បុរសម្នាក់ក្ដៅចិត្ត ក្រោយរើសបានលុយ១៥០០ដុល្លារ ពេលទៅគេងសណ្ឋាគារ

2016-03-30 21:40:30
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសជនជាតិចិនម្នាក់ដែលបានប្រទះឃើញលុយជាង១៥០០ដុល្លារក្រោមខ្នើយនៅសណ្ឋាគារមួយដែលខ្លួនបានស្នាក់នៅ ហើយមិនសប្បាយចិត្ត ធ្វើឲ្យមនុស្សជាច្រើនភ្ញាក់ផ្អើល និងត្រូវសារព័ត៌មានចិនចាប់អារម្មណ៍ចុះផ្សាយ។

តាមប្រភពពី People Daily បុរសម្នាក់ដែលមានឈ្មោះ Lu Gang បានស្នាក់នៅសណ្ឋាគារ Shangdu នៅទីក្រុង Chongqing ប្រទេសចិន។ នាថ្ងៃចន្ទ ៨ មីនាកន្លងទៅ លោកបានចាកចេញពីសណ្ឋាគារ ប៉ុន្តែមុននឹងចេញទៅក៏ប្រទះឃើញលុយចំនួន១ម៉ឺនយាន់ (ប្រហែល ១៥៤២ដុល្លារ) នៅក្រោមខ្នើយគេងក្នុងបន្ទប់សណ្ឋាគារដែលខ្លួនបានស្នាក់នៅអំឡុងពេលទៅបុណ្យឆេងម៉េង បោសសម្អាតសែនផ្នូរកុងម៉ានៅក្បែរតំបន់នោះ។

ក្រោយឃើញលុយបែបនោះ លោក Lu Gang បានទៅប្រាប់បុគ្គលិកសណ្ឋាគារថាលោកមិនពេញចិត្តនោះឡើយដែលខាងបុគ្គលិកមិនបានយកចិត្តទុកដាក់សម្អាតបន្ទប់របស់គាត់ឲ្យស្អាត។ លោក Gang បាននិយាយប្រាប់ទៅសារព័ត៌មានថា៖ "លុយទាំងនោះមិនមែនជារបស់ខ្ញុំទេ ប៉ុន្តែខ្ញុំប្រទះឃើញវានៅក្រោមខ្នើយក្នុងបន្ទប់សណ្ឋាគារដែលខ្ញុំស្នាក់នៅ។ ច្បាស់ណាស់ អ្នកសម្អាតបន្ទប់មិនបានយកចិត្តទុកដាក់ធ្វើការងារគាត់នោះទេ។ គាត់មិនបានប្ដូរស្រោមខ្នើយឲ្យខ្ញុំទេ"។

យ៉ាងណាក្ដី ប៉ូលិសបានទៅជួយអន្តរាគមន៍ដោះស្រាយបញ្ហានោះ លោក Gang បានប្រគល់លុយទាំងអស់ដែលលោករើសបានទៅឲ្យប៉ូលិសចូលជាថវិការដ្ឋ ចំណែកបុគ្គលិកនិងប៉ូលិសផ្សេងទៀតដែលបានឃើញហេតុការណ៍នោះបានសរសើរដល់លោក Gang ផងដែរ៕