បុរសឥណ្ឌាល្បីពាក់មាសស្រោចខ្លួន ត្រូវគេសម្លាប់ថ្ងៃនេះ
- 2016-07-15 23:31:30
- ចំនួនមតិ 0 | ចំនួនចែករំលែក 0
បុរសឥណ្ឌាល្បីពាក់មាសស្រោចខ្លួន ត្រូវគេសម្លាប់ថ្ងៃនេះ
ចន្លោះមិនឃើញ
បុរសជនជាតិឥណ្ឌាអាយុ ៤៤ឆ្នាំ លោក Dattatray Phuge មានរហស្សនាមបុរសអាវមាស ឬ Gold Shirt Man ល្បីពាក់ខ្សែក ខ្សែដៃ ចិញ្ចៀន និងអាវមាសស្រោចខ្លួន ត្រូវគេសម្លាប់នៅពីមុខកូនប្រុសនៅព្រឹកថ្ងៃសុក្រនេះ។
ក្រោយកើតហេតុ ប៉ូលិសឥណ្ឌាបានចាប់ខ្លួនមនុស្ស ៤នាក់ពាក់ព័ន្ធនឹងឃាតកម្មនេះ រួមទាំងក្មួយប្រុសរបស់គាត់ម្នាក់ផង។ លោក Phuge គឺជាអ្នកជំនួញមួយរូប ដែលបានប្រមូលប្រាក់ពីអ្នកវិនិយោគជាច្រើននាក់ ហើយកំពុងជាប់បណ្ដឹងព្រហ្មទណ្ឌមួយថែមទៀត។ អ្នកវិនិយោគខ្លះបានត្អូញត្អែរពីភាពមិនប្រក្រតីនៃការប្រមូលប្រាក់ ហើយប៉ូលិសបានដាក់ការសង្ស័យលើអ្នកទាំងនោះ នៅពីក្រោយឃាតកម្មគិតទុកជាមុនដែរ។
ប៉ូលិសនិយាយថា Phuge ត្រូវបានគេវាយនៅកណ្ដាលវាលរហូតដល់ស្លាប់ជាមួយដុំថ្ម និងអាវុធមុតស្រួច។ លោក និងកូនប្រុសត្រូវបានជនសង្ស័យម្នាក់ក្នុងចំណោមជនសង្ស័យផ្សេងទៀត អញ្ជើញឲ្យទៅចូលរួមពីធីខួបកំណើតមួយ រួចគេធ្វើសកម្មភាពសម្លាប់តែម្ដង។ ប្រភពដដែលបន្ថែមថា មុនកើតហេតុ Phuge ធ្លាប់មានជម្លោះជាមួយអ្នករកស៊ី ៨ទៅ១០ថ្ងៃកន្លងទៅហើយ។
គួររម្លឹកថា រូបថតរបស់ Phuge លើកដំបូងត្រូវបានចែកចាយខ្លាំងលើប្រព័ន្ធផ្សព្វផ្សាយ គឺលោកបានពាក់អាវផលិតពីមាស ២២ការ៉ាត់ និងទម្ងន់ ៣,៥គីឡូក្រាម ច្នៃដោយសិប្បករ ១៥នាក់ រយៈពេល ១៦ថ្ងៃ និងតម្លៃ ២៤ម៉ឺនដុល្លារ កាលពី ៣ឆ្នាំមុន ពេលនោះបានទាក់ទាញចំណាប់អារម្មណ៍មនុស្សស្ទើរទូទាំងពិភពលោកតែម្ដង៕
ប្រែសម្រួល៖ ឡេង ភារុណ ប្រភព៖ Hindustantimes