Song Joong Ki កំពុងល្បីកក្រើក តែនៅតែចាញ់ប្រៀប Kim Soo Hyun

2016-04-18 15:51:34
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមការបោះឆ្នោតរបស់អ្នកប្រើអ៊ីនធឺណិតនៅលើគេហទំព័រ Nate បានបង្ហាញឲ្យឃើញថាប្រជាប្រិយភាពរបស់តារាសម្ដែងប្រុស Kim Soo Hyun នៅតែស៊ីដាច់ Song Joong Ki ដដែលបើទោះបីជាតួឯករឿង "Descendants of the Sun” កំពុងល្បីឈ្មោះខ្លាំងក៏ដោយ។

តារាសម្ដែងប្រុសកូរ៉េ Song Joong Ki នៅពេលបច្ចុប្បន្នគឺជាតារាមួយក្នុងចំណោមតារាល្បីឈ្មោះជាងគេក្រោយពេលភាពយន្តភាគ "Descendants ot the Sun” ត្រូវបានចាក់ផ្សាយ។ តារាសម្ដែងអាយុ៣០ ឆ្នាំកំពុងទទួលបានពាក្យអញ្ជើញឲ្យថតស្ប៉តពាណិជ្ជកម្មក៏ដូចជាថតរូបឲ្យទស្សនាវដ្ដីជាច្រើនរាប់មិនអស់។ ត្រលប់មកវិញក្រោយពេលបាត់មុខ២ឆ្នាំដោយត្រូវចូលបម្រើក្នុងជួរកងទ័ព Song Joong Ki ស្រាប់តែល្បីទូទាំងអាស៊ីជាមួយរឿងភាគថ្មី។ ជាមួយគ្នានេះដែរ តារាកើតឆ្នាំ ១៩៨៥ ក៏ត្រូវបានគេយកមកប្រៀបធៀបជាមួយ Kim Soo Hyun តារាប្រុសដែលធ្លាប់ល្បីកក្រើកទូទាំងអាស៊ីជាមួយរឿងភាគ "My Love From the Star” កាលពី២ឆ្នាំមុន។

មុននេះបន្តិច បណ្ដាញព័ត៌មាន Nate របស់កូរ៉េបានបើកការបោះឆ្នោតមួយដោយមានចំណងជើងថា៖ "តើ Song Joong Ki អាចល្បីជាង Kim Soo Hyun ទេនៅប្រទេសចិនដែរឬទេ?”។ ការបោះឆ្នោតរវាងអ្នកគាំទ្ររបស់តារាទាំង២កំពុងតែប្រព្រឹត្តឡើងនៅឡើយដោយលទ្ធផលនៅពេលបច្ចុប្បន្នគឺ Kim Soo Hyun ជាអ្នកនាំមុខដាច់ស្រឡះ។

ការបោះឆ្នោតនេះនឹងត្រូវប្រព្រឹត្តឡើងចាប់ពីថ្ងៃទី៨ ខែមេសា ដល់ថ្ងៃទី៦ខែឧសភាឆ្នាំ ២០១៦។ បើគិតត្រឹមថ្ងៃទី ១៧ ខែមេសា Kim Soo Hyun កំពុងនាំមុខជាមួយ ៨២% ដោយមានសំឡេងឆ្នោតសរុបចំនួន ៣២២៣៧ សំឡេង។ រីឯ Song Joong Ki កំពុងនៅពីក្រោយជាមួយ ១៨% ដោយមានសំឡេងឆ្នោតសរុបចំនួន ៥៧៣៨ សំឡេង។ លទ្ធផលនេះបានបង្ហាញឲ្យឃើញថា បើទោះបីជាបាត់មុខពីកញ្ចក់ទូរទស្សន៍មួយរយៈហើយក៏ដោយតែតួឯករឿង "My Love From The Star” នៅតែមានប្រជាប្រិយភាពខ្លាំងដដែល៕