ឆ្នោតកីឡាជាតិឧបត្ថម្ភអត្តពលិកទៅអូឡាំពិកជាង១ពាន់ដុល្លារ

2016-07-25 19:41:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនឆ្នោតកីឡាជាតិបានឧបត្ថម្ភទឹកប្រាក់ជាង១ពាន់ដុល្លារអាមេរិកដល់កីឡាករ-កីឡាការិនី និងប្រតិភូ ដែលទៅចូលរួមប្រកួតកីឡាអូឡាំពិកនៅប្រទេសប្រេស៊ីល កាលពីព្រឹកមិញនេះនៅទីតាំងក្រុមហ៊ុនរបស់ខ្លួន។

លោក Tony នាយកគ្រប់គ្រប់របស់ក្រុមហ៊ុនបានឲ្យដឹងថា ការផ្ដល់ប្រាក់លើកទឹកចិត្តដល់កីឡាករ និងកីឡាការិនីនេះគឺចង់ចូលរួមជ្រោមជ្រែងកីឡាឲ្យមានការរីកចំរើន។ ក្រុមហ៊ុនរបស់លោក នឹងជួយជ្រោមជ្រែងប្រភេទកីឡាបន្ថែមទៀតនាឆ្នាំក្រោយៗ ។

ជាមួយគ្នានោះឯកឧត្ដម វ៉ាត់ ចំរើន អគ្គលេខធិការនៃគណៈកម្មាធិការជាតិអូឡាំពិកកម្ពុជា ក៏បានលើកឡើងដែរថា លោកពិតជាអរគុណយ៉ាងខ្លាំងដល់ក្រុមហ៊ុនមួយនេះ ដែលផ្ដល់ជាថវិកាដល់កីឡាករ-កីឡាការិនី និងប្រតិភូថ្នាក់ដឹកនាំទៅប្រកួត។ ទោះបីក្រុមហ៊ុនមួយនេះទើបតែបង្កើតឡើង ហើយមិនទាន់ជោគជ័យខ្លាំង ប៉ុន្តែបានបង្ហាញពីការចូលរួមវិស័យកីឡាយ៉ាងអស្ចារ្យ។

សម្រាប់ព្រឹត្តិការណ៍កីឡាអូឡាំពិករដូវក្តៅប្រទេសប្រេស៊ីលនាខែសីហា ខាងមុខនេះ កម្ពុជាបញ្ជូនអត្តពលិកចំនួន៦រូបទៅចូលរួមប្រកួត។ អត្តពលិកទាំង៦នាក់មានកីឡាតេក្វាន់ដូ១នាក់គឺកីឡាការិនី ស៊ន សៀវម៉ី កីឡាហែលទឹក២នាក់គឺកីឡាការិនី ហែមថុន វិទីនី និងកីឡាករ ពូ សុវិជ្ជា អត្តពលកម្ម២នាក់គឺកីឡាការិនី លី ណារី និងកីឡាករ Neko ព្រមទាំងកីឡាចំបាប់១នាក់គឺកីឡាការិនី ចូវ សុធារ៉ា៕