគេធូរស្បើយ រំសាយពីអារម្មណ៍ស្ត្រែសតប់ប្រមល់ និង មានអារម្មណ៍ល្អឡើងវិញ ។
ចំណែកលោកស្រីសាស្ត្រាចារ្យ Hepper បានឲ្យដឹងថា៖ "នៅពេលពួកយើង រំលឹកមើលឃើញពីអតីតកាលល្អៗ ពួកយើងមានអារម្មណ៍សប្បាយចិត្ត សរសើរលើកទឹកចិត្តខ្លួនឯង មានអារម្មណ៍ថាជិតស្និទ្ធ ហើយជីវិតគឺពិតជាមានន័យ។ បទពិសោធអតីតកាលនៃភាពជូរចត់ និងភាពរីករាយនៅលាយឡំគ្នា ប៉ុន្តែភាពក្រៀមក្រំនឹងអាចរសាយបាត់ទៅដោយខ្លួនឯង"។ ការចុះផ្សាយព្រឹត្តិបត្រលទ្ធផលស្រាវជ្រាវក្នុងឆ្នាំ២០១៣ របស់សាស្ត្រាចារ្យ Hepper និងសហការីបង្ហាញថា ការមើលរូបថតចាស់ៗ រំលឹករឿងល្អៗ គឺបានជំរុញចិត្តឲ្យគិតវិជ្ជមាន ធ្វើឲ្យមនុស្សមានអារម្មណ៍ស្រលាញ់បងប្អូន គ្រួសារ និងដៃគូស្នេហាកាន់តែច្រើន ស្រលាញ់និងជួយកិច្ចការសង្គម និងកាត់បន្ថយកំហឹង។
ក្រៅពីបង្ហាញលទ្ធផលស្រាវជ្រាវខាងលើ សាស្ត្រាចារ្យ Hepper ក៏បានលើកទឹកចិត្តឲ្យ មើលរូបថតចាស់ៗ រំលឹកអនុស្សាវរីយ ដើម្បីលើកទឹកចិត្តខ្លួនឯង៖
ឲ្យអតីតកាលដាស់តឿនអនាគតរបស់អ្នក
រំលឹកទៅអតីតកាលល្អៗ ស្នាដៃដែលសម្រេចបាន អ្វីដែលជំរុញចិត្តអ្នក ជាការលើកទឹកចិត្តខ្លួនឯងសម្រាប់សម្រេចបាននូវគោលដៅចម្បងរបស់អ្នក។
រំលឹកទៅអតីតកាល អនុស្សាវរីយជាក្រុម សួរទៅកាន់សមាជិកគ្រួសារឬ មិត្តភក្តិ មើលទៅរូបថតអតីតកាល ស្ដាប់ការចែករំលែកពីបទពិសោធន៍របស់ពួកគេ។ អ្នកអាចរៀនពីបទពិសោធល្អៗទាំងនោះ សម្រាប់ជាមេរៀនបច្ចុប្បន្ននិងអនាគត។
បង្កើតអនុស្សាវរីយថ្មីៗ
ព្យាយាមកសាងនូវអ្វីល្អៗ ជាបទពិសោធសម្រាប់ជីវិតនាពេលអនាគត។ អ្នកត្រូវចាំថា អ្វីដែលកើតឡើងថ្ងៃនេះ នឹងក្លាយជាអនុស្សាវរីយមួយសម្រាប់អ្នកនៅថ្ងៃអនាគត៕
ចុចអាន៖ ដាំរុក្ខជាតិបៃតងក្នុងការិយាល័យមានអត្ថប្រយោជន៍ច្រើនយ៉ាង
ប្រែសម្រួល៖ មាន រតនា ប្រភព៖ huffingtonpost