វិធីសាស្ត្រគ្រប់គ្រងលុយ ៨យ៉ាង ធ្វើឲ្យមហាសេដ្ឋីកាន់តែមានខ្លាំង

2016-05-04 17:26:33
ចំនួនមតិ 0 | ចំនួនចែករំលែក 0

ចន្លោះមិនឃើញ

វាមិនមានអ្វីជារឿងសម្ងាត់ទេ ដែលមហាសេដ្ឋីសល់លុយចាយមិនអស់ក្នុងមួយជីវិតនោះ គ្រាន់តែពួកគេមានទម្លាប់ លក្ខណៈសម្បត្តិ និងការគិតខុសពីមនុស្សទូទៅ។ ទម្លាប់ទាំងអស់នោះ គឺជាការគ្រប់គ្រង់លុយបានត្រឹមត្រូវ ដែលធ្វើឲ្យចំណូល មានច្រើនជាងចំណាយ។

ខាងក្រោមនេះ ជាវិធីសាស្ត្រគ្រប់គ្រងលុយរបស់បណ្ដាមហាសេដ្ឋីជុំវិញពិភពលោក៖

១. គិតមិនតក់ក្រហល់

មុននឹងទិញអ្វីមួយ ពួកគេតែងតែគិតបានវែងឆ្ងាយ ស៊ីជម្រៅ ដោយគិតពីផលប្រយោជន៍ជាធំ និងធ្វើយ៉ាងណាឲ្យចំណាយអស់តិចបំផុត។

២. ស្គាល់ភាពខុសគ្នារវាងអ្វីចង់បាន និងតម្រូវការចាំបាច់

ក្រុមមហាសេដ្ឋីបានដឹងច្បាស់ណាស់រវាងអ្វីខ្លួនចង់បាន និងអ្វីជាតម្រូវការអត់ពុំបាន។ នៅពេលពួកគេសម្រេចទិញឡាន ផ្ទះ ស្បែកជើង ឬការិយាល័យ ពួកគេតែងតែសួរថាវាចាំបាច់ប៉ុនណា? មហាសេដ្ឋីល្បីៗ កម្រទិញសម្ភារៈប្រណិតថ្លៃណាស់ៗ តែចង់ឲ្យលុយបង្កើនទ្រព្យសម្បត្តិពួកគេប្រសើរជាង តាមរយៈការពង្រីកជំនួញ។

៣. មានប្រភពចំណូលច្រើន

បណ្ដាអ្នកមានទ្រព្យហូរហៀរ តែងតែសម្លឹងមើលផ្លូវផ្សេងទៀតដើម្បីរកចំណូលឲ្យកើនឡើង ពោលមិនពឹងអាស្រ័យតែរបរមួយមុខទេ ព្រោះគិតថាប្រភពចំណូលធំជាងគេ ថ្ងៃណាមួយអាចនឹងធ្លាក់ចុះ។

៤. រៀបចំប្រាក់ទុកសម្រាប់ភាពបន្ទាន់

ពួកគេបានដឹងថា ពេលណាមួយប្រាកដជានឹងជួបវិបត្តិ បាត់បង់ការងារ ឬសមាជិកគ្រួសារស្លាប់។ ជំនួសពីការខ្ចីប្រាក់គេ ពួកគេបានសន្សំទុករួចរាល់ចំពោះបញ្ហាអសកម្មទាំងនេះ។

៥. វិនិយោគតែអ្វីដែលខ្លួនស្គាល់ច្បាស់ និងទុកចិត្ត

មហាសេដ្ឋីពាន់លានដុល្លារលំដាប់ទី៣ លោក Warren Buffett តែងតែផ្ដល់ជាដំបូន្មានឲ្យអ្នកជំនួញថា "ត្រូវតែវិនិយោគអ្វី ដែលខ្លួនស្គាល់ច្បាស់" ព្រោះអាចដឹងពីការបង្កើតចំណូល និងប្រាក់ចំណេញ ថែមទាំងជួបហានិភ័យទាប។

៦. តាមដានការចំណាយ

គ្រប់គ្នាត្រូវតែក្ដាប់ឲ្យបានការចំណាយប្រចាំថ្ងៃ ប្រចាំខែ និងប្រចាំឆ្នាំរបស់ខ្លួន ជាពិសេសគួរធ្វើបញ្ជីមួយរៀបរាប់ថា បានចំណាយច្រើនជាងចំណូល ឬអត់?

៧. មានប្រឹក្សាយោបល់ផ្នែកហិរញ្ញវត្ថុ

មហាសេដ្ឋីបានស្គាល់ពីភាពខ្លាំង និងភាពខ្សោយរបស់ខ្លួនច្បាស់ ដូច្នេះមុនចំណាយធ្វើអ្វីមួយដែលខ្លួនមិនសូវបានស្គាល់ស៊ីជម្រៅ ពួកគេតែងតែត្រូវការប្រឹក្សាជាចាំបាច់ ចៀសវាងការចំណាយលើផ្លូវខុស។

៨. បង្រៀនខ្លួនឯង

មហាសេដ្ឋីជាច្រើននាក់ មិនធ្លាប់ចូលរៀនថ្នាក់មហាវិទ្យាល័យ ដូចជាស្ថាបនិក Microsoft លោក Bill Gates និងស្ថាបនិក Facebook លោក Mark Zuckerberg តែពួកគេបង្រៀនខ្លួនឯង និងយកសៀវភៅធ្វើជាគ្រូ៕