សាណូហ្វី កម្ពុជា រៀបចំកម្មវិធី "ម្តាយរបស់ខ្ញុំ កូនរបស់ខ្ញុំ" លើកទី២ អំពីការចិញ្ចឹមកូនឲ្យមានសុខភាពឆ្អឹងរឹងមាំ
- 2016-06-27 22:16:27
- ចំនួនមតិ 0 | ចំនួនចែករំលែក 0
សាណូហ្វី កម្ពុជា រៀបចំកម្មវិធី "ម្តាយរបស់ខ្ញុំ កូនរបស់ខ្ញុំ" លើកទី២ អំពីការចិញ្ចឹមកូនឲ្យមានសុខភាពឆ្អឹងរឹងមាំ
ចន្លោះមិនឃើញ
កាលពីថ្ងៃអាទិត្យ ម្សិលមិញនេះ ឪពុកម្តាយប្រមាណ ៣០០នាក់បានចូលរួមក្នុងកម្មវិធីមួយដែលរៀបចំឡើងដោយក្រុមហ៊ុន សាណូហ្វីកម្ពុជា។ នេះជាលើកទី២ហើយសម្រាប់កម្មវិធី "ម្តាយរបស់ខ្ញុំ កូនរបស់ខ្ញុំ ឬ My Mom, My Kid" ដែលជាកម្មវិធីអប់រំផ្នែកអាហារូបត្ថម្ភ និងសារធាតុបំប៉ននានាទាក់ទងនឹងការចិញ្ចឹមបីបាច់ថែរក្សាកូនឲ្យមានសុខភាពឆ្អឹងរឹងមាំ ជាពិសេសគឺតម្រូវការជីវជាតិកាល់ស្យូម។
កម្មវិធីអប់រំផ្នែកអាហារូបត្ថម្ភនេះ ធ្វើឡើងនៅមជ្ឈមណ្ឌលកម្សាន្តកុមារ Kids City ដោយមានកម្មវិធីកម្សាន្តផ្សេងៗសម្រាប់កុមារ និងកម្មវិធីសំណួរចម្លើយអំពីការចិញ្ចឹមបីបាច់ថែរក្សាកូន ជាមួយអ្នកឯកទេសផ្នែកអាហារូបត្ថម្ភ។ ឪពុកម្តាយដែលចូលរួមបានស្វែងយល់កាន់តែច្បាស់ពីអត្ថប្រយោជន៍ និងភាពចាំបាច់ក្នុងការផ្ដល់នូវអាហារដែលមានសារធាតុសំខាន់គ្រប់គ្រាន់ជាពិសេសសារធាតុកាល់ស្យូមដែលមានតួនាទីសំខាន់ក្នុងការលូតលាស់ឆ្អឹងរបស់កូនៗតាំងពីការចាប់កំណើតរហូតដល់១០០០ថ្ងៃដំបូងនៃជីវិត។
អ្នកស្រី ម៉ីញ នាយកគ្រប់គ្រងក្រុមហ៊ុនសាណូហ្វីកម្ពុជា ថ្លែងថា៖ "សាណូហ្វីកម្ពុជាដែលជាសាខានៃក្រុមហ៊ុនថែទាំសុខភាពសាកល បានយកចិត្តទុកដាក់យ៉ាងខ្ពស់លើអតិថិជន បុគ្គលិក និងជាពិសេសនោះប្រជាជនដែលពឹងផ្អែកលើឱសថជាប្រចាំ។ ជាក់ស្តែង ការរៀបចំកម្មវិធី "ម្តាយរបស់ខ្ញុំ កូនរបស់ខ្ញុំ" លើកទី២នេះ គឺដើម្បីចែករំលែកចំណេះដឹងដល់មាតាបិតាអំពីសារៈសំខាន់នៃជីវជាតិកាល់ស្យូមចំពោះការលូតលាស់របស់បុត្រធីតាពួកគាត់ និងដឹងអំពីវិធីសាស្ត្រក្នុងការជ្រើសរើសអាហារូបត្ថម្ភ និងសារធាតុបំប៉នដែលត្រឹមត្រូវ"។
