និស្ស័យអាចឱ្យយើងជួប ក៏អាចឱ្យយើងបែក

2016-08-12 17:32:39
ចំនួនមតិ 0 | ចំនួនចែករំលែក 0

ចន្លោះមិនឃើញ

តើអ្នកទាំងអស់គ្នាជឿលើនិស្ស័យឬទេ?

តើមានមនុស្សប៉ុន្មានអ្នក ដែលចាប់ផ្ដើមស្រលាញ់គ្នាតាមរយៈបណ្ដាញទំនាក់ទំនងសង្គមហ្វេសបុកនេះ?

ខ្ញុំសូមរៀបរាប់ដំណើររឿងដែលកើតឡើងផ្ទាល់ចំពោះខ្ញុំបាទដូចតទៅនេះ... ដំបូងឡើយស្នេហារបស់យើងទាំងពីរនាក់គឺបានចាប់ផ្ដើមឡើង នៅពេលដែលខ្ញុំកំពុងធ្វើការនៅការដ្ឋានសាងសង់រោងម៉ាស៊ីនកិនស្រូវមួយនៅខេត្តកំពត នៅឯស្រុកកំណើតរបស់ខ្ញុំ។

ការពិតខ្ញុំនិងគេក្លាយជាមិត្តនឹងគ្នាតាមបណ្ដាញសង្គមយូរមកហើយ គ្រាន់តែមិនដែលបានលេងជាមួយគ្នា និស្ស័យក៏បានទាញយើងទាំងពីរឱ្យស្គាល់គ្នាដោយចៃដន្យ។ មានថ្ងៃមួយនោះ Facebook បាន alert ខ្ញុំចំពោះរូបថតមួយសន្លឹកដែលខ្ញុំបានបង្ហោះកាលពីឆ្នាំ ២០១៣។ រូបនោះគឺពេលខ្ញុំកំពុងដេកនៅក្នុងកន្លែងធ្វើការមួយកន្លែង ដោយរូបនោះបាន Tag ឱ្យនាងតែម្នាក់គត់។ ឃើញដូចនោះខ្ញុំក៏ឆ្ងល់រួចក៏បានចុចឈ្មោះនារីម្នាក់នោះមើល។ នៅលើ Profile នារីនោះគេដាក់រូបស្អាតបែបសិចស៊ីបន្តិច ដោយសារតែឃើញបែបនោះខ្ញុំក៏សាកផ្ញើសារតាម Messengerទៅលេង ហើយក៏មិនដែលគិតទេថានាងនឹងតបមកវិញ។ តែខុសពីការគិត នាងក៏តបមកវិញ! ពេលនោះហើយ ខ្ញុំនិងនាងក៏បានចាប់ផ្ដើមស្គាល់គ្នា។

បន្ទាប់មកទៀត ខ្ញុំបានចាប់ផ្ដើម ជជែកលេងជាមួយគេ តាមបណ្ដាញសង្គម Facebook រហូត ដោយកាលនោះនាងបានដាក់រូប Profile ក្លែងក្លាយ (តែខ្ញុំមិនបានដឹងថាជារូបក្លែងក្លាយទេ) ដោយខ្ញុំបានជជែក ជាមួយនាងរាល់ថ្ងៃ ពេលខ្លះតេទៅនាងតាម Messenger ក៏មាន ព្រោះថានាងមិនព្រមឱ្យលេខទូរសព្ទមកខ្ញុំទេ ទោះបីជាព្យាយាមសុំនាងយ៉ាងណាក៏ដោយ (ប្រហែលគិតថាគេជាស្រីស្អាតហើយមើលទៅ)។

