ជិះយន្តហោះទៅជួបមិត្តស្រីលើអនឡាញដល់ចិន ចាំអស់១០ថ្ងៃ តែចុងក្រោយ...
- 2016-08-03 17:07:24
- ចំនួនមតិ 0 | ចំនួនចែករំលែក 0
ជិះយន្តហោះទៅជួបមិត្តស្រីលើអនឡាញដល់ចិន ចាំអស់១០ថ្ងៃ តែចុងក្រោយ...
ចន្លោះមិនឃើញ
កាលពីពេលថ្មីៗនេះ បុរសជនជាតិហូឡង់ម្នាក់ មានឈ្មោះថា Alexander Pieter Cirk អាយុ៤១ឆ្នាំ បានជិះយន្តហោះពីប្រទេសហូឡង់ ទៅកាន់ខេត្ត Hunan ប្រទេសចិន ក្នុងក្តីសង្ឃឹមថានឹងបានជួបមិត្តស្រីលើអនឡាញរបស់ខ្លួន មានឈ្មោះថា Zhang ហើយគាត់បានរង់ចាំអស់រយៈពេល ១០ថ្ងៃ នៅឯព្រលានយន្តហោះ Changsha តែនាងបែរជាមិនបង្ហាញខ្លួនទាល់តែសោះ។
លោក Cirk បានប្រាប់ទៅកាន់ប៉ុស្តិ៍ទូរទស្សន៍ Hunan TV ថា គាត់បានស្គាល់ស្រ្តីឈ្មោះ Zhang អាយុ២៦ឆ្នាំ នៅក្នុងកម្មវិធីមួយ (App) កាលពី២ខែមុន ហើយគាត់បានសម្រេចចិត្តជិះយន្តហោះមកជួបនាង ប៉ុន្តែនៅពេលដែលគាត់មកដល់ ខេត្ត Hunan គ្មាននរណាម្នាក់មកជួបគាត់ឡើយ។ ផ្ទុយទៅវិញ គាត់មិនព្រមចាកចេញពីព្រលានយន្តហោះឡើយ ដោយរង់ចាំនៅទីនោះអស់រយៈពេល ១០ថ្ងៃ តែចុងបញ្ចប់បានត្រឹមតែចូលមន្ទីរពេទ្យ ដោយសារតែអស់កម្លាំងខ្លាំងពេក។
រំលងបានមួយថ្ងៃ ស្រ្តីឈ្មោះ Zhang ក៏បានទាក់ទងទៅកាន់ប៉ុស្តិ៍ទូរទស្សន៍នោះដើម្បីធ្វើការបកស្រាយ បន្ទាប់ពីបានឃើញការផ្សាយបន្តផ្ទាល់រួចមក។ «យើងបានបណ្តុះទំនាក់ទំនងស្នេហារបស់ពួកយើង ប៉ុន្តែក្រោយមកគាត់ហាក់បីដូចជាឥតមានមេត្តាចំពោះខ្ញុំសោះ។ ថ្ងៃមួយគាត់បានផ្ញើរូប សំបុត្រយន្តហោះ ឲ្យខ្ញុំមើល តែខ្ញុំបានគិតថាវាជារឿងលេងសើច ហើយគាត់ក៏មិនបានទាក់ទងមកខ្ញុំដែរ»។ នេះបើតាមសម្តីស្រ្តីឈ្មោះ Zhang ប្រាប់ទៅកាន់ ប៉ុស្តិ៍ទូរទស្សន៍ខាងលើ។ Zhang ក៏បានបន្ថែមទៀតថា នៅពេលដែលលោក Cirk មកដល់ព្រលានយន្តហោះ នាងបានទៅខេត្តផ្សេងទៀតដើម្បីវះកាត់កែសម្ផស្សបាត់ទៅហើយ និងបានបិទទូរសព្ទទៀតផង៕
ប្រែសម្រួល ៖ សេង ឡុង ប្រភព ៖ BBC