តារា​ចម្រៀង​ល្បី​ឈ្មោះ​របស់​ផលិតកម្ម​ហង្សមាស កញ្ញា ឱក សុគន្ធ​កញ្ញា បាន​ទទួល​ការ​រិះគន់​ធ្ងន់​ៗ​ពី​សំណាក់​ទស្សនិកជន​បន្ទាប់​ពី​កញ្ញា បាន​សម្រេច​ជ្រើស​រើស​បេក្ខជន វង្ស ដា​រ៉ា​រតនា ឲ្យ​ជាប់​ទៅ​វគ្គ​បន្ត ហើយ​ទម្លាក់​បេក្ខនារី ស៊ូ ស៊ីរីកា ពី​កម្មវិធី​ប្រឡង​ចម្រៀង “The Voice Cambodia” ក្នុង​វគ្គ "Live Show" កាលពី​យប់​មិញ​នេះ ។

"តារា​ចម្រៀង​ពុក​រលួយ បក្ស​ពួក​និយម គឺ​ឱក សុគន្ធ​កញ្ញា The Voice ល្មម​ដូរ Coach ម្នាក់​នេះ​ចេញ​ទៅ"។ នេះ​សារ​របស់​ប្រិយមិត្ត​ម្នាក់​នៅ​លើ​បណ្ដាញ​សង្គម ដែល​បាន​​សរសេរ​រិះ​គន់ Coach សុគន្ធ​កញ្ញា។ ការ​រិះគន់​នេះ ដោយ​សារ​គេ​ដឹង​ថា កញ្ញា ឱក សុគន្ធ​កញ្ញា ស្គាល់​គ្នា​ជាមួយ​​បេក្ខជន វង្ស ដារ៉ារតនា ដែល​ជា​តារា​ចម្រៀង​នៅ​ក្លឹប Jet'S STUDIO។

ប្រិយមិត្ត​ដដែល​នេះ នៅ​បាន​បន្ថែម​ទៀត​ថា ចាប់​ពី​ពេល​នេះ​តទៅ រូប​គេ​ឈប់​គាំទ្រ​តារា​ចម្រៀង​រូប​នេះ​ទៀត​ផង។ ជា​បន្ទរ​ជាមួយ​គ្នា​នេះ ប្រិយមិត្ត​លើ​បណ្ដាញ​សង្គម​ផ្សេង​ទៀត ក៏​បាន​សរសេរ​សារ​គាំទ្រ​បេក្ខនារី ស៊ូ ស៊ីរីកា ដែល​បាន​ធ្លាក់​ចេញ​ពី​កម្មវិធី The-Voice-Cambodia ត្រឹម​យប់​មិញ ថា​ស័ក្ដិសម​ជា​អ្នក​ជាប់​ទៀត​ផង។

ប្រិយមិត្ត​ប្រើ​គណនី​ឈ្មោះ Tata "តែ​មើល​ទៅ​គាត់​ពិត​ជា​មាន​ភាព​លំអៀង​មែន ង៉ៃ​នោះ​បង​មើល​ជា​១​ម៉ាក់​បង ម៉ាក់​បង​គ្រាន់​តែ​ឃើញ​រឹក​ពារ​កញ្ញា​គាត់​ដឹង​ភ្លាម​ថា​ម្នាក់​នឹង​គឺ​មិន​ជាប់​នឹង​គេ​បោះឆ្នោត​ទេ តែ​គឺ​ជាប់​នឹង​នាង​ជ្រើស​រើស100% ចុង​ក្រោយ​គឺ​ម៉ាក់​បង​អាច​ដាក់​កំប៉ុង​ជើង​ធូប​ទាយ​បាន"។

យ៉ាង​ណា​ក៏​ដោយ សិទ្ធិ​ជា Coach ឱក សុគន្ធ​កញ្ញា បាន​រើស​បេក្ខជន វង្ស ដារ៉ា​​រតនា ជា​អ្នក​បន្ត​ទៅ​វគ្គ Live Show នៅ​សប្ដាហ៍​ក្រោយ​ទៀត។ ពាក់​ព័ន្ធ​នឹង​បញ្ហា​នេះ តារា​ចម្រៀង សុគន្ធ​កញ្ញា មិន​អាច​ទាក់​ទង​សុំ​ការ​អធិប្បាយ​បាន​ទេ​រសៀល​នេះ ដោយ​សារ​នាង​មិន​លើក​ទូរសព្ទ។

