តើបងស្រីចិត្តពិសពុលរបស់ អ៊ូ ម៉ីនាងក្នុង "The Empress of China” ជាអ្នកណា?

2016-03-08 13:06:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បោះជើងចូលសិល្បៈបានជាង១០ ឆ្នាំតែរហូតដល់ពេលដើរតួ Xu Hui ក្នុងកំពូលរឿងភាគ "The Empress of China” ទើបតារាសម្ដែង Chang Chun Ning ត្រូវបានទស្សនិកជនស្គាល់មុខច្រើន។

ចាប់កំណើតក្នុងត្រកូលខ្ពង់ខ្ពស់

តារាសម្ដែងស្រី Chang Chun Ning ចាប់កំណើតនៅថ្ងៃទី ៤ ខែកញ្ញាឆ្នាំ ១៩៨២ នៅតៃវ៉ាន់។ គ្រួសាររបស់ Chang Chun Ning គឺជាគ្រួសារមួយក្នុងចំណោមគ្រួសារមួយចំនួនទៀតដែលឋានៈខ្ពង់ខ្ពស់បំផុតនៅតៃវ៉ាន់។ ឪពុករបស់តារាស្រីនេះគឺជាសាស្ត្រាចារ្យរបស់សកលវិទ្យាល័យភូមិន្ទតៃវ៉ាន់ ហើយក៏ជាសហការីនៅមន្ទីរពិសោធន៍ជាតិផងដែរ។ រីឯម្ដាយរបស់ស្រីស្អាតនេះ គឺជាបណ្ឌិតអក្សរសាស្ត្រក៏ដូចជាសាស្ត្រាចារ្យនៅសាលាវិចិត្រសិល្បៈតៃវ៉ាន់ផងដែរ។ អាចនិយាយបានថា Chan Chun Ning ត្រូវបានចាប់កំណើតក្នុងគ្រួសារមួយដែលត្រូវបានអ្នកផងគោរពកោតសរសើរ។ ដោយសារបានអប់រំល្អ បូករួមនឹងរស់នៅក្នុងបរិស្ថានមានចំណេះវិជ្ជាខ្ពស់ ចរិតរបស់តួស្រីនេះក៏មានភាពទន់ភ្លន់ចាប់តាំងពីមុនពេលចូលសិល្បៈមកម៉្លេះ។

សញ្ញាប័ត្រអនុបណ្ឌិត

មានមនុស្សតិចណាស់ដែលដឹងថា Chang Chun Ning មានសញ្ញាប័ត្រដ៏ខ្ពស់កម្ររកបាននៅក្នុងវិស័យសិល្បៈ។ កំឡុងពេលដើរតាមអាជីពជាតារាសម្ដែង តារាអាយុ ៣៣ ឆ្នាំទទួលបានការហាមឃាត់ជាច្រើនពីគ្រួសារ។ Chun Ning បានសន្យានឹងអ្នកមានគុណថានឹងមិនធ្វើឲ្យអ្នកទាំង២អស់សង្ឃឹមនឹងខ្លួននោះទេ។ ដូចនឹងអ្វីដែលនាងបាននិយាយពិតមែន Chang បានទទួលសញ្ញាប័ត្រអនុបណ្ឌិតផ្នែកច្បាប់ជាមួយនឹងពិន្ទុខ្ពស់កប់ពពកពី សាកលវិទ្យាល័យសេដ្ឋកិច្ចជាតិតៃវ៉ាន់។ នេះក៏ជាគោលដៅដែលម្ដាយរបស់ Chun Ning ដាក់ឲ្យនាងត្រូវតែធ្វើឲ្យបានបើសិនជាចង់ឈានចូលសិល្បៈ។