អ្នកម្តាយមួយរូបដែលមានកូនប្រុសម្នាក់អាយុ១០ខែ ដែលចូលរួមក្នុងកម្មវិធីខាងលើ បានលើកឡើងថា៖ "នេះជាលើកទី១ហើយដែលខ្ញុំចូលរួមកម្មវិធីអប់រំអំពីចំណេះដឹងសុខភាព ជាពិសេសបានដឹងអំពីសារៈសំខាន់នៃការផ្ដល់សារធាតុកាល់ស្យូមដល់កូនៗ។ ពីមុនខ្ញុំមិនសូវបានដឹងអំពីគុណប្រយោជន៍ជាច្រើននៃសារធាតុកាល់ស្យូមនោះទេ។ ពីថ្ងៃនេះទៅ ខ្ញុំនឹងផ្តល់ជាតិកាល់ស្យូមដល់កូនប្រុសខ្ញុំជាប្រចាំឲ្យបានគ្រប់គ្រាន់ដើម្បីឲ្យលូតលាស់ឆ្អឹងបានល្អ"។
យោងតាមស្ថិតិឆ្នាំ២០១៣ របស់អង្គការ United Nations Children’s Fund បានឲ្យដឹងថាក្នុងចំណោមកុមារ៤នាក់នៅក្នុងពិភពលោក មានម្នាក់លូតលាស់មិនប្រក្រតី។ លើសពីនេះ ផ្អែកលើទិន្នន័យរបស់ការអង្កេតផ្នែកសុខភាព និងប្រជាសាស្ត្រកម្ពុជា (CDHS) ឆ្នាំ២០១៤ ថា ៣២%នៃកុមារកម្ពុជាដែលមានអាយុក្រោម៥ឆ្នាំ មានបញ្ហាកម្ពស់មិនស្របនឹងវ័យ (ក្រិន)។
លោកវេជ្ជបណ្ឌិត ផៃ ណារិទ្ធិ សាស្ត្រាចារ្យឯកទេសរោគកុមារនៃមន្ទីរពេទ្យកុមារជាតិ បកស្រាយពីអត្ថប្រយោជន៍នៃកាល់ស្យូមថា៖ "ពលរដ្ឋកម្ពុជាមួយចំនួនយល់ដឹង និងយកចិត្តទុកដាក់តិចតួចចំពោះផលប្រយោជន៍នៃជីវជាតិកាល់ស្យូមសម្រាប់កូនរបស់ពួកគាត់។ កាល់ស្យូមគឺជាសារធាតុរ៉ែសំខាន់សម្រាប់ការកសាងឆ្អឹង និងធ្មេញឲ្យរឹងមាំអំឡុងពេលកុមារភាព និងវ័យជំទង់។ កាល់ស្យូម ធ្វើឲ្យបេះដូងកន្ដ្រាក់បានល្អ។ កុមារវ័យក្មេង និងទារក ដែលមិនបានទទួលជាតិកាល់ស្យូម និងវីតាមីន D គ្រប់គ្រាន់អាចមានការកើនឡើងហានិភ័យខ្ពស់ចំពោះជំងឺក្រិស។ ជំងឺក្រិសស្តែងឡើងដោយមានភាពមិនប្រក្រតីនៃការរីកលូតលាស់ឆ្អឹង ហើយមានរោគសញ្ញាមួយចំនួនដូចជា ឆ្អឹងទន់ហើយខ្សោយ ខូចទ្រង់ទ្រាយឆ្អឹង (ក្បាលជង្គង់ងាកចូលគ្នា ឬជើងកោង) ការលូតលាស់យឺតហើយពេលខ្លះឈឺសាច់ដុំ និងសាច់ដុំខ្សោយ"។
