បឹងដាច់ស្រយាលមួយកន្លែង ប្រាប់រឿងរ៉ាវជាច្រើនពីដើមកំណើតមនុស្ស

2016-02-25 23:07:31
ចំនួនមតិ 0 | ចំនួនចែករំលែក 0

ចន្លោះមិនឃើញ

បឹងមួយកន្លែង ស្ថិតនៅក្នុងទ្វីបអាហ្វ្រិក ក្លាយជាកន្លែងសំខាន់មួយដែលបំភ្លឺអាថ៌កំបាំងជាច្រើនដល់អ្នកស្រាវជ្រាវ ឲ្យយល់ពីដំណើរវិវត្តនៃមនុស្ស តាមរយៈ ការរកឃើញហ្វូស៊ីលជាច្រើននៅក្នុងបឹង។

នៅក្នុងបឹង Turkana ដែលមានទីតាំងនៅកណ្ដាលសមុទ្រខ្សាច់ភាគខាងជើងនៃប្រទេសកេនយ៉ា ត្រូវបានអ្នកស្រាវជ្រាវរកឃើញហ្វូស៊ីលគ្រោងឆ្អឹងពេញលេញមួយ ក្នុងឆ្នាំ១៩៨៤ ដែលហ្វួស៊ីលជាច្រើនភាគច្រើនកម្រនឹងពេញរូបរាង ដោយវាត្រូវបែកជាបំណែកៗ។

ហ្វូស៊ីលខាងលើ គឺជាគ្រោងឆ្អឹងរបស់ក្មេងប្រុសម្នាក់ ដែលប្រហែលជាបានស្លាប់នៅអាយុ ៨ឆ្នាំ។ អ្នកស្រាវជ្រាវបានឲ្យដឹងថា គ្រោងឆ្អឹង បានលិចចូលកករ ក្នុងបឹង និងនៅរក្សាបានយ៉ាងល្អ អស់រយៈពេល ១,៥ លានឆ្នាំ និងក្លាយជាគ្រោងឆ្អឹងពេញលេញបំផុត ដែលអ្នកវិទ្យាសាស្ត្របានរកឃើញ។

យ៉ាងណាក្ដី គ្រោងឆ្អឹងក្មេងប្រុស គ្រាន់តែជាហ្វូស៊ីលមួយក្នុងចំណោមហ្វូស៊ីល ដែលរកឃើញនៅ បឹង Turkana ។ ហ្វូស៊ីលជាច្រើនទៀត ត្រូវបានរកឃើញនៅទីនោះ បង្ហាញពី ការវិវឌ្ឍរបស់មនុស្ស និងការរស់នៅរបស់បុព្វបុរសមនុស្ស រយៈកាល ៤លានឆ្នាំ។

តាមការឲ្យដឹងពីលោកសាស្ត្រាចារ្យ Fred Spoor ផ្នែកកាយវិភាគនៃការវិវត្តមនុស្ស មកពីសកលវិទ្យាល័យ College London ប្រទេសអង់គ្លេស បានឲ្យដឹងថា រយៈកាល២លានឆ្នាំមុន បឹង Turkana ព័ទ្ធជុំវិញដោយបរិស្ថានល្អ សម្រាប់បុព្វបុរសមនុស្សរស់នៅ។ នៅពេលពួកគេស្លាប់ ទីនោះក្លាយជាកន្លែងរក្សាទុកហ្វូស៊ីលបានយ៉ាងល្អ។

ដោយសារតែ បឹង Turkana ស្ថិតក្នុងតំបន់ភ្នំភ្លើង ពេលមានចលនាវិវត្តនៃផែនដី ធ្វើឲ្យសំបកផែនដីរំកិលនឹងបង្កើតឡើងស្រទាប់ថ្មីៗជាច្រើន។ នេះជាហេតុមួយធ្វើឲ្យតំបន់នោះ មានហ្វូស៊ីលតាមស្រទាប់ដី នៅអាយុកាលផ្សេងគ្នា។ ពេលដែលភ្លៀងធ្លាក់នៅតំបន់នោះ បានច្រោះសំណឹកដី ធ្វើស្រទាប់ដីនៅ Turkana លេចហ្វូស៊ីលឡើងជាច្រើន សម្រាប់អ្នកស្រាវជ្រាវសិក្សា។

រយៈពេលក្រោយមក ក្រុមអ្នកស្រាវជ្រាវ មកពីសកលវិទ្យាល័យ សហរដ្ឋអាមេរិក អេត្យូពី និងក្រុមស្រាវជ្រាវជាច្រើនទៀត បានរកឃើញ ហ្វូស៊ីលឆ្អឹង ប្រភេទស្វាជាច្រើនប្រភេទ លក្ខណៈដូចមនុស្ស ជាបន្តបន្ទាប់ និងបានរកឃើញ ពីឧបករណ៍ប្រើប្រាស់របស់បុព្វបុរសមនុស្សនាសម័យមុន ដូចជា ថ្មសំលៀង ប្រើជាពូថៅ កាំបិតជាដើម។ រហូតមកដល់ ឆ្នាំ២០១៥ កន្លងទៅថ្មីៗ នេះ ក្រុមអ្នកស្រាវជ្រាវបានប្រកាសថា រកឃើញ ឧបករណ៍ថ្ម សម្រាប់ប្រើប្រាស់ អាយុកាល ៣,៣ លានឆ្នាំ ជាឧបករណ៍ប្រើប្រាស់ចាស់ជាងគេបំផុត។

ដោយសារ បឹងTurkana ជាកន្លែងសំបូរដោយហ្វូស៊ីល ឆ្អឹងសត្វស្វាច្រើនប្រភេទដែលជាបុព្វបុរសរបស់មនុស្ស រួមទាំងឧបករណ៍ប្រើប្រាស់ វាកាន់តែទទួលបានការចាប់អារម្មណ៍ច្រើនពីអ្នកស្រាវជ្រាវ។ ទោះយ៉ាងណាក្ដី អ្នកស្រាវជ្រាវមួយចំនួន បានឲ្យដឹងថា បឹងTurkana គ្រាន់តែជាផ្នែកសំខាន់មួយ ប៉ុណ្ណោះ នៅមានកន្លែងជាច្រើនទៀត ដែលបង្ហាញពីការវិវត្តរបស់មនុស្ស ប៉ុន្តែបានបាត់បង់ មិនអាចរក្សាទុកហ្វូស៊ីលបាន៕