៥ប្រភេទកីឡា បង្ហាញខ្លួនក្នុងចលនាអូឡាំពិកលើកទី១ នៅកម្ពុជាម្សិលមិញ
- 2016-05-24 17:04:11
- ចំនួនមតិ 0 | ចំនួនចែករំលែក 0
៥ប្រភេទកីឡា បង្ហាញខ្លួនក្នុងចលនាអូឡាំពិកលើកទី១ នៅកម្ពុជាម្សិលមិញ
ចន្លោះមិនឃើញ
កម្មវិធី «ចលនាកីឡាអូឡាំពិកកម្ពុជា»ត្រូវបានបង្កើតឡើងដោយគណៈកម្មាធិការជាតិអូឡាំពិកកម្ពុជា ដោយជ្រើសរើសយកប្រភេទកីឡាចំនួន ៥ដាក់ឲ្យសិស្សក្នុងវិទ្យាល័យបាក់ទូកធ្វើការប្រកួតកាលពីម្សិលមិញ។
លោក ម៉ៃ សំអាត (ស្ដាំ)
លោក ម៉ៃ សំអាត អ្នកតំណាងក្រុមអប់រំបណ្ឌិតសភាអូឡាំពិក នៃគណៈកម្មាធិការជាតិអូឡាំពិកកម្ពុជាបានឲ្យដឹងថា ព្រឹត្តិការណ៍ចលនាកីឡាអូឡាំពិកកម្ពុជាទើបតែបង្កើតឡើងជាលើកទី១ ប៉ុណ្ណោះ។ កម្មវិធីនេះបង្កើតឡើងដោយក្រុមហ៊ុនកូកាកូឡា សហការគ្នាជាមួយ NOCC។
អ្នកតំណាងរូបនេះបន្តថា ព្រឹត្តិការណ៍នេះបានជ្រើសរើសយកប្រភេទកីឡាចំនួន ៥ដាក់ឲ្យសិស្សនៅតាមសាលាចំនួន ៤ធ្វើការប្រកួតប្រជែង។ ប៉ុន្តែចំណុចចាប់ផ្ដើមដំបូងគេនេះគឺ យកវិទ្យាល័យបាក់ទូកឲ្យប្រកួតមុនគេ។
លោកបន្ថែមថា ៥ប្រភេទកីឡារួមមាន អត្តពលកម្ម, បាល់ទាត់, បាល់ទះ, កាយសម្ព័ន្ធ និងល្បុក្កតោ។ ចំណែក ៣វិទ្យាល័យផ្សេងទៀត ដែលនឹងរៀបចំព្រឹត្តិការណ៍ខាងលើនេះបន្តទៀតគឺមាន វិទ្យាល័យព្រះស៊ីសុវត្ថិ, វិទ្យាល័យឥន្ទ្រទេវី និងវិទ្យាល័យជម្ពូវ័ន្ត។
សំអាត បញ្ជាក់ទៀតថា បានជាកំណត់យកតែ ៥ប្រភេទកីឡាខាងលើដោយសារ NOCC សម្រេចយកតែប្រភេទកីឡាណា ដែលមានប្រជាប្រិយភាព។ ចំពោះគោលបំណងចង់ផ្ដល់ឱកាសឲ្យយុវជនកម្ពុជាងាកមកលេងកីឡា មិនគិតទៅលើផ្លូវខុសផ្សេងៗ ដូចជាគ្រឿងញៀនជាដើម។
បន្ទាប់ពីប្រមូលបានជើងខ្លាំងប្រចាំសាលាទាំង ៤ខាងលើរួចរាល់ហើយ គ្រប់កីឡាករដែលជាជើងខ្លាំងទាំងអស់ នឹងប្រកួតគ្នានាវគ្គផ្ដាច់ព្រ័ត្រនៅពហុកីឡដ្ឋានជាតិអូឡាំពិកថ្ងៃទី១៧ ខែកក្កដា ឆ្នាំ២០១៦ខាងមុខនេះ៕
អត្ថបទ៖ ស្រី សុវណ្ណដារ៉ា រូបថត៖ NOCC