វិធីជួយឲ្យខ្លួនឯងអាចក្រោកឈរឡើងវិញ ក្រោយជួបបរាជ័យ

2016-03-18 13:11:39
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលអ្នកបរាជ័យ ហើយក្ដីសុបិនឃ្លាតទៅកាន់តែឆ្ងាយ គឺជារឿងលំបាកមួយ សម្រាប់ការក្រោកឈរឡើងវិញនិងចាប់ផ្ដើមជាថ្មី។ អីចឹង តើគួរធ្វើដូចម្ដេចដើម្បីអាចក្រោកឈរវិញបានលឿនក្រោយបរាជ័យ?

ទទួលស្គាល់ថាបរាជ័យជារឿងធម្មតាក្នុងជីវិត

វាជារឿងសំខាន់ ដែលយើងត្រូវដឹងថាអ្នកណាៗក៏ជួបបរាជ័យដែរ។ តើអ្នកនិពន្ធ J.K. Rowling បានផ្ញើអត្ថបទរឿង "Harry Potter”ទៅប៉ុន្មានរោងពុម្ពទម្រាំរកឃើញអ្នកដែលបោះពុម្ពវាបាន? ហើយអ្នកដឹងទេថា Beyonce មានបទចម្រៀងប៉ុន្មានបទដែលនិពន្ធនិងថតហើយប៉ុន្តែចេញលក់មិនបាន? អានអត្ថបទអំពីការតស៊ូរបស់បុគ្គលជោគជ័យឲ្យបានច្រើន ប្រសិនបើអ្នកត្រូវការការជំរុញទឹកចិត្តបន្ថែម។ ជួនកាលយើងអាចភ្លេចថាមនុស្សគ្រប់គ្នាសុទ្ធតែជួបបរាជ័យនៅពេលណាមួយ។ នេះគឺដោយសារតែភាគច្រើនយើងមិនពេញចិត្តនឹងជោគជ័យដែលខ្លួនឯងធ្លាប់ទទួលបាន ហើយចូលចិត្តប្រៀបធៀបខ្លួនឯងនឹងអ្នកដទៃ។ ដូច្នេះត្រូវជឿជាក់ខ្លួនឯង នោះអ្នកនឹងមានអារម្មណ៍ប្រសើរឡើងវិញ។

លួងខ្លួនឯង ដូចលួងមិត្តភ័ក្ដិ

ស្ដាប់ទៅដូចជាធម្មតាពេក ប៉ុន្តែជាការពិតអ្នកត្រូវតែជាអ្នកលើកទឹកចិត្តសម្រាប់ខ្លួនឯង! ពេលមិត្តល្អរបស់អ្នកជួបបរាជ័យ តើអ្នកអាចនិយាយថា "ឯងជាមនុស្សបរាជ័យ" "ឯងមិនអាចជោគជ័យទេមួយជីវិតនេះ" ឬ "ឃើញទេ សុបិនរបស់ឯងវាមិនអាចកើតឡើងទេ"... ដែរឬទេ? ប្រាកដជាគ្មានទេ។ ប៉ុន្តែពេលជួបបរាជ័យខ្លួនឯង យើងបែរជានិយាយពាក្យនេះមកខ្លួនឯងទៅវិញ។ ដូច្នេះ លើកក្រោយពេលមានអារម្មណ៍ថាខ្លួនបរាជ័យ ត្រូវលើកទឹកចិត្តខ្លួនឯងនិងនិយាយថា "ខ្ញុំនឹងសម្រេចវាបាន នៅថ្ងៃណាមួយ!”

ចាត់ទុកបរាជ័យជាមេរៀន

ផ្លូវទៅកាន់ភាពជោគជ័យមិនមែនត្រង់ ស្រួលរហូតទេ។ ក្នុងជីវិតពិត វាគឺជាផ្លូវដែលពោរពេញដោយក្រួស ថ្ម និងមានភាពឡើងចុះៗមិនទៀងទាត់។ ពេលឡើងក៏ល្អ ប៉ុន្តែពេលវាធ្លាក់ចុះ អ្នកនឹងអាចរៀនមេរៀនមានតម្លៃជាច្រើនអំពីខ្លួនឯង ។ អ្នកប្រហែលជាមិនអាចយល់ពីវាភ្លាមៗ ប៉ុន្តែមិនយូរមិនឆាប់អ្នកនឹងដឹងថាបរាជ័យគឺជាមេរៀននិងមូលហេតុសំខាន់ដែលជួយឲ្យអ្នកតស៊ូតទៅមុខទៀត។

**វិធីសម្រួលអារម្មណ៍ឲ្យប្រសើរឡើង

បើមានអារម្មណ៍ស្មុគស្មាញពេក ត្រូវចេញទៅកន្លែងណាមួយដែលខុសប្លែក អាចបន្ធូរបន្ថយភាពតានតឹងបាន។ បរិយាកាសថ្មី ក៏អាចឲ្យអ្នកទទួលបានអារម្មណ៍ថ្មីទន្ទឹមគ្នាដែរ។ ក្រៅពីនេះ អ្នកអាចហាត់ប្រាណ ឬក៏ធ្វើការងារតូចតាចណាមួយ ដោយកំណត់ពេលវេលាជាក់លាក់។ ក្រៅពីអាចបន្លប់ខ្លួនឯងពីរឿងពិបាកចិត្តមួយរយៈ ពេលធ្វើរួចហើយអ្នកនឹងអាចមានអារម្មណ៍ល្អថែមទៀត តាមរយៈសមិទ្ធផលដែលអ្នកសម្រេចបានពីការងារទាំងនោះ ៕