ទោះបីយ៉ាងណាក៏ដោយ ក៏ខ្ញុំនៅតែមុខក្រាស់បន្តធ្វើបែបនេះរហូត គឺរយៈពេលប្រហែលជិតបីខែ(តាំងពីខែមេសាដល់ខែមិថុនា ឆ្នាំ២០១៤) ទើបគេព្រមឱ្យលេខទូរស័ព្ទមកខ្ញុំ។ ទីបំផុតនៅថ្ងៃទី៥ ខែមិថុនា ឆ្នាំ២០១៤ ពេលនោះហើយដែលជាពេលនាងព្រមទទួលយកការស្រលាញ់ពីខ្ញុំ ទាំងដែលពួកយើងទាំងពីរមិនដែលបានជួបមុខគ្នាសោះសូម្បីតែម្ដង។ ហើយមុនពេលដែលយើងស្រលាញ់គ្នា គេបានផ្ញើរូបជាច្រើនដែលមិនមែនជារូបពិតជាច្រើនដែលមិនមែនជារូបពិត ធ្វើឱ្យខ្ញុំលង់ចង់ងាប់ ព្រោះតែស្អាតពេក។

ហេតុតែមិនដឹងត្រូវគេបោកឡើងវិលក្បុង ក៏សុខចិត្តឱ្យគេបោកមួយគ្រាសិនចុះ។ យើងនៅតែបន្តទំនាក់ទំនងគ្នាបែបនេះរហូត ពេលខ្លះនិយាយទូរសព្ទសឹងតែដាច់យប់ក៏មានដែរ ព្រោះស្រលាញ់គ្នាថ្មីថ្មោងចឹងហើយ។

ក្រោយពីស្គាល់គ្នាមិនបានយូរប៉ុន្មាន នារីម្នាក់នោះបានប្រាប់ថា មានគេមកចង់ចូលស្ដីដណ្ដឹងនាង។ ពេលនោះខ្ញុំមានអារម្មណ៍ថាដូចត្រូវគេយកបេះដូងចេញពីខ្លួនបាត់ចឹង! ព្រោះមនុស្សដែលខ្លួនកំពុងស្រលាញ់ មានគេចូលស្ដីដណ្ដឹង តែចុងក្រោយនារីម្នាក់នោះក៏មិនបានយល់ព្រមជាមួយម៉ាក់គេទេ។

ពួកយើងក៏បន្តការស្រលាញ់បន្តទៀត។ មិនយូរប៉ុន្មាន ខ្ញុំបានផ្លាស់មកធ្វើការនៅភ្នំពេញ ព្រោះតែចង់ជួបមុខ និងដើម្បីបាននៅក្បែរមនុស្សដែលស្រលាញ់។ ការរំពឹងទុករបស់ខ្ញុំមិនមានលទ្ធផលល្អប៉ុន្មានដូចការប៉ងនោះឡើយ ព្រោះថាគេកើតក្នុងគ្រួសារអ្នកមាន ហើយម៉ាក់ប៉ា គេតឹងរ៉ឹងចំពោះកូនណាស់។

ដំបូងឡើយខ្ញុំព្យាយាមសុំជួបគេ ប៉ុន្តែត្រូវគេបដិសេធរហូត ថាមិនទំនេរ មិនអាចចេញបាន តែការពិតគេកុហកខ្ញុំ ដោយសារតែគេប្រើប្រាស់ឈ្មោះក្លែងក្លាយ រូបថតក្លែងក្លាយទើបគេមិនហ៊ានជួប ទោះបីខ្ញុំព្យាយាមសុំជួបយ៉ាងណាក៏ដោយ។

រហូតមានថ្ងៃមួយគេ បានសារភាពថា បើគេកុហកខ្ញុំ តើខ្ញុំនៅស្រលាញ់គេទៀតឬអត់? ស្អប់គេអត់? នាងសួរខ្ញុំបែបនេះ ព្រោះខ្ញុំធ្លាប់ប្រាប់នាងថា ខ្ញុំស្អប់បំផុតអ្នកណាដែលបោកប្រាស់ខ្ញុំ។ ស្រាប់តែពេលនោះខ្ញុំមានអារម្មណ៍ដឹងភ្លាមថាហេតុអ្វីបានជានាងសួរបែបនេះ ខ្ញុំក៏សួរបញ្ជាក់ទៅនាងថា តើនាងកុហកខ្ញុំដោយសារប្រើប្រាស់គណនេយ្យ Facebook ក្លែងក្លាយមែនទេ?

