Sam៖ បើត្រៀមខ្លួនបានល្អ រួមនឹងសំណាងផ្ដល់ឲ្យ នោះអ្នកនឹងអាចទទួលបានជោគជ័យ

2014-10-30 22:24:15
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូបង្វឹកសញ្ជាតិស្វីសរបស់ភ្នំពេញក្រោន Samuel Schweingruber បានលើកឡើងថា ប្រសិនបើកូនក្រុមរបស់លោកបានត្រៀមខ្លួនបានយ៉ាងល្អរួចជាស្រេច ហើយសំណាងផ្ដល់ឲ្យ រួមនឹងកីឡាករគ្រប់រួបដាក់ចិត្តដាក់កាយ១០០ភាគរយក្នុងការប្រកួត នោះរឿងភ្ញាក់ផ្អើលនឹងកើតមានឡើង ហើយនេះក៏ជាអ្វីដែលក្រុមរបស់ក្រុមរបស់លោករំពឹងទុកនោះដែរ។ នេះជាការថ្លែងរបស់លោកគ្រូបង្វឹក Sam នៅក្នុងសន្និសីទសារព័ត៌មាននៅខេត្ត Binh Duong នាព្រឹកមិញនេះ។

ថ្លែងដូចនេះក៏ដោយសារតែលោកបានដឹងរួចជាស្រេចទៅហើយថា ក្រុមរបស់លោកនឹងត្រូវជួបក្រុមខ្លាំង ដែលជាជើងឯកលីករបស់វៀតណាម Becamex Binh Duong FC និងជាក្រុមម្ចាស់ផ្ទះរៀបចំការប្រកួត Toyota Mekong Club Championship។

«ការត្រៀមខ្លួនរបស់យើងគឺមិនបានល្អ១០០ភាគរយនោះទេ ដោយសារតែកីឡាករសំខាន់ៗរបស់យើង៥នាក់ទើបតែត្រឡប់មកពីជួយក្រុមជម្រើសជាតិ ហើយយើងក៏ទើបតែទទួលបាននូវកីឡាករថ្មី២រូបកាលពីពីរទៅបីសប្ដាហ៍មុននេះ» នេះជាការថ្លែងពីបញ្ហាប្រឈមរបស់លោកគ្រូបង្វឹក Sam។

Samuel Schweingruber កណ្ដាល

បន្ថែមលើនេះ លោកគ្រូបង្វឹកសញ្ជាតិស្វីសខាងលើបានសង្កត់ធ្ងន់ថា ក្រុមរបស់លោកបានខិតខំគ្រប់បែបយ៉ាង ដើម្បីស្វែងរកចំណុចខ្លាំង និងចំណុចខ្វះខាតរបស់ក្រុម ហើយការខកខានមិនបានធ្វើការហ្វឹកហាត់កាលពីម្សិលមិញនេះមិនមែនជាបញ្ហាចោទសម្រាប់ក្រុមនោះទេ ពីព្រោះកីឡាករគ្រប់រូបសុទ្ធតែមានអារម្មណ៍ល្អ និងមានទំនុកចិត្តថាអាចនឹងធ្វើបានយ៉ាងល្អក្នុងព្រឹត្តិការណ៍នេះ។

យ៉ាងណាក្ដី លោកនិងកូនក្រុមទាំងអស់គឺពេញចិត្តនឹងចូលរួមក្នុងយុទ្ធនាការដ៏អស្ចារ្យនេះ ពីព្រោះវាជាឱកាសមួយដែលអាចធ្វើឲ្យកីឡាបាល់ទាត់ខ្មែរកាន់តែមានការអភិវឌ្ឍ ក៏ដូចជាក្លិបទាំងមូលផងដែរ។ ការលេងតតាំងជាមួយនឹងក្រុមដែលមានកម្រិតសមត្ថភាពលេងខ្ពស់នៅក្នុងតំបន់គឺជាបទពិសោធន៍ដ៏ល្អ និងជាពេលវេលាមួយដែលអាចធ្វើការវាស់ស្ទង់ពីសមត្ថភាពនៃការអភិវឌ្ឍរបស់ក្រុមខ្លួនទៀតផង។

កីឡាករទាំង១៨នាក់របស់ភ្នំពេញក្រោនទៅចូលរួម Toyota Mekong Club Championship

ភ្នំពេញក្រោន នឹងត្រូវប៉ះជើងឯកលីកវៀតណាម Becamex Binh Duong នៅកីឡដ្ឋាន Binh Duong Stadium នាម៉ោង៨យប់ស្អែក ស្របពេលដែលជើងឯកលីកឡាវ HOANG ANH ATTAPEU FC ត្រូវជួបម្ចាស់ពានជើងឯកជាតិមីយ៉ាន់ម៉ា AYEYAWADY UNITED FC នៅម៉ោង៥ល្ងាច។

អត្ថបទ៖ អៀង សូទ្រី រូបថត៖ ទំព័រហ្វេសប៊ុកក្លិបភ្នំពេញក្រោន