រកឃើញខ្សែភាពយន្តខ្មែរពីសម័យដើម ដែលខ្មែរមួយចំនួនមិនធ្លាប់ឃើញ បង្ហាញល្ងាចមិញ

2014-10-27 18:40:37
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវវ័យមួយក្រុម ដែលមានឈ្មោះថា "ក្រុមព្រះសុរិយា" បានស្រាវជ្រាវរកឃើញខ្សែភាពយន្តខ្មែរមួយចំនួនមុនឆ្នាំ ១៩៧៥ ដែលខ្សែភាពយន្តមួយនេះ ប្រជាជនខ្មែរមិនធ្លាប់ឃើញឡើយ ត្រូវបានបង្ហាញជូនជាសាធារណៈ កាលពីល្ងាចមិញ។

ភាពយន្តនោះ មានឈ្មោះថា "ផែនដីវិល" ដោយមានរយៈពេលតែ ៥ នាទី ប៉ុណ្ណោះ ហើយត្រូវបានបង្ហាញជា សាធារណៈ កាលពីល្ងាចមិញ នៅក្នុងព្រឹត្តិការណ៍ ទេសចរណ៍សិល្បៈ ភាពយន្តលើកទី ១ ដែលបានធ្វើឡើងនៅក្នុងសាលមហោស្រពចតុមុខ ក្រោមវត្តមាន សម្ដេចក្រុមព្រះ នរោត្ដម រណឫទ្ធិ, លោក ជំទាវ ភឿង សកុណា រដ្ឋមន្ត្រី ក្រសួង វប្បធម៌ និង វិចិត្រសិល្ប ព្រមទាំង ទស្សនិកជន និង សិល្បករ សិល្បការិនីជាច្រើននាក់ទៀត។

បើតាមការឲ្យដឹងពី លោក វីរៈ ប្រធាន "ក្រុមព្រះសុរិយា" បានឲ្យដឹងថា ភាពយន្ត "ផែនដីវិល" ត្រូវបានក្រុមអ្នកស្រាវជ្រាវភាពយន្តចាស់ៗមួយនេះ រកឃើញនៅលំនៅដ្ឋាន ប្រជាពលរដ្ឋម្នាក់ ដែលជា អតីតអ្នកចាក់បញ្ចាំងកុនចាស់ៗ ក្នុងខេត្តបាត់ដំបង កាលពី ចុងឆ្នាំ ២០១២ ។

ប្រធានក្រុមអ្នកស្រាវជ្រាវខាងលើបានរៀបរាប់ នៃការរកឃើញភាពយន្តនោះថា ក្រុមរបស់លោក ដែលមានគ្នា ៤ នាក់ បានចុះទៅក្នុងទឹកដីខេត្តបាត់ដំបង កាលពីចុងឆ្នាំ ២០១២ ដើម្បីស្វែងរកភាពយន្តចាស់ៗ របស់ខ្មែរ ទុក្ខឲ្យក្មេងជំនាន់ក្រោយបានដឹង។ គ្រានោះ បានស្គាល់អ្នករត់កង់បី ដែលមានឪពុកជា អ្នកធ្លាប់ប្រកបរបរជាចាក់បញ្ចាំងកុនរឿងចាស់ៗ ក្នុងខេត្តបាត់ដំបង ហើយក៏បានទៅលេងដល់ផ្ទះ អ្នករត់កង់បីនោះ ដើម្បីសួរនាំស្វែងរកភាពយន្តចាស់ៗ ដែលគ្រួសារមួយនោះ ចាក់បញ្ចាំង ។

វីរៈ បានបន្តថា ជាអកុសលកាសែត នៃខ្សែភាពយន្តចាស់ៗ ដែលក្រុមគ្រួសាមួយនោះ ធ្លាប់ចាក់បញ្ចាំងត្រូវបានលក់ឲ្យអេតចាយអស់ទៅហើយ ប៉ុន្តែ ចៃដន់ ក្រុមរបស់លោកបានឃើញ ខ្សែដុំហ្វីលមួយខ្សែនៅក្រោមគ្រែ ដែលអង្គុយលេងនោះ ហើយក៏នាំយកមកភ្នំពេញ ដើម្បីចាក់បញ្ចាំងមើល។ ពេលចាក់បញ្ចាំងដុំហ្វីល នោះមិនមានសំឡេងទេ ហើយឈុតឆាកនៅក្នុងហ្វីលនោះ ត្រូវបានថត ៤ ទៅ ៥ ដង ដែលនាំឲ្យសន្និដ្ឋានបានថា ជាហ្វីល សល់ពីការកាត់ត រឿងចាស់ៗ ។

ក្រោយមក ជនជាតិអាល្លឺម៉ង់ម្នាក់ឈ្មោះ លោក ម៉ាចដ៍ បានជួយយកដុំហ្វីលនោះ ទៅលាងសម្អាតឲ្យ នៅ ប្រទេសអូស្ត្រាលី។ នៅក្នុងភាពយន្ត "ផែនដីវិល" ទោះបីជាមានរយៈពេលតែ ៥ នាទី ក៏ពិតមែន ប៉ុន្តែភាពយន្តមួយនេះ បានបង្ហាញពីសំលៀកបំពាក់ និង បែបផែននៃការរស់នៅ របស់ប្រជាពលរដ្ឋនៅសម័យនោះផងដែរ ចំណែកឯ តារាសម្ដែងក្រុមអ្នកស្រាវជ្រាវ មិនបានប្រាប់ពីឈ្មោះអ្វីខ្លះនោះឡើយ។ បច្ចុប្បន្នភាពយន្ត "ផែនដីវិល" កំពុងរក្សាទុកដោយ ក្រុម "ព្រះសុរិយា" និង នាយកដ្ឋានភាពយន្តនៃក្រសួង វប្បធម៌ និង វិចិត្រសិល្ប ដើម្បីជាឯកសារមួយសម្រាប់ក្មេងជំនាន់ក្រោយ។

នៅក្នុងព្រឹត្តិការណ៍ទេសចរណ៍សិល្បៈ ភាពយន្តលើកទី ១ កាលពីល្ងាចមិញនេះ ក្រៅពីការចាក់ភាពយន្ត "ផែនដីវិល" ក៏បានចាក់បញ្ចាំងពីភាពយន្តឯកសារ ស្ដីពី ឆ្មាំប្រាសាទ ការបង្ហាញសំលៀកបំពាក់ច្នៃពីខ្ចៅ ថង់ប្លាស្ទិក និង ផ្ទាំងទស្សនីយភាពល្ខោននិយាយ រឿង "ស្ត្រី និង ឧបករណ៍ភ្លេងខ្មែរ" ផងដែរ។ កម្មវិធីខាងលើមានក្រុមហ៊ុនជាច្រើន ក្នុងនោះក៏មានក្រុមហ៊ុន Sabay បានចូលរួមឧបត្ថម្ភផងដែរ៕

អានអត្ថបទ៖ សាន់ដេថា ចំណូលពី “សង្សារខ្មោច” អាចមានផលប៉ះពាល់ខ្លះៗ អានអត្ថបទ៖ ធី យ៉ាដា ពូកែថ្ងូរ

អត្ថបទ៖ ខុត សីហា