ពេលនោះនាងក៏ផ្ញើរូបពិតរបស់នាងមកឱ្យខ្ញុំមើល ជាការពិតណាស់រូបពិតនិងរូបក្នុង Facebook ពិតជាខុសគ្នាឆ្ងាយមែន តែមិនដឹងយ៉ាងម៉េច នៅពេលឃើញរូបនោះក៏នៅតែស្រលាញ់ ទោះបីជាធ្លាប់និយាយប្រាប់គេដោយផ្ទាល់មាត់ហើយថាខ្ញុំស្អប់មនុស្សជំពូកនោះ។

តែផ្ទុយទៅវិញ ទោះបីដឹងថានាងកុហកហើយ ក៏នៅតែស្រលាញ់នាង ព្រោះថាការស្រលាញ់មិនបានឃើញពីចំណុចអាក្រក់របស់គេឡើយ ហើយក៏អាចមកពីខ្ញុំជាមនុស្សមិនសូវយកចិត្តទុកដាក់លើមុខមាត់ប៉ុន្មាននោះដែរ។ ទោះបីជាយើងទាំងពីរនាក់មិនដែលបានជួបមុខក៏ដោយ ចុងក្រោយខ្ញុំនៅតែសម្រេចចិត្តជ្រើសយកនាងដដែល ហើយយើងនៅតែបន្តទាក់ទងគ្នារហូត គ្រាន់តែមិនសូវដូចមុន ព្រោះហាក់អន់ចិត្តបន្តិចបន្តួច។ ក្រោយមកទំនាក់ទំនងពួកយើងចាប់ផ្ដើមជាល្អឡើងវិញ ដោយសារនាងសន្យាថានឹងព្រមចេញក្រៅជួបខ្ញុំទើបខ្ញុំព្រមទទួល ហើយអភ័យឱ្យនាង ហើយនៅតែបន្តនិយាយគ្នាលេងជាមួយនាងរហូតមក។

(រូបតំណាង)