យោងតាមអង្គការសុខភាពពិភពលោកបានឲ្យដឹងថា អំឡុងពេល៣ខែចុងក្រោយនៃគភ៌ទារកនៅក្នុងផ្ទៃកំពុងលូតលាស់ឆ្អឹង ទារកពិតជាចាំបាច់ក្នុងការទាមទារនូវជាតិកាល់ស្យូមពីម្តាយរបស់ខ្លួនដើម្បីធ្វើឲ្យឆ្អឹងលូតលាស់ ធ្វើឲ្យបេះដូង សរសៃប្រសាទ និងសាច់ដុំមានសុខភាពល្អ។ កាល់ស្យូមជួយឲ្យចង្វាក់បេះដូងទារកដំណើរការធម្មតា និងមានលទ្ធភាពក្នុងការធ្វើកំណកឈាម។ ការទទួលទានជាតិកាល់ស្យូមគ្រប់គ្រាន់ជាប្រចាំអំឡុងពេលកុមារភាព គឺជារឿងចាំបាច់សម្រាប់ការអភិវឌ្ឍនៃឆ្អឹងឲ្យលូតលាស់ជាអតិបរមា។ នៅពេលកុមារភាពទទួលបានសារធាតុបំប៉នកាល់ស្យូម ការហាត់ប្រាណគ្រប់គ្រាន់ និងវីតាមីន D គឺជាការចាំបាច់សម្រាប់ការឆ្លើយទៅនឹងការលូតលាស់ជាអតិបរមា។ អំឡុងកុមារភាព និងវ័យជំទង់ ពួកគេអាចចាប់ផ្តើមជីវិតវ័យជំទង់របស់ពួកគេបានជាមួយឆ្អឹងដ៏រឹងមាំ និងសុខភាពល្អ។
លោកស្រីវេជ្ជបណ្ឌិត លឹម សុជាតិ អ្នកឯកទេសខាងអាហារូបត្ថម្ភ បានពន្យល់ថា៖ "ដើម្បីការលូតលាស់ឆ្អឹងដ៏រឹងមាំ មាតាបិតាអាចផ្តល់អាហារបំប៉នសារធាតុកាល់ស្យូមដល់កុមារ ឬឲ្យពួកគេបរិភោគអាហារដែលសម្បូរដោយកាល់ស្យូមព្រមទាំងវីតាមីន D ដូចជា ទឹកសណ្តែក គ្រាប់កៅឡាក់ នំប៉័ង ត្រីសាល់មុន និងបន្លែពណ៌បៃតងចាស់-ល-។
តម្រូវការកាល់ស្យូមជាមធ្យម (មិលី្លក្រាម/ថ្ងៃ) សម្រាប់កុមារតាមអាយុ |
||||||
អាយុ | ០-៦ ខែ | ៧-១២ ខែ | ១-៣ ឆ្នាំ | ៤-៨ ឆ្នាំ | ៩-១៣ ឆ្នាំ | ១៤-១៨ ឆ្នាំ |
(មក្រ/ថ្ងៃ) | ២០០ | ២៦០ | ៧០០ | ១០០០ | ១៣០០ | ១៣០០ |
សាណូហ្វីកម្ពុជា នឹងរៀបចំកម្មវិធី "ម្តាយរបស់ខ្ញុំ កូនរបស់ខ្ញុំ" ចំនួន ១២ ដង ក្នុងនោះ ៦ ដងនៅមជ្ឈមណ្ឌលកម្សាន្តកុមារ Kids City រាជធានីភ្នំពេញ និង ៦ ដងទៀតនៅខេត្តបាត់ដំបង កំពង់ចាម និងសៀមរាប ហើយរំពឹងថានឹងមានអ្នកចូលរួមប្រមាណជា១៥០០នាក់៕
តើអ្នកប្រាកដទេថាកូនអ្នកញ៉ាំសារធាតុកាល់ស្យូមគ្រប់គ្រាន់?
អត្ថបទ៖ ពាណិជ្ជកម្ម