តម្លៃខ្លួន Song Joong Ki ខ្ពស់ជាងតម្លៃ Lee MinhoនិងKim Soohyun បូកចូលគ្នាទៅទៀត

2016-04-22 16:29:30
ចំនួនមតិ 0 | ចំនួនចែករំលែក 0

ចន្លោះមិនឃើញ

តម្លៃខ្លួនរបស់តារាសម្ដែងល្បីឈ្មោះ Song Joong Ki បានកើនឡើងមិនគួរឲ្យជឿក្រោយពេលកំពូលរឿងភាគ "Descendants of the Sun” បានចាក់ផ្សាយទាំងនៅកូរ៉េនិងចិនក្នុងពេលតែមួយ។

ថ្មីៗនេះ មជ្ឈមណ្ឌលព័ត៌មានអ៊ីនធឺណិតរបស់ចិន (CIIC) ទើបតែប្រកាសពីតួលេខដ៏មិនគួរឲ្យជឿនៃចំណូលបានពីការផ្សាយពាណិជ្ជកម្មរបស់តារាសម្ដែងកូរ៉េ Song Joong Ki។ មជ្ឈមណ្ឌលខាងលើបានឲ្យដឹងថា ប្រាក់ចំណូលដែល Song Joong Ki រកបានក្នុងការផ្សាយពាណិជ្ជកម្មមួយនៅចិនមកដល់ពេលបច្ចុប្បន្នគឺ ២,៨ពាន់លានវ៉ុន (២,៤លានដុល្លារ)។ មជ្ឈមណ្ឌលដដែលបានឲ្យដឹងថាប្រជាប្រិយភាពរបស់តារាសម្ដែងវ័យ ៣០ឆ្នាំគឺបានមកពីរឿង "Descendants of the Sun” ដែលទើបតែបញ្ចប់ការផ្សាយនាពេលថ្មីៗនេះ។

"Song Joong Ki ដែលកំពុងតែល្បីរន្ទឺនៅទូទាំងអាស៊ីដោយសាររឿងភាគ "Descendants of the Sun” នោះ កំពុងរកចំណូលបានយ៉ាងច្រើនលើសលុប។ នៅទីផ្សារប្រទេសចិន តម្លៃខ្លួនសម្រាប់ការផ្សាយពាណិជ្ជកម្មរបស់តារារូបនេះបានកើនឡើងគួរឲ្យកត់សម្គាល់។ សម្រាប់ស្ប៉តពាណិជ្ជកម្មដែលមានសុពលភាពរយៈពេល៦ខែមួយ Song Joong Ki ស៊ីថ្លៃ ១៦លានយាន់ (២,៤លានដុល្លារអាមេរិក) ដែលតម្លៃនេះគឺខ្ពស់ជាងតម្លៃខ្លួនរបស់ Lee Minho និង Kim Soo Hyun បូកចូលគ្នាទៅទៀត។ នៅពេលបច្ចុប្បន្ន មានក្រុមហ៊ុនពាណិជ្ជកម្មប្រមាណ១០កំពុងតែចង់សហការជាមួយតារាកើតឆ្នាំ ១៩៨៥ មួយនេះ"។ CIIC ឲ្យដឹង។

ជាមួយនឹងព័ត៌មាននេះដែរ Blossom Entertainment តំណាងក្រុមហ៊ុនរបស់ Song Joong Ki បានប្រាប់ទៅកាន់បណ្ដាញព័ត៌មាន Sports Chosun ថា៖ "មានសារព័ត៌មានជាច្រើនដែលចុះផ្សាយពីតម្លៃខ្លួនរបស់ Song Joong Ki តែយើងមិនអាចប្រាប់ពីតម្លៃជាក់លាក់បាននោះទេ។ ប៉ុន្តែវាជាការពិតដែលគេកំពុងតែទទួលបានសំណើជាច្រើនដើម្បីថតផ្សាយពាណិជ្ជកម្មទាំងក្នុងស្រុកនិងអន្តរជាតិ"៕