នៅថ្ងៃទី ១១ ខែសីហា ឆ្នាំ២០១៥ ជាកាលបរិច្ឆេទដែលខ្ញុំត្រូវទទួលសញ្ញាប័ត្រពេលនោះដែរ ខ្ញុំបានប្រាប់ទៅ ក្រុមគ្រួសាររបស់ខ្ញុំ ហើយពួកគាត់ក៏បានមកចូលរួមអបអរខ្ញុំផងដែរ ព្រោះវាជាថ្ងៃពិសេសរបស់ខ្ញុំ។ វាកាន់តែធ្វើឱ្យខ្ញុំរំភើបក្រៃលែង អ្វីដែលពិសេសលើសពីនេះទៅទៀត មនុស្សម្នាក់ដែលខ្ញុំស្រលាញ់គេ ហើយនាងក៏ស្រលាញ់ខ្ញុំ (ប៉ុន្តែមុនថ្ងៃដែលខ្ញុំត្រូវទទួលសញ្ញាប័ត្រ យើងទាំងពីរនាក់ឈ្លោះគ្នាតិចតួច) នាងក៏បានបង្ហាញមុខឡើងចំពោះខ្ញុំនិងគ្រួសាររបស់ខ្ញុំ។ ដំបូងឡើយ ខ្ញុំមិនបានស្គាល់នាងទេ ព្រោះធ្លាប់ឃើញតែនៅក្នុងរូបថត តែការពិតនៅខាងក្រៅ នាងស្អាតជាងក្នុងរូបថតខ្លាំងណាស់! រាងខ្ពស់ស្រលះមិនចាញ់តារាបង្ហាញម៉ូដប៉ុន្មានទេ មុខនាងកាន់តែញញឹម កាន់តែស្រស់ស្អាត ជាហេតុធ្វើឱ្យខ្ញុំមើលនាងមិនស្គាល់។ និយាយពីពេលនោះវិញ ខណៈពេលដែលខ្ញុំកំពុងឈរថតរូបជាមួយគ្រួសារ ស្រាប់តែនាងដើរមកសំដៅរកខ្ញុំ ដោយដៃកាន់នូវផ្កាកុលាបមួយបាច់យ៉ាងធំ ហើយទឹកមុខញញឹមដាក់ខ្ញុំ រួចហុចផ្កានោះឱ្យខ្ញុំ ធ្វើឱ្យខ្ញុំមានការងឿងឆ្ងល់ជាខ្លាំង ព្រោះខ្ញុំមិនដែលស្គាល់នារីណា ស្អាតចឹងទេ ហើយក៏មិនដែលគិតដែរថានឹងមានមនុស្សម្នាក់ មកធ្វើឱ្យខ្ញុំមានការភ្ញាក់ផ្អើលក្នុងថ្ងៃពិសេសរបស់ខ្ញុំបែបនេះឡើយ។ ពេលនោះខ្ញុំក៏សួរនាងថាគឺជានាងមែនទេ ហើយនាងក៏ញញឹមរួចងក់ក្បាល ខ្ញុំចង់ប្រាប់ថាអរគុណខ្លាំងណាស់ ចំពោះមនុស្សសំខាន់ម្នាក់នោះ សម្រាប់វត្តមានក្នុងថ្ងៃដ៏មានន័យនេះ។ ពេលនោះដែរក៏មានរឿងគួរឱ្យអស់សំណើចផងដែរ ដោយសារពេលដែលគេដើរមករកខ្ញុំ ខ្លួនប្រាណរបស់គេញ័រដូចរញ្ជួយផែនដីអញ្ចឹង ព្រោះតែវាជាលើកទីមួយដែលយើងទាំងពីរនាក់ជួបគ្នា។ ពេលនោះដែរនាងបានធ្វើឱ្យម៉ាក់ប៉ានិងប្អូនស្រីខ្ញុំឆ្ងល់ជាខ្លាំង។ ក្រោយពីដឹងថាជានាងរួចមក ម៉ាក់ក៏បានប្រាប់ឱ្យយើងទាំងពីរនាក់ថតរូបជាមួយគ្នា ទៅទុកជាអនុស្សាវរីយ៍ ទាំងដែលខ្លួនប្រាណនាងនៅញ័រទទ្រើកដូចមានរញ្ជួយផែនដីអញ្ចឹង។ ចាប់តាំងពីថ្ងៃនោះមក ទំនាក់ទំនងរបស់យើងកាន់តែស្អិតល្មួតពីមួយថ្ងៃទៅមួយថ្ងៃ។ យើងនិយាយជាមួយគ្នាមិនលោះមួយថ្ងៃឡើយ គ្រាន់តែយើងមិនមានពេលវេលាជួបគ្នា ក្រោមហេតុផលគ្រួសារតឹងរ៉ឹង។ ខ្ញុំក៏គោរពតាមការសម្រេចចិត្តរបស់នាង ព្រោះមិនចង់ឱ្យទំនាក់ទំនងយើងប្រេះស្រាំព្រោះតែរឿងនេះ។ យ៉ាងណាមិញនាង ក៏បានឆ្លៀតពេលទំនេរ ពីដើរផ្សារមកជួប ខ្ញុំនិងញ៉ាំអាហារជាមួយគ្នាបាន២ទៅ ៣ដងដែរ តែមិនបានរយៈពេលយូរទេ ព្រោះនាងមកជាមួយបងស្រីចុងភៅប្រចាំគ្រួសារ។ ជាការពិត នាងចូលចិត្តស្លៀកពាក់សំលៀកបំពាក់សិចស៊ីណាស់ ហើយតែងតែត្រូវខ្ញុំស្ដីឱ្យជាញយៗ។ មានពេលមួយនោះ ក្រោយពេលញ៉ាំអីរួច នាងក៏ឡើងជិះម៉ូតូជាមួយខ្ញុំ ដោយសារសំពត់នាងខ្លី ខ្ញុំក៏បានដោះអាវក្រៅរបស់ខ្ញុំឱ្យនាងគ្របជើងរបស់នាង ដើម្បីកុំឱ្យអ្នកផ្សេងគេមើលរួចក៏ឌុបនាងទៅរកបងស្រីចុងភៅវិញ។ វាជារឿងធម្មតាទៅហើយដែលគូស្នេហ៍តែងតែមានរឿងឈ្លោះគ្នាជាញយៗ។ សម្រាប់ពួកយើងវិញ ពេលនិយាយទូរស័ព្ទលើកណាក៏ឈ្លោះគ្នាដែរ មានពេលខ្លះដល់ថ្នាក់ប្រើពាក្យបែកគ្នាជាច្រើនលើកច្រើនសារទៀតផង តែពួកយើងនៅតែមិនអាចបែកគ្នាបាន ព្រោះចិត្តស្រលាញ់មានចំពោះគ្នាខ្លាំង ។