វិល​មក​លោក អ៊ិន ទីតូ ជា​អ្នក​រៀប​ចំ​កម្មវិធី​វិញ​ថ្លែង​ថា បញ្ហា​នេះ​ជា​រឿង​ចៀស​មិន​រួច ព្រោះ​ថា​បុគ្គល​ម្នាក់​មាន​អ្នក​ស្អប់​មាន​អ្នក​ស្រឡាញ់។ លោក​ថា លោក​គោរព​ការ​សម្រេច​ចិត្ត​របស់ Coach របស់ សុគន្ធ​កញ្ញា។ " ខ្ញុំ​គោរព​ការ​សម្រេច​ចិត្ត​របស់​គាត់ ធម្មតា Coach គាត់​មាន​លក្ខខណ្ឌ​របស់​គាត់​ក្នុង​ការ​ជ្រើស​រើស​បេក្ខជន​ណា​ម្នាក់។ រឿង​គេ​ថា គាត់​ស្គាល់​គ្នា​ជាមួយ​បេក្ខជន បើ​តាម​ខ្ញុំ​មើល គឺ​គាត់​ស្គាល់​សឹង​តែ​គ្រប់​គ្នា​ហ្នឹង...អីចឹង​ធម្មតា​ទេ ចៀស​មិន​ផុត​ពី​ការ​រិះគន់​ឡើយ តែ​ខ្ញុំ​ចង់​ឲ្យ​ប្រិយមិត្ត​ប្រៀប​ធៀប​សំឡេង​គ្នា​វិញ ព្រោះ​កម្មវិធី​យើង​ធ្វើ​ផ្ដោត​លើ​សំឡេង...! "។

វគ្គ Live Show បាន​ឈាន​មកដល់​សប្តាហ៍​ទី​៣​ត្រឹម​យប់​មិញ​នេះ។ កូនក្រុម​របស់ Coach សុគន្ធ​កញ្ញា មាន​៤ រូប ១-​បេក្ខជន ឃុន វុត្ថា ច្រៀង​បទ “​ប្រុស​ណា​មិន​យំ ២.បេក្ខជន លី សុខ​ណេ​ត ច្រៀង​បទ “​សង្សារ​ជាតា​រា​” ជាប់​ទៅ​វគ្គ​បន្ត ដោយ​ការ Vote តាម​ទូរស័ព្ទ​។

ដូច្នេះ​នៅ​សល់ បេក្ខជន វង្ស ដា​រ៉ា​រតនា ច្រៀង​បទ “​ស្មោះ​ប៉ុណ្ណឹង​មិន​ល្មម​” និង​បេ​ក្ខ​នារី ស៊ូ ស៊ី​រី​កា ច្រៀង​បទ Heart Breaker រង់​ចាំ​ការ​សម្រេច​ចិត្ត​របស់​សុគន្ធ​កញ្ញា ដែល​ចុង​ក្រោយ Coach រូប​នេះ បាន​រើស​បេក្ខជន វង្ស ដារ៉ា​រតនា ហើយ បេក្ខនារី ស៊ូ ស៊ីរីកា ​ត្រូវ​អស់​សិទ្ធិ​បន្ត​ក្នុង The Voice Cambodia ឆ្នាំ​ទី​១​ត្រឹម​យប់មិញ​នេះ៕

ផ្សេង​ៗ​ទៀត​ពី​ឱក សុគន្ធ​កញ្ញា មាន​នៅ​ទី​នេះ...!!!

អត្ថបទ​ផ្សេង​ៗ​ស្ដី​ពី​សកម្មភាព​តារា​ជាតិ សូម​ចុច​ទី​នេះ…!!!

អត្ថបទ​ផ្សេង​ៗ​ជុំ​វិញ​តារាជាតិ​ ​មាន​នៅ​ទី​នេះ…!!!

តោះ​ស្ដាប់​បេក្ខជន វង្ស តារា​រតនា និង​បេក្ខនារី ស៊ូ ស៊ីរីកា ប្រៀប​ធៀប​គ្នា​មើល៍...!!!

http://youtu.be/aK5Dfvcgwl4

http://youtu.be/wlnl-dqhpCc

អត្ថបទ៖ ទារិកា