កីឡាការិនី​វាយ​កូន​បាល់​​ស្រស់​សោភា Maria Sharapova នឹង​ធ្វើ​សន្និសីទ​សារ​ព័ត៌មាន​ដ៏​ធំមួយ​ដើម្បី​ប្រាប់​ពីអនាគតរបស់​ខ្លួន​នៅ​លើ​ទីលាន​ប្រកួត។

តាម​ការ​គ្រោង​ទុក ​សន្និសីទ​សារព័ត៌មាន​នឹង​ត្រូវ​ធ្វើ​នៅ​រសៀល​ថ្ងៃចន្ទ​នេះ ក្នុង​ទីក្រុង Los Angeles។ លោក Max Eisenbud ជា​ភ្នាក់ងារ​របស់ Sharapova បាន​ឲ្យ​ដឹង​ថា គោលបំណង​នៃសន្និសីទ​​គឺ​ចង់បញ្ជាក់​ឲ្យ​ច្បាស់​ពី​អនាគតរបស់​កីឡាការិនី​ជនជាតិរុស្ស៊ី​ដែល​កំពុង​រ៉ាំរ៉ៃ​ដោយសារ​របួស ថា​តើ​នាង​នឹង​ត្រូវ​ផ្អាក​ប្រកួត​មួយ​រយៈ​ដើម្បី​វះកាត់​ព្យាបាល ឬ​ចូលនិវត្តន៍​ឈប់​លេង​តែ​ម្តង។

Sharapova កាល​ពី​ពេល​ថ្មី​ៗ​ទើប​ដក​ខ្លួន​ចេញ​ពីកម្មវិធី BNP Paribas Open ដោយ​សារ​បញ្ហា​របួស​ដៃ។ នាង​តែងមាន​របួស​ជា​ញឹកញាប់​ប៉ុន្មាន​ឆ្នាំ​ចុង​ក្រោយ​នេះ រាប់​ទាំង​របួស​ជើង​ដែល​ធ្វើ​ឲ្យ​នាង​បង្ខំ​ចិត្ត​ដក​ខ្លួន​ចេញ ពី​កម្មវិធី US Open កាល​ពី​ពេល​កន្លង​ទៅ។

អតីត​តារា​វាយ​កូន​បាល់​លេខ​១​ពិភពលោក​រូប​នេះ បច្ចុប្បន្ន​មាន​ចំណាត់​ថ្នាក់​លេខ​៧​នៅ WTA Ranking​ហើយ​ធ្លាប់​ឈ្នះ Grand slam ធំៗ​ចំនួន​៥ដង​និង​ពានរង្វាន់​នៅ WTA Tour ចំនួន​៣៥​ដង​ផ្សេង​ទៀត ក្នុង​វ័យ​ទើប​តែ​២៨​ឆ្នាំ​ប៉ុណ្ណោះ៕

ចុចអាន៖ Andy Murray រៃអង្គាស​ប្រាក់​ជាង​១១​ម៉ឺន​ដុល្លារ ជួយ​កុមារ​ភៀសខ្លួន​ស៊ីរី

ប្រែ​សម្រួល៖ វីរ៉ុត ប្រភព៖ TheGuardian