ដោយហេតុថាពេលណាចង់ឃើញមុខនាង យើងក៏ប្រើប្រព័ន្ធវីដេអូខលជា រឿយៗ ហើយខ្ញុំតែងតែហៅនាងថាស្រីល្ងង់ឬស្រី មុខចាស់ ព្រោះនាងមានអាយុស្របាលនឹងខ្ញុំដែរ តែនាងមិនដែលចេះខឹងងរង៉ក់នឹងរឿងទាំងនេះទេ ទើបខ្ញុំកាន់តែស្រលាញ់នាងខ្លាំងឡើងៗ។ ស្រលាញ់គ្នាគឺជារឿងរបស់មនុស្សពីរនាក់ក៏ពិតមែន តែបើគ្រួសារមិនពេញចិត្តទោះស្រលាញ់ប៉ុនណាក៏គង់តែត្រូវរង្គោះរង្គើដែរ។ ក្រោយពេលអ្នកផ្ទះរបស់គេដឹងរឿងរបស់យើងទាំងពីរ ម៉ាក់របស់គេមិនពេញចិត្តឱ្យពួកយើងស្រលាញ់គ្នាទេ ព្រោះម៉ាក់របស់គេពេញចិត្តនឹងបុរសម្នាក់ទៀតដែលជាកូនអ្នកមាន ហើយជាអ្នកស្គាល់គ្នាទៀតផង។ ព្រោះតែហេតុនេះ បានរុញច្រានឱ្យទំនាក់ទំនងរបស់យើងទាំងពីរមានភាពរង្គោះរង្គើមិនឈប់មិនឈរ ព្រោះការប្រឹងប្រែងរបស់យើងត្រូវបានរារាំងដោយគ្រួសារខាងស្រី ហើយយើងតែងឈ្លោះគ្នាជាញឹកញាប់នៅពេលដែលនិយាយដល់រឿងរៀបចំអនាគតជាមួយគ្នា ព្រោះនាងបានត្រឹមតែឆ្លើយថាអត់ដឹង ហើយនាងនឹងធ្វើតាមបំណងម៉ាក់របស់នាង ទោះបីជានាងស្រលាញ់ខ្ញុំយ៉ាងណាក៏ដោយ ហើយខ្ញុំក៏មិនសប្បាយចិត្តដែរដែលជាមូលហេតុធ្វើឱ្យគ្រួសារគេឈ្លោះគ្នាដោយសារខ្ញុំ ។

ក្រោយពេលមានរឿងនេះកើតឡើង ខ្ញុំតែងតែគិតថាតើខ្ញុំត្រូវតស៊ូដើម្បីអ្វី បើក្តីសង្ឃឹមរបស់ខ្ញុំស្ទើរតែមិនមានផង ព្រោះភាគីខាងស្រីមិនមានឆន្ទៈ បន្តដំណើរជាមួយខ្ញុំផង។ អ្វីដែលនាងអាចឆ្លើយគឺ ពាក្យថាអត់ដឹងពាក្យមួយម៉ាត់នេះ គឺធ្វើឱ្យខ្ញុំអន់ចិត្តយ៉ាងខ្លាំង ព្រោះអនាគតខ្លួនឯង ហេតុអ្វីខ្លួនឯងមិនអាចកំណត់ មិនដឹងថាត្រូវដើរយ៉ាងម៉េចនោះ?

