ចម្ការបន្លែធម្មជាតិ ២០ហិកតានៅស្រែអំបិល គ្មានប៉ះសារជាតិគីមីសូម្បីបន្តិច
- 2016-08-02 23:07:25
- ចំនួនមតិ 0 | ចំនួនចែករំលែក 0
ចម្ការបន្លែធម្មជាតិ ២០ហិកតានៅស្រែអំបិល គ្មានប៉ះសារជាតិគីមីសូម្បីបន្តិច
ចន្លោះមិនឃើញ
នៅលើផ្ទៃដីកាត់ព្រៃជ្រៅក្នុងស្រុកស្រែអំបិល ដែលមនុស្សជាច្រើនគិតថាគ្មានជីវជាតិ និងមិនអំណោយផលចំពោះការដាំដុះ បែរជាមានចម្ការបន្លែធម្មជាតិសរីរាង្គ Eco Agri Farm ២០ហិកតា ដោយគ្មានប៉ះសារជាតិគីមីសូម្បីបន្តិច។ ចម្ការនេះ ស្ថិតនៅក្នុងឃុំជ្រោយស្វាយ ស្រុកស្រែអំបិល ខេត្តកោះកុង។
លោក សឿង ចាន់នឿន ដែលជាអ្នកគ្រប់គ្រងចម្ការផ្ទាល់បានបញ្ជាក់ថា ផ្ទៃដីសរុបនៃចម្ការបន្លែធម្មជាតិសរីរាង្គ Eco Agri Farm មាន ៨៦ហិកតា ប៉ុន្តែទើបដាំដុះរួច ២០ហិកតាប៉ុណ្ណោះ និងកំពុងពង្រីកបន្ថែមទៀត។ លោកបានអះអាងថា បន្លែ និងផ្លែឈើហូបផ្លែទាំងអស់សុទ្ធតែបំប៉នដោយជីធម្មជាតិបង្កើតឡើងខ្លួនឯង ពុំមានប៉ះសារជាតិគីមីឡើយ។ ចំពោះបន្លែធម្មជាតិមានជាង ២០ប្រភេទ និងគ្រោងដាំរហូតដល់ ៣៥ប្រភេទ។ ចំណែកផ្លែឈើហូបផ្លែមាន ៣៥មុខរួចទៅហើយ។
លោក អៀង សុធារ៉ា ដែលជាស្ថាបនិកចម្ការបន្លែធម្មជាតិ Eco Agri Farm បានអះអាងថា ចម្ការនេះចាប់ផ្ដើមដាំដុះដំណាំដំបូងនៅមេសា ឆ្នាំ២០១៤ ហើយគោលបំណងនោះគឺចង់ឲ្យប្រជាជនងាកមកចាប់អារម្មណ៍លើការប្រើប្រាស់ជីធម្មជាតិ ជំនួសជីគីមីដែលប៉ះពាល់ដល់សុខភាព។ ចំណែកការជ្រើសរើសទីតាំងដាច់ស្រយាលក្នុងស្រុកស្រែអំបិល គឺដើម្បីបង្ហាញថាផ្ទៃដីបែបណាក៏អាចបង្កបង្កើនផលបានដែរ មិនចាំបាច់តែដីមានជីវជាតិឡើយ។
កាលពីថ្ងៃអាទិត្យកន្លងទៅ លោក អៀង សុធារ៉ា បានរៀបចំឲ្យមានដំណើរទស្សនកិច្ចមួយទៅកាន់ចម្ការបន្លែធម្មជាតិសរីរាង្គ Eco Agri Farm សម្រាប់លោកគ្រូអ្នកគ្រូ និងសិស្សានុសិស្សវិទ្យាល័យជម្ពូវ័នប្រហែល១០០នាក់។ ដំណើរទស្សនកិច្ចនេះត្រូវបានធ្វើឡើងដើម្បីបង្ហាញពីការដាំបន្លែដោយប្រើជីធម្មជាតិ និងថ្នាំពុលសរីរាង្គ ដែលអាចទទួលបានទិន្នផលខ្ពស់ រួមនឹងការបង្ហាញពីបច្ចេកទេសដាំដុះផងដែរ៕