មហាសេដ្ឋីចិនបោះសម្ដីថា Apple ជាក្រុមហ៊ុនហួសសម័យ

2016-04-25 20:48:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងបទសម្ភាសន៍ជាមួយទូរទស្សន៍ CNBC មហាសេដ្ឋីចិនលោក Jia Yueting បានបោះសម្ដីដែលបង្ហាញពីការឌឺដងផ្លែផ្កាទៅកាន់ក្រុមហ៊ុនបច្ចេកវិទ្យាយក្ស Apple។

លោក Jia Yueting បានលើកឡើងថា ការរចនាផលិតផលរបស់ក្រុមហ៊ុន Apple គឺហួសសម័យ។ មិនតែប៉ុណ្ណោះសូម្បីតែចំនួនលក់ក្នុងប្រទេសចិន ដែលជាទីផ្សារធំទីពីររបស់ Apple មានសភាពកាន់តែយ៉ាប់យឺនទៅ។

លោកបានបញ្ជាក់ពីមូលហេតុដែលខ្លួនលើកឡើងដូចនេះថា៖ "មូលហេតុដ៏ធំមួយដែលធ្វើឲ្យចំនួនលក់មានសភាពមិនល្អ គឺថាភាពច្នៃប្រឌិតរបស់ Apple ហាក់យឺតយ៉ាវខ្លាំង។ ឧទាហរណ៍ កាលពីមួយខែមុន Apple បានប្រកាសពី iPhone SE។ បើឈរលើជ្រុងក្នុងនាមជាអ្នកប្រឡូកក្នុងវិស័យឧស្សាហកម្មនេះ វាជាផលិតផលមួយដែលមានកម្រិតបច្ចេកវិទ្យាថ្នាក់ទាប ហើយយើងគិតថាវា (iPhone SE) ជាអ្វីដែលពួកគេ (ក្រុមហ៊ុន Apple) មិនគួរធ្វើនោះឡើយ"។

លោកបន្តទៀតថា៖ "ក្នុងនាមជាអ្នកដឹកនាំនៃឧស្សាហកម្ម Apple គួរតែបង្កើតផលិតផលដែលពិសេសលើសនេះ។ ទូរសព្ទ iPhone នៅតែជាផលិតផលឈានមុខកាលពីប្រាំឆ្នាំមុន ចាប់តាំងពីចេញលក់នៅឆ្នាំ ២០០៨ មក ប៉ុន្តែពេលនេះបែរជាតាមមិនទាន់គេទៅវិញ"។

ទាក់ទងនឹងការលើកឡើងរបស់មហាសេដ្ឋីចិនខាងលើនេះ គេនៅមិនទាន់ឃើញមានប្រតិកម្មតបតពីសំណាក់ក្រុមហ៊ុន Apple នៅឡើយនោះទេ។

លោក Jia Yueting ជានាយកប្រតិបត្តិការក្រុមហ៊ុន LeEco ដែលល្បីល្បាញថាជាក្រុមហ៊ុន Netflix របស់ប្រទេសចិន។ ក្រៅពីផ្ដល់សេវាកម្មទូរទស្សន៍ក្រុមហ៊ុននេះក៏មាន ផលិតផលិតផលដូចជា ទូរសព្ទ, ទូរទស្សន៍, កង់ជិះឡើងភ្នំ ហើយផលិតផលចុងក្រោយដែលបង្ហាញថ្មីៗនេះគឺរថយន្តអគ្គិសនី៕

ចុចអាន៖ ឆ្នាំ ២០១៦ អនាគត Apple មិនល្អ ការលក់ iPhone ធ្លាក់ចុះខ្លាំង

ប្រែសម្រួល៖ ហៃ សុខហេង ប្រភព៖ CNBC