មួយឃ្លាយ៉ាងមានន័យពី វឌ្ឍនាកា មិនទាត់បាល់ប៉េណាល់ទីយប់មិញ

2016-03-19 19:58:09
ចំនួនមតិ 0 | ចំនួនចែករំលែក 0

ចន្លោះមិនឃើញ

“ខ្ញុំគិតថានរណាទាត់ចូលក៏ក្រុមឈ្នះដែរ” ជាពាក្យមួយឃ្លាដ៏មានន័យ ដែល ចាន់ វឌ្ឍនាកា បញ្ជាក់ពីមូលហេតុឱ្យប្រាក់ មុន្នីឧត្តម ជាអ្នកទាត់បាល់ពិន័យ១១ម៉ែត្រដែលជួយឲ្យក្រុម Cambodia All Stars យកឈ្នះក្រុម Lao All Stars ដោយលទ្ធផល ៣-២ ក្រោមសំឡេងគាំទ្ររាប់ម៉ឺននាក់ដែលឧបត្ថម្ភដោយស្រាបៀរកម្ពុជាកាលពីយប់មិញ។

ក្រោយលទ្ធផលស្មើគ្នា ២-២ នៅយប់មិញនេះ ខាងក្រុម Cambodia All Stars ទទួលបានបាល់ពិន័យ១១ម៉ែត្រ បន្ទាប់ពីខាងកីឡាករក្រុមឡាវបង្កកំហុសលើ វឌ្ឍនាកា ក្នុងតំបន់គ្រោះថ្នាក់។ គ្រានោះ អ្នកគាំទ្រជាង៥ម៉ឺននាក់សឹងតែគិតគ្រប់គ្នាទៅហើយថាប្រាកដជាតារាជើងស៊ុតរបស់បឹងកេតជាអ្នកទាត់បាល់នោះហើយ ប៉ុន្តែជាក់ស្ដែងទៅរូបគេបែរជាឱ្យបាល់នោះទៅមិត្តរួមក្រុម ប្រាក់ មុន្នីឧត្តមជាអ្នកស៊ុតបញ្ចូលទីទៅវិញ។

ចំពោះកន្លែងនេះដែរ កីឡាករដើមកំណើតនៅកំពតខាងលើ បានបកស្រាយប្រាប់ Sabay ថា មកពីមិនចាំបាច់តែស៊ុតគ្រប់ប្រកួតនោះទេ អ្វីដែលសំខាន់គឺឱ្យតែក្រុមទាំងមូលឈ្នះការប្រកួតទៅបានហើយ។ វាមិនមែនជារឿងសំខាន់ទេ សម្រាប់នរណាជាអ្នកស៊ុតចូល អ្វីដែលសំខាន់គឺលេងសហការគ្នាយកឈ្នះគូប្រកួត។

ការប្រកួតរវាងក្រុម Cambodia All Stars និង Lao All Stars បានបញ្ចប់ទៅដោយខាងក្រុមកម្ពុជាឈ្នះដោយលទ្ធផល ៣-២ ដែលបាល់ពិន័យ១១ម៉ែត្រដែលស៊ុតដោយកីឡាករប្រាក់ មុន្នីឧត្តម នោះហើយជាគ្រាប់បាល់ជ័យជម្នះ។ ការប្រកួតមិត្តភាពអន្តរជាតិរវាងក្រុមម្ចាស់ផ្ទះ Cambodia All Stars និង Lao All Stars នេះក្នុងគោលបំណងរំលឹកការទូតរវាងប្រទេសទាំងពីរលើកទី៦០ដែលទទួលបានការឧបត្ថម្ភពីស្រាបៀរកម្ពុជាចំនួន៥ម៉ឺនដុល្លារអាមេរិក៕