តួ Stunt កូនខ្មែរល្បីឈ្មោះនៅទ្វីបអឺរ៉ុបមកប្រទេសកម្ពុជា

2016-04-22 21:09:11
ចំនួនមតិ 0 | ចំនួនចែករំលែក 0

ចន្លោះមិនឃើញ

Maurice Chan ដែលជាកូនខ្មែរម្នាក់ ល្បីល្បាញលើឆាកអន្តរជាតិក្នុងការសម្ដែងជាតួ Stunt តាមរយៈភាពយន្តជាច្រើន បានធ្វើដំណើរមកដល់ប្រទេសកម្ពុជាកាលពីពេលថ្មីនេះ។

នៅក្នុងជំនួបជាមួយ Sabay កូនខ្មែរសញ្ជាតិបារាំងបានលើកឡើងថា បំណងលើកនេះ គឺដើម្បីពិភាក្សាពីការថតភាពយន្តខ្នាតធំមួយនៅប្រទេសកម្ពុជា និងស្វែងរកឱកាសដើម្បីបើកសាលាបណ្ដុះបណ្ដាលរបៀបហក់លោត ឬសម្ដែងជាតួ Stunt សម្រាប់ភាពយន្តខ្មែរនាអនាគត។

“ដំបូងឡើយ ខ្ញុំត្រូវប្រមូលក្រុមរបស់ខ្ញុំសិន ដើម្បីជួយបង្ហាត់បង្រៀនទៀត ដូច្នេះត្រូវរកអ្នកជួយគាំទ្រ បានអាចបើកបាន "។ Maurice Chan ថ្លែងយ៉ាងដូច្នេះ។ បុរសវ័យ ៤០ ឆ្នាំរូបនេះបន្តថា មិនទាន់បានកំណត់ថា គម្រោងនេះនឹងចេញជារូបរាងពេលណានោះទេ ព្រោះត្រូវការថវិកាពីប្រទេសកម្ពុជាខ្លះ ហើយសល់ប៉ុន្មានទៀតលោកជាអ្នកចំណាយសម្រាប់ការអញ្ជើញតួ Stunt ជាសមាជិកក្រុមមកចូលរួមបង្ហាត់បង្ហាញដល់កូនខ្មែរ។

បច្ចុប្បន្ន Maurice Chanកំពុងតែរកមធ្យោបាយ ធ្វើយ៉ាងណាឱ្យបំណងរបស់លោកបានសម្រេច ព្រោះលោកចង់បង្ហាញទៅកាន់ពិភពលោកថា នៅប្រទេសកម្ពុជា ក៏មានតួ Stunt ដែរ។

លោកបន្តថា៖"នៅកម្ពុជាមានដែរអ្នកសម្ដែងហក់លោត តែមិនទាន់ចេះបច្ចេកទេសការពារខ្លួនកុំឱ្យមានគ្រោះថ្នាក់ ហើយខ្ញុំចេះ! ចង់យកមកចែករំលែកនៅទីនេះ"។ ប្រធានក្រុម Cascade រូបនេះបន្ថែមទៀតថា តួ Stunt ប្រឈមទៅនឹងគ្រោះថ្នាក់បំផុតទាមឱ្យមានការប្រុងប្រយ័ត្ន និងដឹងពីតិចនិកការខ្លួន។ យ៉ាងណាក៏ដោយ លោកត្រូវត្រឡប់ទៅប្រទេសបារាំងវិញនៅដើមខែឧសភាដើម្បីត្រៀមសម្រាប់ផែនការរបស់លោក.

Maurice ចាប់ផ្ដើមធ្វើជាតួវាយតប់ (Stunt) ក្នុងប្រទេសបារាំងតាំងពីឆ្នាំ ២០០០ មក ដោយធ្វើការជាមួយអ្នករៀបចំប្លង់វាយតប់ និងឈុតគ្រោះថ្នាក់មួយចំនួនដូចជា Alain Figlarz, Olivier Schneider, Phlippe Guegan, Laurent Demianoff។ ដោយសារមើលឃើញសមត្ថភាព និងជឿជាក់ថា គេអាចធ្វើបាន ទើប Maurice ត្រូវផ្ដល់ឱកាសឲ្យថតរឿងជាហូរហែឥតដាច់។

រឿងហូលីវូដដែលលោកសម្ដែងដំបូង មានចំណងជើងថា “Unleashed” ឬ “Danny the Dog” ជាភាសាបារាំង សម្ដែងជាមួយ លី លានជា (Jet Li) និង Morgan Freeman ក្នុងឆ្នាំ ២០០២ មុននឹងចាក់បញ្ចាំងនៅឆ្នាំ ២០០៥។ រឿងហូលីវូដដែលលោកធ្លាប់សម្ដែងផ្សេងទៀតមាន "From Paris with Love (2010)”, "District 13 Ultimatum (2009)” និង “Lucy (2014)”។ ក្រៅពីនេះ នៅមានភាពយន្តបារាំង និងឥណ្ឌាជាច្រើនផ្សេងទៀតដែលលោកបានចូលរួមសម្ដែង៕