Messi ឡើងតុលាការនៅទីក្រុង Barcelona ម្សិលមិញ

2016-06-01 16:46:49
ចំនួនមតិ 0 | ចំនួនចែករំលែក 0

ចន្លោះមិនឃើញ

Lionel Messi ប្រធានក្រុមជម្រើសជាតិអាហ្សង់ទីន បានឡើងតុលាការជាមួយឪពុករបស់ខ្លួន នៅទីក្រុង Barcelona ប្រទេសអេស្ប៉ាញ កាលពីថ្ងៃអង្គារម្សិលមិញ ដើម្បីបកស្រាយបំភ្លឺរឿងគេចពន្ធ។

Lionel Messi (អាវខ្មៅ)

លោក Jorge Horacio Messi ឪពុករបស់ Messi

Messi និងឪពុក Jorge Horacio Messi ត្រូវបានមន្ត្រីពន្ធដារប្រទេសអេស្ប៉ាញ ចោទប្រកាន់កាលពីឆ្នាំ២០១៣ថា ពួកគេទាំងពីរបានគេចពន្ធចំនួនសាច់ប្រាក់ ៣,២លានផោន (៤,៦៤លានដុល្លារ) នៅចន្លោះឆ្នាំ ២០០៧-២០០៩ ទាក់ទងទៅនឹងសិទ្ធិរូបថត ដែលក្រុមហ៊ុនមួយចំនួន បានប្រើប្រាស់នៅប្រទេសអ៊ុយរុយហ្គាយ បេលីហ្ស ស្វីស និងប្រទេសអង់គ្លេស។ បើតាមព្រះរាជអាជ្ញាអេស្ប៉ាញ បានឲ្យដឹងថា ករណីខាងលើនេះ Messi និងឪពុក ប្រឈមនឹងការជាប់ពន្ធនាគារដល់ទៅរយៈពេល២២ខែ។

មេធាវី Enrique Bacigalupo របស់ Messi

យ៉ាងណាក្ដី ខ្សែប្រយុទ្ធឆ្នើមក្រុម Barcelona រូបនេះ បានបដិសេធជាច្រើនដងមកហើយ ថាខ្លួនពិតជាមិនបានដឹងពីរឿងពន្ធនោះទេ ខណៈដែលការឡើងតុលាការលើកនេះ ក៏រូបគេនិងឪពុក រួមទាំងមេធាវីលោក Enrique Bacigalupo នៅតែតាំងជំហរតវ៉ាទៀតផងដែរ។

ដោយសារត្រូវឡើងតុលាការ បានធ្វើឲ្យ Messi បានខកខានការត្រៀមខ្លួនរបស់ក្រុមជម្រើសជាតិអាហ្សង់ទីន សម្រាប់ការប្រកួតពានរង្វាន់ Copa America Centenario ដែលនឹងត្រូវចាប់ផ្ដើមនៅថ្ងៃសៅរ៍ចុងសប្ដាហ៍នេះ នៅសហរដ្ឋអាមេរិក។ ប៉ុន្តែម្ចាស់ពាន Ballon d'Or ៥សម័យកាលរូបនេះ នឹងឡើងយន្តហោះទៅអាមេរិកតែម្ដង ដើម្បីជួយជម្រើសជាតិ ពេលតុលាការកាត់ក្ដីចប់៕

ប្រែសម្រួល៖ វិន ជីវ័ន្ត ប្រភព៖ dailymail