ស្ត្រីគ្រប់គ្រងក្រុមហ៊ុន មិនបានល្អដូចបុរស?

2016-03-08 14:30:55
ចំនួនមតិ 0 | ចំនួនចែករំលែក 0

ចន្លោះមិនឃើញ

បើទោះក្នុងវិស័យជំនួញ ស្ត្រីបានក្លាយជាម្ចាស់ក្រុមហ៊ុនច្រើនគួរសមក្ដី ប៉ុន្តែនៅមានមតិខ្លះលើកឡើងថា "ស្ត្រីគ្រប់គ្រងក្រុមហ៊ុន មិនបានល្អដូចបុរស" ដែលបង្ហាញឱ្យឃើញថា ស្ត្រីនៅមិនត្រូវបានគេជឿលើសមត្ថភាពនៅឡើយ។

លោក ចាន់ សុផាន់ណា ប្រធានការិយាល័យសមាគមសហគ្រិនស្ត្រីកម្ពុជា បានឱ្យដឹងថា លោកមិនយល់ដូច្នេះឡើយ ដោយលើកឡើងថាសហគ្រិនស្ត្រី ក៏មានសមត្ថភាពគ្រប់គ្រងក្រុមហ៊ុនបានល្អដូចបុរសដែរ។

លោកប្រាប់ថា៖ "មិនថាពួកគាត់ខ្លាំងជាងបុរសទេ តែចាប់ពីខ្ញុំធ្វើការនៅទីនេះមក ខ្ញុំឃើញថាពួកគាត់មានសមត្ថភាពដូចបុរសដែរ មិនអន់ជាងបុរសអីប៉ុន្មានទេ។ ខ្ញុំឃើញថាជំនួញរបស់ពួកគាត់ ដើររលូន ជោគជ័យ។ អ្នកខ្លះស្ទុះឡើងខ្លាំង ទៅតាមជំនួញរបស់ពួកគាត់"។

ប្រធានការិយាល័យ សមាគមសហគ្រិនស្ត្រីកម្ពុជារូបនេះ បានបន្ថែមថា បើតាមការសង្កេតរបស់លោក គឺមានសហគ្រិនបុរសច្រើន បរាជ័យ ប៉ុន្តែមិនទាន់ឃើញសហគ្រិនស្ត្រីណាម្នាក់ បិទក្រុមហ៊ុនចោលនៅឡើយទេ ហើយលោកបានប្រាប់ថា ភាពសកម្ម និងការជួយការងារ ឈឺឆ្អាលសង្គម ជាចំណុចខ្លាំងរបស់ពួកគេ។

ដោយឡែកលោកស្រី ជា សុផល្លា នាយិកាប្រតិបត្តិ ក្រុមហ៊ុន Emerald+ ទទួលស្គាល់ថា ស្ត្រីមានភាពមមាញឹកជាងបុរស ដោយសារត្រូវបំពេញការងារច្រើន ពោលគឺជាអ្នកដឹកនាំផង និងស្ត្រីមេផ្ទះផង។ ប៉ុន្តែយ៉ាងណាក្ដីលោកស្រីថា ចំពោះទស្សនៈនេះ គឺអាស្រ័យលើបុគ្គល ប៉ុន្តែមិនមានន័យថា បុរសអាចគ្រប់គ្រងក្រុមហ៊ុនបានល្អជាងស្ត្រីនោះដែរ។

"ស្ត្រីមានភាពខ្លាំងច្រើន ដូចជា ហ្មត់ចត់ គិតច្រើន ពូកែទំនាក់ទំនង ហើយគេឱ្យតម្លៃ។ ស្ត្រីមានបន្ទុកច្រើនជាងបុរស...មានបន្ទុកជាមេផ្ទះ ជាម្ដាយ ជាភរិយា គឺគាត់គិតច្រើន។ តែមិនប្រាកដថា បុរសគ្រប់គ្រងក្រុមហ៊ុនខ្លាំងជាងស្ត្រីភេទទេ។ ចំពោះទស្សនៈនេះ ខ្ញុំគិតថាវាអាស្រ័យទៅលើបុគ្គល"។

បន្ទុកគ្រួសារ ការដើរហើរច្រៀងខារ៉ាអូខេ និងការងារមួយចំនួន ដែលស្ត្រីធ្វើមិនអាចធ្វើដូចបុរសបាន គឺជាឧបសគ្គរបស់សហគ្រិនស្ត្រី ប៉ុន្តែការគ្រប់គ្រងក្រុមហ៊ុន ឬមុខជំនួញ មិនមែនជាបញ្ហាសម្រាប់ស្ត្រីនោះទេ។ លោកស្រី ជា សុផល្លា បញ្ជាក់។

"ខ្ញុំសូមផ្ដាំទៅកាន់សហគ្រិនស្ត្រីក្មេងៗជំនាន់ក្រោយថា សូមកុំអស់សង្ឃឹម និងសូមកុំបាក់ទឹកចិត្តឲ្យសោះ ទោះបីជាយើងដួល ឬក៏បរាជ័យប៉ុន្មានដងក៏ដោយ។ ត្រូវចេះតស៊ូឡើង និងត្រូវមានការតាំងចិត្តខ្ពស់ ដើម្បីធ្វើឲ្យក្ដីសុបិនរបស់យើងក្លាយជាការពិត... ត្រូវឧស្សាហ៍ព្យាយាមក្នុង អាជីវកម្ម និង សកម្មភាពសង្គមផ្សេងៗ ពីព្រោះការដែលយើងចង់ចេះ ចង់ដឹង ធ្វើការស្រាវជ្រាវ និង ភាពឧស្សាហ៍ព្យាយាមនេះហើយ ដែលជួយឲ្យយើងជោគជ័យបាន"។

លោកស្រី ជា សុផល្លា បន្ថែមថា ការចេះគ្រប់គ្រងពេលវេលា ការចេះរៀបចំផែនការអាជីវកម្ម និងការចេះសង្កេតនូវព្រឹត្តិការណ៍ផ្សេងៗ ដែលកើតឡើងជុំវិញខ្លួន ក៏ជាកត្តាមួយជួយឲ្យជោគជ័យក្នុងជំនួញផងដែរ។

បច្ចុប្បន្នស្ត្រី ក្នុងសមាគមសហគ្រិនស្ត្រីកម្ពុជា បានកើនឡើងជាបន្តបន្ទាប់ ដោយឆ្នាំ ២០១៥ មានចំនួនសរុប ៣១២ នាក់ កើនឡើងចន្លោះ ៦០ ទៅ ៧០ នាក់ បើធៀបនឹងឆ្នាំ ២០១៤ ហើយពួកគេភាគច្រើន ជាសហគ្រិនលំដាប់មធ្យម (SME) ដែលមានចំនួនពាក់កណ្ដាល នៃចំនួនសហគ្រិនស្ត្រីសរុប។ បើទោះមានការកើនឡើង ប៉ុន្តែសហគ្រិនស្ត្រីនៅកម្ពុជា នៅមានចំនួនតិចនៅឡើយ បើធៀបនឹងបុរស។ នេះបើតាមលោកការឱ្យដឹងរបស់ ចាន់ សុផាន់ណា៕

អត្ថបទ៖ អ៊ុំ សុភក្តិ