បុរសសាច់ដុំ សន ពិសិដ្ឋ ប្រឡូកសិល្បៈភ្លាម បានតំណែងតួសំខាន់ ៣ រឿងជាប់គ្នា

2016-06-28 18:09:30
ចំនួនមតិ 0 | ចំនួនចែករំលែក 0

ចន្លោះមិនឃើញ

សន ពិសិដ្ឋ បានសម្រេចចិត្តចូលប្រឡូកក្នុងវិស័យសិល្បៈថ្មីៗនេះ បន្ទាប់ពីមានការជំរុញលើកទឹកពីសិល្បករចាស់ៗជាអ្នកស្គាល់គ្នា ហើយក្នុងនោះរូបគេក៏បានគ្រងតំណែងតួសំខាន់ ៣ រឿងជាប់គ្នាភ្លាមៗទៀតផង។

“ប៉ុន្តែខ្ញុំមិនទាន់ល្បីអញ្ចឹង ថតបានតម្លៃទាបណាស់ និយាយទៅដាច់បាយម្ដងៗហើយ"។ ពិសិដ្ឋ ប្រាប់ Sabay មុននេះ។ បុរសសង្ហារដដែលបន្តថា រូបគេបានក្លាយជាតួសំខាន់ក្នុងរឿង "ម្ជុលបាតសមុទ្រ" ជាប្រភេទរឿងភាគត្រៀមចាក់បញ្ចាំងនៅទូរទស្សន៍ CTN, រឿង "លម្អៀងចិត្ត" ជាប្រភេទដូចគ្នាត្រៀមចាក់នៅប៉ុស្តិ៍បាយ័ន។ ហើយចំពោះរឿង "ទាយាទអាគម" កំពុងដំណើរកាតថតនៅឡើយ។

សន ពិសិដ្ឋ អះអាងថា ហាក់នៅមិនទាន់មានការលំបាកណាមួយសម្រាប់រូបគេក្នុងការសម្ដែងឡើយទេ ទោះបីជាប្រឡូកក្នុងវិស័យនេះថ្មីថ្មោងយ៉ាងណាក៏ដោយ។ ប៉ុន្តែរូបគេរូបគេជួបការលំបាកផ្នែកជីវភាពទៅវិញ ដោយសារកម្រៃរកបានពីការងារនេះតិចតួច ហើយទីផ្សារសិល្បៈនៅតូចចង្អៀតបើប្រៀបធៀបជាមួយសិល្បកររលកមុន។

តារាស្រករថ្មីខាងលើបង្ហាញក្ដីរំពឹងខ្ពស់ថា បន្ទាប់ពីភាពយន្តទាំង ៣ រឿងខាងលើត្រូវបានចាក់ផ្សាយលើកញ្ចក់ទូរទស្សន៍ពេលណា រូបគេអាចនឹងមានអ្នកស្គាល់កាន់តែច្រើនមិនខាន។ ពិសិដ្ឋ ក៏ស្នើសុំការគាំទ្រពីទស្សនិកជនផងដែរចំពោះជំហានដំបូងក្នុងវិស័យសម្ដែង៕