Bale ថាសុខចិត្តអត់ស្បែកជើងមាស ឲ្យតែវែលឈ្នះពាន Euro 2016
- 2016-06-25 22:46:44
- ចំនួនមតិ 0 | ចំនួនចែករំលែក 0
Bale ថាសុខចិត្តអត់ស្បែកជើងមាស ឲ្យតែវែលឈ្នះពាន Euro 2016
ចន្លោះមិនឃើញ
Gareth Bale ខ្សែបម្រើជម្រើសជាតិវែល ជាបេក្ខភាពម្នាក់ ដែលអាចឈ្នះស្បែកជើងមាសនៅ Euro 2016 បន្ទាប់ពីស៊ុត៣គ្រាប់ ក្នុង៣ប្រកួតក្នុងពូល។ ប៉ុន្តែតារាឆ្នើមក្រុម Real Madrid បានលើកឡើងថា ខ្លួនសុខចិត្តនៅត្រឹម៣គ្រាប់ប៉ុណ្ណឹង អត់ស្បែកជើងមាសក៏បាន បើក្រុមជម្រើសជាតិវែល អាចឈ្នះពានកំពូលអឺរ៉ុបនេះ។
Gareth Bale ខ្សែបម្រើជម្រើសជាតិវែល
Bale ជាអ្នកស៊ុតបញ្ចូលទីច្រើនជាងគេនៅ Euro 2016 បណ្ដោះអាសន្ន ដោយស៊ុតបាន៣គ្រាប់ ស្មើខ្សែប្រយុទ្ធ Alvaro Morata របស់អេស្ប៉ាញ និងលើមិត្តរួមក្លឹបស្ដេចស Cristiano Ronaldo ចំនួន១គ្រាប់។
កីឡាករវ័យ២៦ឆ្នាំ បាននិយាយថា៖ "ខ្ញុំមិនដែលមើលបញ្ជីឈ្មោះអ្នកស៊ុតចូលទីច្រើនជាងគេទេ។ មានគេប្រាប់ខ្ញុំថា ខ្ញុំជាអ្នកស៊ុតចូលទីច្រើនជាងគេ ប៉ុន្តែវាមិនសំខាន់ឡើយ។ បើយើងអាចឈ្នះ ១-០ គ្រប់ប្រកួត និងឈ្នះពានរង្វាន់ ហើយខ្ញុំរកគ្រាប់មិនបាន ក៏ខ្ញុំមិនខ្វល់។ ខ្ញុំគ្រាន់តែចង់ឈ្នះ ទោះវាជាគ្រាប់បាល់ចូលទីខ្លួនឯង ឬអ្នកផ្សេងស៊ុតចូលក៏បាន”។
“កីឡាករផ្សេង អាចគិតថាវាជារឿងសំខាន់ ប៉ុន្តែសម្រាប់ខ្ញុំមិនសំខាន់ទេ។ ការពិត ខ្ញុំតែងចង់ស៊ុតឲ្យបានច្រើនគ្រាប់ ព្រោះវាអាចជួយក្រុម និងធ្វើឲ្យយើងឈ្នះការប្រកួត។ នេះជាមូលហេតុ ដែលខ្ញុំចង់រកគ្រាប់ឲ្យបាន ហើយមិនមែនខ្ញុំចង់បានពានរង្វាន់ផ្ទាល់ខ្លួននោះទេ”។
វែល នឹងត្រូវប៉ះក្រុមអៀរឡង់ខាងជើង នាកីឡដ្ឋាន Parc des Princes ទីក្រុងប៉ារីស ក្នុងការប្រកួត Euro 2016 វគ្គ១៦ក្រុមចុងក្រោយ នាវេលាម៉ោង១១:០០យប់នេះ ដើម្បីកាត់ក្ដីរកក្រុម១ ឡើងទៅវគ្គ៨ក្រុមចុងក្រោយជាបន្ត៕
ប្រែសម្រួល៖ វិន ជីវ័ន្ត ប្រភព៖ dailymail