គន្លឹះស្វែងយល់ ពីផ្លូវចិត្តម្តាយ

2016-05-05 21:09:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ទិវាអ្នកម្តាយកំពុងខិតជិតមកដល់ហើយ គឺនៅថ្ងៃអាទិត្យ ទី៨ ខែឧសភា នេះជាឱកាសដែលកូនៗ មិនគួរមើលរំលង ក្នុងការបង្ហាញការយកចិត្តទុកដាក់ កតញ្ញុតា ចំពោះអ្នកម្ដាយដែលមានគុណបីបាច់ថែរក្សាខ្លួនតាំងពីតូចក្រូចឆ្មារមករហូតដល់ធំពេញវ័យ ។

យើងសង្កេតឃើញថា ម្ដាយកាន់តែចម្រើនវ័យ ភាគច្រើនផ្លូវចិត្តក៏កាន់តែស្មុគស្មាញ ពិបាកតម្រូវចិត្ត ឬ ពាក្យសាមញ្ញដែលគេនិយមនិយាយ គឺ «ចិត្តច្រើន» ។ អញ្ចឹងតើកូនៗគួរស្វែងយល់ពីផ្លូវចិត្តអ្នកម្ដាយរបស់ខ្លួនដោយរបៀបណាខ្លះ ដើម្បីធ្វើឲ្យលោកសប្បាយចិត្ត ធូរស្រាលអារម្មណ៍ និងមានសុខភាពល្អ?

អ្នករាយការណ៍ព័ត៌មាន SABAY បានសម្ភាសន៍ជាមួយ លោក ឃីម សុខហេង នាយកវិទ្យាស្ថានសិក្សាដើម្បីជោគជ័យ និង ជាអ្នកជំនាញម្នាក់ក្នុងវិស័យបណ្ដុះបណ្ដាលធនធានមនុស្ស ជុំវិញបញ្ហាថា “តើកូនគួរស្វែងយល់ពីផ្លូវចិត្តអ្នកម្ដាយដោយរបៀបណា? ” ៖

សំណួរ ១៖ ជាដំបូងសូមលោកពន្យល់ តើដូចម្ដេចជាការស្វែងយល់ផ្លូវចិត្តអ្នកម្ដាយ? ចម្លើយ ៖ ការស្វែងយល់ផ្លូវចិត្តអ្នកម្ដាយ គឺជាការចង់ដឹង ចង់យល់ពីជម្រៅចិត្តអ្នកម្តាយ ថាតើអ្នកម្តាយសុខទុក្ខយ៉ាងណា តូចចិត្តឬអត់ មានអារម្មណ៍ឯកកោរ រីករាយ កក់ក្តៅក្នុងចិត្តទេ? ។ល។

សំណួរ ២៖ លោកយល់ថា ផ្លូវចិត្តម្ដាយ ងាយស្រួល ឬពិបាកស្វែងយល់សម្រាប់កូនៗ ? ហេតុអ្វី ?

ចម្លើយ ៖ ផ្លូវចិត្តម្ដាយងាយស្រួលស្វែងយល់សម្រាប់កូន ពីព្រោះអ្នកម្ដាយជាទូទៅតែងតែមានមនោសញ្ចេតនាជ្រាលជ្រៅចំពោះកូនៗ ហើយអ្នកម្ដាយបានប្រាស្រ័យទាក់ទងជាមួយកូនតាមពាក្យសម្ដី និងកាយវិការ ដើម្បីបង្ហាញពីអារម្មណ៍ និងទឹកចិត្តរបស់គាត់ ។