ស្លាប់រស់នឹងការសម្ដែង

Chang Chun Ning មិនធ្លាប់ឆ្លងកាត់វគ្គបណ្ដុះបណ្ដាលសម្ដែងណាទាំងអស់ពីមុនមក។ គ្រប់តួអង្គដែលនាងរ៉ាប់រងគឺត្រូវបានសម្ដែងឡើងដោយសមត្ថភាពធម្មជាតិរបស់នាងទាំងអស់។ ចាប់ផ្ដើមអាជីពសម្ដែងក្រោយពេលថតស្ប៉តពាណិជ្ជកម្មតូចមួយ នោះគឺជាកាលៈទេសៈដែល Chun Ning គិតថានាងមិនអាចរស់នៅដោយខ្វះការសម្ដែងបាន។ ស្រីស្អាតតូចស្ដើងមកពីតៃវ៉ាន់រូបនេះ បានចូលរួមសម្ដែងក្នុងរឿងជាច្រើនពីតៃវ៉ាន់រហូតដល់ចិនដីគោក។ តួអង្គទី១នៅក្នុងជីវិតរបស់ Chun Ning គឺតួលេខាមួយរូបនៅក្នុងកំពូលរឿងភាគល្បីល្បាញពេញអាស៊ី "ស្នេហាបួនដួង" វគ្គ២។ ចាប់ពីពេលនោះមកតារាសម្ដែងពន្លកក្រោយនេះ ឧស្សាហ៍មានវត្តមានដើរតួរងក្នុងរឿងភាគរបស់តៃវ៉ាន់ជាច្រើន។

ជោគជ័យបានមកដល់ក្រោយតស៊ូ ១០ឆ្នាំ

បើទោះបីជាខំព្យាយាមសម្ដែងក្នុងតួរងតូចតាចក៏ដូចជាតួកំប៉ិកកំប៉ុកផ្សេងៗគ្នាក្នុងរយៈពេល១០ ឆ្នាំក៏ដោយ ប៉ុន្តែ Chan Chun Ning នៅមិនទាន់បានបន្សល់នូវស្នាដៃណាមួយដែលធ្វើឲ្យដក់ក្នុងចិត្តរបស់ទស្សនិកជននោះទេ។ គ្រប់តួអង្គរបស់នាងមិនទាន់បានធ្វើឲ្យគេចាំមុខនៅឡើយទេ។ បើទោះជាពេលខ្លះបានដើរតួអង្គសំខាន់ក៏ដោយតែនាងនៅតែត្រូវស្រមោលដ៏ធំរបស់តួឯកប្រុសសង្កត់ពីលើដដែល។

Chan Chun Ning ពិតជាទទួលបានជោគជ័យលើសពីការរំពឹងទុក ពីតួអង្គ Xu Hui ក្នុងកំពូលរឿងភាគឆ្នាំ ២០១៥ "The Empress of China”។ រូបភាព Xu Hui ពីក្មេងស្រីសុភាពរាបសាក្លាយជាអ្នកម្នាងព្រៃផ្សៃហ៊ានប្រើគ្រប់កលល្បិច ដើម្បីបំផ្លាញជីវិតប្អូនស្រីតែមួយគត់របស់ខ្លួននៅកណ្ដាលរាជវាំងដ៏ឃោរឃៅបានធ្វើឲ្យនាងទទួលបានការគាំទ្រលើសតួឯកស្រី Fan Bing Bing ទៅទៀត។ គេមិនអាចបដិសេធបានទេថា ជាមួយនឹងរូបសម្រស់ស្រស់ស្អាត ផ្ទៃមុខល្អឥតខ្ចោះគួបផ្សំនឹងបទពិសោធន៍សម្ដែងជាង១០ឆ្នាំមកនេះ បានធ្វើឲ្យទស្សនិកជនស្លុងនឹងតួសម្ដែងរបស់នាងជាខ្លាំងក្នុងតួ Xu Hui មុខពីរ ពិសពុល។ ការស្លាប់នៅចុងបញ្ចប់រឿងរបស់ Xu Hui បានធ្វើឲ្យទស្សនិកជនមិនតិចទេស្ដាយក្រោយ។

ជោគជ័យរបស់តួ Xu Hui បានជួយឲ្យ Chang Chun Ning ទទួលបានការចាប់អារម្មណ៍ច្រើនជាងពីអ្នកគាំទ្រនៅចិនដីគោក។ នាងត្រូវបានផលិតករជាច្រើនចាប់អារម្មណ៍ក្រោយបោះជើងចូលសិល្បៈជាង១០ឆ្នាំ។ អាចនិយាយបានថា Xu Hui គឺជាតួអង្គដែលបានជួយ Chun Ning លុបបំបាត់នូវរូបភាពតួអង្គកម្សត់កម្រ ទន់ជ្រាយទាំងឡាយដែលធ្លាប់ធ្វើឲ្យទស្សនិកជនធុញទ្រាន់នឹងនាង។ បច្ចុប្បន្ន Chun Ning និង Zhang Han កំពុងសហការគ្នាក្នុងរឿងភាគថ្មី "The Four” ដែលត្រូវបានចាក់ផ្សាយទាំងនៅតៃវ៉ាន់និងចិនដីគោក៕