ហ្គេមមិនងាយផលិត ត្រូវការធាតុផ្សំ ៤ ទើបជោគជ័យ

2016-05-02 17:45:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ការផលិតហ្គេមមួយទទួលបានជោគជ័យ ពុំមែនជារឿងងាយស្រួលសម្រាប់អ្នកអភិវឌ្ឍកម្មវិធី (Developer)។ វាត្រូវឆ្លងកាត់ដំណាក់កាលធំៗ ៤ តាំងពីចាប់ផ្តើមផលិតរហូតដល់បញ្ចប់។

ម៉ាលិះ ដែលជាអ្នកឌីហ្សាញវ័យក្មេងនៅក្រុមផលិតហ្គេមលេចធ្លោក្នុងស្រុក DirexPlay បញ្ជាក់ថា សម្រាប់ក្រុមកញ្ញាត្រូវប្រើពេលដល់ទៅកន្លះឆ្នាំដើម្បីសម្រេចហ្គេមមួយ។ ផ្នែកសំខាន់ៗទាមទារសម្រាប់ការផលិតហ្គេមមាន ការសរសេរកូដ ការរចនាតួអង្គ (Character) និង ការរចនា Background ឬ Environment និងទីផ្សារ។

ចំពោះផ្នែក សរសេរកូដ ម៉ាលិះថា ត្រូវធ្វើការច្រើនជាងគេ។ អ្នកកាន់តួនាទីផ្នែកនេះ ត្រូវទទួលខុសត្រូវលើដំណើរការតាំងពីចាប់ផ្តើមផលិតដំបូងរហូតតទៅ។ ការសរសេរកូដនេះត្រូវធ្វើយ៉ាងណាឲ្យតួអង្គឬផ្នែកផ្សេងៗរបស់ហ្គេមដំណើរការតាមការចង់បាននិងរលូន កុំឲ្យមានការរំខាន (Error) ណាមួយកើតឡើងពេលកំពុងលេងហ្គេម។ ទោះបីពេលហ្គេមផលិតចប់ អ្នកសរសេរកូដនៅតែមានតួនាទីត្រួតពិនិត្យពីដំណើរការគ្រប់ផ្នែកនៃហ្គេមឲ្យបានញឹកញាប់ ដើម្បីតាមដានភាពមិនប្រក្រតីណាមួយកើតឡើង។

សម្រាប់ការរចនាតួអង្គនិង Background ត្រូវមានការស្រមើស្រមៃនិងមានភាពច្នៃប្រឌិតខ្ពស់ ដើម្បីអាចផលិតរូបភាព Background និងតួអង្គប្លែកៗនិងទាក់ទាញ។ យ៉ាងណា ម៉ាលិះថា សម្រាប់កញ្ញា ដែលមានតួនាទីផ្នែកឌីហ្សាញ ការរចនា Background រាងលំបាកបន្តិច ដោយត្រូវឌីហ្សាញយ៉ាងម៉េចឱ្យស៊ីគ្នាតួអង្គដែរ ទើបហ្គេមទាំងមូលមើលទៅគួរឱ្យចាប់អារម្មណ៍។

ផ្នែកទីផ្សារជាជំហានចុងក្រោយ សម្រាប់ក្រុមម៉ាលិះ។ ហ្គេមដែលផលិតរួចរាល់ ត្រូវមានការផ្សព្វផ្សាយលើទីផ្សារទាំងក្នុងនិងក្រៅស្រុក ដើម្បីទទួលការគាំទ្រនិងឈានដល់ការរកប្រាក់ចំណូលសម្រាប់ក្រុមទាំងមូល។

អ្នកឌីហ្សាញវ័យក្មេងរូបនេះថា កន្លងមកក្រុម DirexPlay ផ្តោតខ្លាំងលើទីផ្សារក្រៅប្រទេសដែលនាំឲ្យការគាំទ្រក្នុងស្រុកហាក់នៅរាងខ្សោយ តែសម្រាប់ហ្គេមរាប់តាំងពី Sok and Sao's Adventure និងហ្គេមក្រោយៗ ក្រុមកញ្ញានឹងព្យាយាមរចនាយ៉ាងណាឲ្យទាក់ទងនឹងអត្តសញ្ញាណខ្មែរ៕

អត្ថបទ៖ ប៉ែត ផាន់និត