សំណួរ ៣៖ តើហេតុអ្វី កូនត្រូវចំណាយពេលស្វែងយល់ពីផ្លូវអ្នកម្ដាយ? ចម្លើយ ៖ ដើម្បីបង្កើតសេចក្ដីសុខ សុភមង្គលក្នុងជីវិតនិងគ្រួសារ តាមរយៈការបំពេញតម្រូវការផ្លូវចិត្តរបស់អ្នកម្ដាយ ហើយអ្នកម្ដាយត្រូវការការយល់ចិត្តពីកូនៗ ។ ការយកចិត្តទុកដាក់របស់កូនចំពោះអ្នកម្ដាយ គឺពិតជាសំខាន់បំផុតដែលមិនអាចកាត់ថ្លៃបាន ព្រោះថាគ្មានអ្នកម្ដាយ គឺកូនៗមិនអាចមើលពិភពលោកឃើញនោះទេ។

សំណួរ ៤៖ តើត្រូវស្វែងយល់ទឹកចិត្តអ្នកម្ដាយដោយរបៀបណា? ចម្លើយ ៖ ក-បើសិនជាគាត់បើកចិត្ត កូនៗអាចសុំសួរគាត់ តើកូនគួរធ្វើដូចម្ដេចដើម្បីឲ្យអ្នកម្ដាយសប្បាយចិត្ត ស្ដាប់ហើយកូនចាប់ផ្ដើមដាក់អាទិភាពចំណុចណាគួរធ្វើមុន ហើយចំណុចណាបន្ទាប់។ ខ-បង្កើតភាពស្និតស្នាល លេងសើចសប្បាយ សង្កេតយកចំណុចដែលអ្នកម្តាយចូលចិត្ត រួចធ្វើរឿងនោះឲ្យបានច្រើនដងជារឿយៗ គ-កូនស្វែងយល់ចិត្តអ្នកម្ដាយ តាមរយៈការសាកសួរមនុស្សដែលអ្នកម្តាយស្និទ្ធស្នាលជាមួយ ព្រោះគាត់តែងតែជជែកប្រាប់នូវពាក្យក្នុងចិត្ត។

ៈ

សំណួរ ៥ ៖ តើកូនៗគួរធ្វើអ្វីខ្លះចំពោះអ្នកម្ដាយ ក្នុងឱកាសទិវាអ្នកម្ដាយនេះ ? ចម្លើយ ៖ អ្វីដែលកូនៗគួរធ្វើចំពោះ អ្នកម្ដាយ ក្នុងឱកាសទិវាអ្នកម្ដាយនេះ គឺ -ថ្វាយបង្គំគាត់ ឱបគាត់ -ពោលពាក្យដឹងគុណ គោរព ស្រឡាញ់ -រៀបចំម្ហូបអាហារជូនគាត់ -នាំគាត់ដើរកម្សាន្ត ធ្វើបុណ្យ ដាក់ទាន -សន្យាជាមួយគាត់ធ្វើកូនល្អ ខំរៀន មានការងារល្អ លើកស្ទួយគ្រួសារ ។ល។ សំណួរ ៦៖ តើលោកមានពាក្យពេចន៍អ្វីចង់ផ្តាំផ្ញើទៅកាន់មិត្តអ្នកអាន ជុំវិញបញ្ហានេះ?

ចម្លើយ ៖ សូមកូនៗស្វែងយល់ចិត្តអ្នកម្ដាយឲ្យបានល្អ ធ្វើឲ្យអ្នកម្តាយសប្បាយចិត្ត តាមពាក្យសម្ដី កាយវិការរបស់កូន ពិសេសគឺផ្តល់ភាពសំខាន់ដល់អ្នកម្ដាយ អ្នកម្តាយសំខាន់ណាស់សម្រាប់ជីវិតនិងអនាគតកូន ចូរកូនៗគួរចងចាំថា អ្នកម្ដាយនេះហើយជាអ្នកផ្តើមជីវិតកូន មានអ្នកម្ដាយគឺមានភ្នំនៃក្តីស្រឡាញ់សម្រាប់បាំងព្យុះនៃសេចក្ដីភ័យខ្លាចរបស់កូន កូនមានភាពកក់ក្តៅពេលនៅជាមួយអ្នកម្តាយ ៕

អត្ថបទ៖ លីដា រូបថត៖ ផ្ដល់ឲ្យ