នៅពេលដែលខ្ញុំកាន់តែសួរ គឺសំឡេងឈ្លោះគ្នាកាន់តែខ្លាំងទៅ ព្រោះខ្ញុំមិនចង់បានអនាគតមួយដែលមិនច្បាស់លាស់ឡើយ ខ្ញុំចង់ឱ្យនាងមានជំហរមួយខ្លួនឯង ទើបខ្ញុំតែងដាស់តឿននាងជារឿយៗ។ ការព្យាយាមដាស់តឿនរបស់ខ្ញុំ គឺកាន់តែធ្វើឱ្យនាងមានសំពាធទាំងផ្លូវកាយនិងផ្លូវចិត្ត រហូតពេលខ្លះនាងយំស្ទើររាល់ថ្ងៃ (បងស្រីចុងភៅប្រាប់ខ្ញុំ) មិនសូវញ៉ាំបាយហើយតែងឈ្លោះជាមួយម៉ាក់របស់គេ។ ឮបែបនេះទើបខ្ញុំដឹងថា ហេតុអ្វីខ្ញុំអាត្មានិយមបែបនេះ? ធ្វើឱ្យមនុស្សដែលខ្លួនស្រលាញ់ឈឺចាប់ មិនស្រាកស្រាន្ត មិនដែលយល់ពីគេ តែខ្ញុំគិតថាបើអ្នកជាខ្ញុំពេលនោះក៏គិតដូចខ្ញុំអីចឹងដែរ។

ដោយសារតែការរារាំងមិនព្រមបន្ធូរបន្ថយដល់ពួកយើង ខ្ញុំក៏សម្រេចចិត្តធ្វើទង្វើអាក្រក់មួយដើម្បីឱ្យនាងចាប់ផ្តើមស្អប់ខ្ញុំ ហើយបំភ្លេចខ្ញុំឱ្យបានដើម្បីកុំឱ្យគ្រួសារនាងមានបញ្ហាដោយសារខ្ញុំ។ ខ្ញុំបានទៅទាក់ទងនឹងនារីម្នាក់ផ្សេងទៀត ក្នុងគោលបំណងឱ្យនាងយល់ច្រឡំ និងអស់ចិត្តពីខ្ញុំ តែនាងមិនដឹងដោយឃើញផ្ទាល់ទេ គឺនាងឃើញរូបភាពរបស់ខ្ញុំនិងនារីម្នាក់នោះក្នុង Messengerព្រោះខ្ញុំធ្លាប់ឱ្យលេខសំងាត់ទៅនាង ទើបនាងអាចមើលឃើញរាល់ការផ្ញើសាររបស់ខ្ញុំ តែការពិតរូបទាំងនោះជារូបដែលខ្ញុំផ្ញើឌឺ ឱ្យមិត្តភ័ក្ដិខ្ញុំមើលលេងប៉ុណ្ណោះ តែនាងបែរជាគិតថារូបទាំងនោះគឺខ្ញុំក្បត់នាង ។

ក្រោយបកស្រាយប្រាប់ហើយ នាងនៅតែមិនស្ដាប់ ខ្ញុំក៏ចាក់បណ្ដោយតែម្ដងទៅ ថាខ្ញុំមានទំនាក់ទំនងជាមួយនារីម្នាក់នោះ ព្រោះខ្ញុំក៏កំពុងតែចង់ឱ្យ នាងកាត់ចិត្ត ហើយព្រមតាមគ្រួសាររបស់គេរៀបការនឹងមនុស្សដែលម៉ាក់គេពេញចិត្ត ដែលមិនមែនជាខ្ញុំ។ ក្រោយពេលទង្វើរបស់ខ្ញុំបានធ្វើឱ្យនាងស្អប់ខ្ញុំដោយជោគជ័យ វាបែរជាធ្វើឱ្យខ្ញុំមានវិប្បដិសារី និងខូចចិត្តជាខ្លាំង។

