រកឃើញដានជើងដាយណូស័រ ទំហំ១,២ម៉ែត្រ នៅប្រទេសបូលីវី
- 2016-07-29 16:44:34
- ចំនួនមតិ 0 | ចំនួនចែករំលែក 0
រកឃើញដានជើងដាយណូស័រ ទំហំ១,២ម៉ែត្រ នៅប្រទេសបូលីវី
ចន្លោះមិនឃើញ
ដានជើងដាយណូស័រមួយ មានទំហំ ១.២ម៉ែត្រ ត្រូវបានគេរកឃើញនៅក្នុងប្រទេសបូលីវី (Bolivia)។ វាត្រូវបានគេជឿជាក់ថា ជាដានជើងរបស់ដាយណូស័រដែលស៊ីសាច់ជាអាហារ ប្រភេទ Abelisaurus ដែលបានរស់នៅប្រមាណជា ៨០លានឆ្នាំមុន។ បើតាមអ្នកសិក្សាប្រវត្តិនៃជីវិត សញ្ជាតិអាហ្សង់ទីន លោក Sebastian Apesteguia បានឲ្យដឹងថា ពពួកសត្វដាយណូស័រប្រភេទ Abelisaurus នេះ ធ្លាប់បានដើរត្រាចចរមកដល់ទ្វីបអាមេរិកខាងត្បូងនេះ។
លោក Sebastian Apesteguia
គួរបញ្ជាក់ផងដែរថា ដានជើងដ៏ធំសម្បើមមួយនេះត្រូវបានរកឃើញ ដោយមគ្គទេសក៍ទេសចរណ៍មួយរូប នៅតំបន់រណ្ដៅភ្នំភ្លើង Maragua ប្រទេសបូលីវី ខណៈតំបន់មួយនេះត្រូវបានគេស្គាល់ថា ជាផ្លូវឆ្លងកាត់សម្រាប់សត្វដាយណូស័រ។ ជាមួយគ្នានេះ សំណល់នៃដាយណូស័រដទៃផ្សេងទៀត ក៏ត្រូវបានរកឃើញនៅក្នុងតំបន់នោះដែរ។
ក្រុមអ្នកជំនាញបានគិតថា ដានជើងដែលទើបនឹងរកឃើញនេះ គឺមានទំហំធំបំផុត បើប្រៀបធៀបនឹងដានជើង របស់ដាយណូស័រប្រភេទ Abelisaurus ដែលធ្លាប់បានរកឃើញពីមុនមក។ «ដានជើងនេះធំជាងដានជើងដទៃទៀតដែលយើងធ្លាប់បានរកឃើញ»។ លោក Apesteguia បានឲ្យដឹងយ៉ាងដូច្នេះ៕
ប្រែសម្រួល ៖ សេង ឡុង ប្រភព ៖ BBC