ស្វាយរៀង ទម្លាក់ បឹងកេត ពី Hun Sen Cup ខណៈ ក្រោន, ទ័ព និង ស៊ីម៉ាក់ ឡើងវគ្គ១/២

2016-06-23 00:25:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមខ្លាំង ព្រះខ័នរាជស្វាយរៀងបានទម្លាក់ក្រុមខ្លាំងបឹងកេតអង្គរពីពាន Hun Sen Cup ត្រឹមវគ្គ៨ក្រុមចុងក្រោយដើម្បីឡើងវគ្គពាក់កណ្តាលផ្តាច់ព្រ័ត្រ បន្ទាប់ពីបានយកឈ្នះដោយលទ្ធផល ២-១ នារសៀលថ្ងៃនេះនៅស្តាតចាស់។ ចំពោះក្រុមភ្នំពេញក្រោន ក្រសួងការពារជាតិ និងស៊ីម៉ាក់ក៏បានឡើងវគ្គពាក់កណ្តាលផ្តាច់ព្រ័ត្រដូចព្រះខ័នរាជស្វាយរៀងដែរ។

ក្រុមព្រះខ័នរាជស្វាយរៀង

ជំនួបដ៏សំខាន់ដែលទទួលបានការចាប់អារម្មណ៍ខ្លាំងពី អ្នកគាំទ្រ ក្រុមទាំងពីរបានបង្កើតការសម្រុកគ្នាទៅវិញទៅមក ប៉ុន្តែព្រះខ័នរាជស្វាយរៀងមានឱកាសល្អច្រើនជាងក្នុងទីមួយ។ ខ្សែប្រយុទ្ធឆ្នើមលេខ៧ ប្រាក់ មុន្នីឧត្តម បានទម្លាយសំណាញ់ទីរបស់បឹងកេតអង្គរនៅនាទី៣៩ដើម្បីបញ្ចប់តង់ទី មួយ ១-០។ ចូលតង់ទីពីរបានតែប៉ុន្មាននាទី ទៀប វឌ្ឍនៈ ស៊ុតឲ្យបឹងកេតអង្គរ តាមស្មើ ១-១ នៅនាទីទី៤៧ ប៉ុន្តែ សារ៉េត គ្រីយ៉ា បានបញ្ចប់ក្តីសង្ឃឹមរបស់បឹងកេតអង្គរក្នុងការឡើងវគ្គបន្ត។ ចប់ការប្រកួត ព្រះខ័នរាជស្វាយរៀង ឈ្នះ បឹងកេតអង្គរ ២-១។

ការប្រកួតនៅម៉ោងដំណាលគ្នានេះដែរ ក្រុមក្រសួងការពារជាតិបានយកឈ្នះខេមបូឌានថាយហ្គឺរ ដោយលទ្ធផល ៤-០នៅកីឡដ្ឋាន RSN។ តង់ទីមួយ ការពារជាតិបានទម្លាយសំណាញ់ទីរបស់ ខេមបូឌានថាយហ្គឺរ ៣គ្រាប់ដោយកីឡាករ ច្រឹង ពលរដ្ឋ និង រ៉ឹង ប៊ុនហៀង ហើយ១គ្រាប់ទៀតជាការចូលទីខ្លួនឯងរបស់ Cambodian Tiger។ ការប្រកួតនៅតង់ទីពីរ ក្រសួងការពារជាតិរកបាន១គ្រាប់ទៀតដោយ ពៅ ភារិទ្ធ។ ការប្រកួតនេះ រ៉ឹង ប៊ុនហៀង រងរបួសត្រូវបានបញ្ជូនទៅមន្ទីរពេទ្យ ខណៈអ្នកចាំទី សំរឹទ្ធ សីហា ទទួលបានកាតក្រហម។

ក្រុមបឹងកេតអង្គរ

ចំណែកការប្រកួតនៅពហុកីឡដ្ឋានជាតិ ក្រុមខ្លាំងភ្នំពេញក្រោនយកឈ្នះក្រុមខេត្តសៀមរាបអង្គរដោយលទ្ធផល ៤-០ដើម្បីឡើងវគ្គពាក់កណ្តាលផ្តាច់ព្រ័ត្រ។ តង់ទីមួយ ភ្នំពេញក្រោន រកបាន៣គ្រាប់ដោយ អ៊ិន សុដាវិត, កែវ សុខផេង និង កែវ សុខង៉ន។ សម្រាប់តង់ទីពីរ ភ្នំពេញក្រោន បានបន្ថែម១គ្រាប់ទៀតដោយ ពៅ ពន់វុទ្ធី។

មួយគូទៀត មជ្ឈមណ្ឌលកម្ចាត់មីនកម្ពុជា (ស៊ីម៉ាក់) ឈ្នះ ណាហ្គាវើល ២-១ វេលាម៉ោង៦ល្ងាចនៅពហុកីឡដ្ឋានជាតិ។

វគ្គពាក់កណ្តាលផ្តាច់ព្រ័ត្រ ថ្ងៃទី២៩ មិថុនា ២០១៦ ព្រះខ័នរាជស្វាយរៀង vs ភ្នំពេញក្រោន ក្រសួងការពារជាតិ vs ស៊ីម៉ាក់