លេចធ្លាយរឿងលម្អិតជុំវិញអាពាហ៍ពិពាហ៍របស់ចៀវៃ និង Wallace Huo
- 2016-07-25 16:01:04
- ចំនួនមតិ 0 | ចំនួនចែករំលែក 0
លេចធ្លាយរឿងលម្អិតជុំវិញអាពាហ៍ពិពាហ៍របស់ចៀវៃ និង Wallace Huo
ចន្លោះមិនឃើញ
គូស្នេហ៍ល្បីឈ្មោះ តារាសម្ដែង Ruby Lin និង Wallace Huo នឹងភ្ជាប់និស្ស័យជាមួយគ្នានៅរមណីយដ្ឋានលំដាប់ថ្នាក់ខ្ពស់មួយលើកោះបាលីប្រទេសឥណ្ឌូណេស៊ីនៅចុងខែកក្កដានេះ។
កាលពីថ្ងៃទី ២៤ខែកក្កដាមុននេះ បណ្ដាញព័ត៌មាន Sina បានទម្លាយពីធៀបមង្គលការរបស់គូស្នេហ៍តារាសម្ដែងល្បីឈ្មោះតៃវ៉ាន់ Ruby Lin និង Wallace Huo។ ធៀបអាពាហ៍ពិពាហ៍របស់តារាទាំង២នេះមានពណ៌សបោះពុម្ពដោយអក្សរពណ៌ផ្កាឈូកនិងមានស្រោមខាងក្រៅពណ៌ស្វាយ។ នៅលើធៀបមាន logo WR ដែលជាព្យញ្ជនៈទីមួយក្នុងឈ្មោះអង់គ្លេសរបស់អ្នកទាំង២។ ភ្ញៀវកិត្តិយសដែលចូលរួមក្នុងមង្គលការរបស់គូស្វាមីភរិយាថ្មីនេះត្រូវបានសំណូមពរឲ្យស្លៀកសំលៀកបំពាក់ពណ៌សនិងពណ៌ស្បែកហើយខោវប៊យនឹងមិនត្រូវអនុញ្ញាតឲ្យចូលនោះទេ។
ជាមួយគ្នានេះ ទីតាំងប្រារព្ធមង្គលការរបស់ចៀវៃក៏ត្រូវបានគេបង្ហើបដែរ។ អាពាហ៍ពិពាហ៍របស់តារាសម្ដែងល្បីឈ្មោះទាំង២នឹងត្រូវបានធ្វើឡើងនៅក្នុងរមណីយដ្ឋានលំដាប់ថ្នាក់ខ្ពស់ Bvlgari Hotels & Resorts នៅលើកោះបាលីប្រទេសឥណ្ឌូណេស៊ី។ ខុសពីមង្គលការរបស់សិល្បករនានាដែលមានអ្នកកំដរច្រើនភ្លូកទឹកភ្លូកដីនោះ មង្គលការរបស់ចៀវៃនឹងមានអ្នកកំដរកូនក្រមុំនិងកូនកំលោះតែមួយនាក់ប៉ុណ្ណោះ។ រ៉ាប់រងតួនាទីកំដរ Ruby Lin គឺតារាសម្ដែង Xu Wei Ning ដែលជាមិត្តជិតស្និទ្ធរបស់នាង។ រីឯអ្នកកំដរ Wallace Huo វិញគឺអ្នកគ្រប់គ្រងយូរឆ្នាំរបស់ប្រុសស្អាតនេះ៕
ចុចអាន៖Wallace Hou ទិញភូមិគ្រឹះថ្លៃ៦លានដុល្លារឲ្យចៀវៃ ជាកាដូអាពាហ៍ពិពាហ៍
ប្រែសម្រួល៖ សុវណ្ណផៃ ប្រភព៖ngoisao