ហេតុអ្វីខ្មែរអាចរៀបការថ្ងៃចូលឆ្នាំថ្មីបាន ប៉ុន្តែចិនមិនអាច?

2016-04-13 13:12:45
ចំនួនមតិ 0 | ចំនួនចែករំលែក 0

ចន្លោះមិនឃើញ

តើអ្នកដឹងទេថា ហេតុអ្វីខ្មែរអាចរៀបចំពិធីមង្គលការនៅថ្ងៃចូលឆ្នាំខ្មែរបាន ប៉ុន្តែហេតុអ្វីចិនមិនអាចរៀបអាពាហ៍ពិពាហ៍ថ្ងៃចូលឆ្នាំចិនបាន?

ចំពោះហេតុផល លោកតាអាចារ្យ អ៊ីម នៅខេត្តកំពង់ចាមបានឱ្យដឹងថា បច្ចុប្បន្នប្រជាជនខ្មែរយល់ថា ឱ្យតែមានវេលាជ័យល្អ បើទោះថ្ងៃនោះជាថ្ងៃសៅ-អាទិត្យ ឬ បុណ្យចូលឆ្នាំថ្មីប្រពៃណីជាតិ ក៏ពួកគេរៀបការដែរ។ ចំណែកហេតុផលមួយទៀតនោះ គឺប្រជាជនខ្មែរតែងទៅធ្វើការស្រុកឆ្ងាយ កម្របានជួបជុំគ្រួសារ បងប្អូន ម្ល៉ោះហើយគេក៏រៀបពិធីមង្គលការនៅថ្ងៃចូលឆ្នាំតែម្ដង។

“ឥលូវគេមិនសូវគិតទេ ឱ្យតែមានវេលាជ័យល្អគេការហើយ។ ណាមួយបងប្អូនកូនចៅអី គេទៅធ្វើការនៅឆ្ងាយ អ៊ីចឹងគេរៀបការថ្ងៃចូលឆ្នាំ ដើម្បីបានជួបជុំគ្នា ព្រោះគេកម្របានមកលេងស្រុកណាក្មួយ"។

ចុះប្រជាជនចិនវិញ រៀបអាពាហ៍ពិពាហ៍ថ្ងៃចូលឆ្នាំចិនអត់? លោក កុក ឡុង គ្រូហោរាចិនប្រចាំក្រុង ភ្នំពេញបានប្រាប់ថា ប្រជាជនចិនមិនរៀបការ ក្នុងថ្ងៃបុណ្យចូលឆ្នាំចិននោះទេ ព្រោះជាពេលដែលប្រជាជនចិន រវល់ជួបជុំគ្នា ដើរលេងសប្បាយ ហើយមានអាហារហូបចុកសម្បូរហូរហៀរ។

“ចូលឆ្នាំចិន ចិនអត់ការទេ ព្រោះអីគេជួបជុំបងប្អូន ដើរលេង ផឹកស៊ី ហើយគេមានអាហារហូរហៀរ ជាពិសេសចាប់ឆាយ។ បើការ គ្មានអ្នកណាចង់ទៅទេ។ ម្យ៉ាងទៀតទេវតា ចុះមកឱ្យសិរីសួស្ដី អ៊ីចឹងគេនៅអបអរទេវតារបស់គេ"។

លោកគ្រូហោរារូបនេះថ្លែងបន្តថា ប្រជាជនចិនអាចរៀបការបានមុនចូលឆ្នាំចិន ១ អាទិត្យ និង ក្រោយចូលឆ្នាំចិន ១ ខែ៕

ចុចអាន៖ ឪពុកម្ដាយកើតឆ្នាំវក គួរយកបុត្រធីតាឆ្នាំណាល្អ ?

អត្ថបទ៖ អ៊ុំ សុភក្តិ