ចាប់តាំងពីថ្ងៃដែលពួកយើងបែកគ្នាមកថ្ងៃទី១ ខែកញ្ញាឆ្នាំ២០១៥ ខ្ញុំតែងតែនឹកគេមិនលោះពេល ព្រោះគ្រប់រូបភាព រូបថតនិងអ្វីៗគ្រប់យ៉ាងហាក់ដូចជានៅថ្មីៗសម្រាប់ខ្ញុំនៅឡើយ។ មិនតែប៉ុណ្ណោះខ្ញុំបានបង្កើតគណនេយ្យ Facebook ក្លែងក្លាយ ដើម្បីដឹងពីសុខទុក្ខរបស់នាង ថែមទាំងបាន ផ្ញើសារទៅនាងជារឿយៗទាំងដឹងថានាងនឹងមិនឆ្លើយតប។ ក្រោយពេលបែកគ្នារយៈពេលប្រមាណ១ឆ្នាំ មកនេះខ្ញុំព្យាយាមរកមនុស្សស្រីម្នាក់ដើម្បីស្រលាញ់ និង ដើម្បីបំភ្លេចអតីតកាលចោលតែ ខ្ញុំមិនអាចធ្វើបានឡើយ ព្រោះចិត្តខ្ញុំនៅតែដិតដាមរូបនាងនិងនៅតែស្រលាញ់នាង ហើយមានពេលខ្លះខ្ញុំតែងតែឃើញនាងចូលមកក្នុងសុបិនរបស់ខ្ញុំ កាន់តែយល់សប្តិកាន់តែនឹកនាងខ្លាំងឡើង ហើយនៅតែចង់ឱ្យនាងត្រលប់មករកខ្ញុំវិញ។ ទោះបីពេលវេលានោះនៅយូរប៉ុនណាក៏ដោយ ឱ្យតែគ្រួសារនាងអនុញ្ញាតឱ្យយើងស្រលាញ់គ្នាវិញ ខ្ញុំនឹងនៅតែរក្សាចិត្តមួយនេះរង់ចាំនាង ដោយមិនព្រមទទួលយកអ្នកណាផ្សេងឡើយ ហើយក៏ចង់សូមឱ្យនាងអភ័យទោសនូវរាល់កំហុស ដែលខ្ញុំបានធ្វើមិនល្អទៅលើនាង។

ខ្ញុំមានសំនួរមួយដែលខ្ញុំចង់សួរទៅ។

សំនួរនោះគឺ តើនាងនៅស្រលាញ់ខ្ញុំទេ?

ជាចុងក្រោយខ្ញុំក៏មានពាក្យមួយឃ្លាចង់និយាយ ខ្ញុំនៅតែស្រលាញ់នាងគ្មានថ្ងៃផ្លាស់ប្ដូរ ហើយនឹងស្រលាញ់ជារៀងរហូត។ ខ្ញុំសរសេរអត្ថបទមួយនេះឡើង មិនសង្ឃឹមថានាងនឹងបានឃើញ ហើយអានវាទេ តែវាជាអ្វីដែលខ្ញុំបានសន្យានឹងនាងថា ខ្ញុំនឹងដាក់បញ្ចូលលអត្ថបទមួយនេះលើអ៊ីនធើណេត ហើយសង្ឃឹមថាថ្ងៃណាមួយនាងនឹងបានឃើញ!

អានអត្ថបទ៖ និស្ស័យពិតជាមានមែនឬ?

អត្ថបទ៖ ប្រិយមិត្តSabay

មានរឿងរ៉ាវចង់ចែករំលែកសូមផ្ញើទៅកាន់ e-mail: kong.chanvanneng@sabay.com

ឬទូរសព្ទទៅកាន់លេខ ០១០ ៧០០ ៧២៧

ចុចអានអត្ថបទ មនុស្សដែលខ្ញុំចងចាំ ទាំងអស់ដើម្បីដឹងពីរបៀបនៃការសរសេរផ្សេងៗគ្នា