ម្ចាស់ផ្ទះស្វាយរៀង បរាជ័យដំបូងក្រោមថ្វីជើងការពារជាតិ ៥-១

2016-04-30 02:57:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមម្ចាស់ផ្ទះព្រះខ័នរាជស្វាយរៀងខកចិត្តដោយបានចាញ់ក្រុមក្រសួងការពារជាតិដោយលទ្ធផល ៥-១ ក្នុងដីខ្លួនឯង ក្នុងពានរង្វាន់លីគកំពូលកម្ពុជាអម្បាញ់មិញនេះ។

ការប្រកួតនៅតង់ទី១ ក្រុមម្ចាស់ផ្ទះព្រះខ័នរាជស្វាយរៀងបានរកគ្រាប់បាល់នាំមុខក្រសួងការពារជាតិមុនដោយខ្សែបម្រើ សំអឿន ពិដោរ នៅនាទីទី១៤ ប៉ុន្តែត្រូវបានខ្សែប្រយុទ្ធមកពីកូរ៉េខាងជើង Myong Ho ស៊ុតឲ្យក្រុមទ័ពតាមស្មើនៅនាទីទី២៦។ ចប់តង់ទីមួយក្រុមទាំងពីរបានត្រឹមស្មើគ្នា១-១ ប៉ុន្តែក្រុមម្ចាស់បង្ហាញទម្រង់លេងល្អជាង។

សម្រាប់ការប្រកួតតង់ទីពីរបានតែពីរនាទីប៉ុណ្ណោះប្រធានក្រុម ភួង សុខសាណា បានបំប៉ោងសំណាញ់ទីរបស់ម្ចាស់ផ្ទះដើម្បីនាំមុខ២-១ ដែលបានធ្វើឲ្យអ្នកគាំទ្រពេញកីឡដ្ឋានខកចិត្ត។ អ្វីដែលកាន់តែខកចិត្តខ្លាំងនោះ ខ្សែការពាររបស់ស្វាយរៀង ណុប តុលា បានបញ្ជូនបាល់ឲ្យចូលទីខ្លួនឯងនៅនាទីទី៥៥ដើម្បីបង្កើនទំនុកចិត្តក្នុងការនាំមុខ៣-១ សម្រាប់ក្រសួងការពារជាតិ។ ទោះជានាំមុខ៣-១ ហើយក៏ដោយ ក៏ក្រុមភ្ញៀវមិនបន្ធួរបន្ថយក្នុងការវាយសម្រុកចូលឡើយ ដោយ ខ្សែប្រយុទ្ធមកពីកូរ៉េខាងជើង Kyong Hun បានរកគ្រាប់បាល់២គ្រាប់ទៀតនៅនាទី៦៩ និង៩០។ ក្រុមម្ចាស់ផ្ទះបានវាយសម្រុកដែរ ប៉ុន្តែមិនអាចរកគ្រាប់បាល់បានបន្ថែមទៀត។ ចប់ការប្រកួត ក្រសួងការពារជាតិឈ្នះព្រះខ័នរាជស្វាយរៀង ៥-១។

លទ្ធផលនេះជាបរាជ័យលើកដំបូងសម្រាប់ក្រុមព្រះខ័នរាជស្វាយរៀង បន្ទាប់ពីការប្រកួតក្នុងលីគបាល់ទាត់កំពូលកម្ពុជារដូវកាល២០១៦ដែលឈានចូលដល់សប្តាហ៍ទី៦ ខណៈក្រសួងការពារបានឡើងទៅឈរលើកំពូលតារាងជាបណ្តោះអាសន្ន៕

អត្ថបទ៖ សុខ មុន្នីរម្យ