ជៀស ស្រួច មានស្នាដៃអ្វីខ្លះក្នុងវិស័យប្រដាល់ និងសិល្បៈ?

2016-08-15 13:00:09
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតអ្នកប្រដាល់ និងតារាសម្តែងកំឡុងឆ្នាំ២០០២-២០០៣លោក ជៀស ស្រួច រំលឹកស្នាដៃ ដែលលោកធ្លាប់បានជោគជ័យ និងបន្សល់ទុកដូចជាឈ្នះពានរង្វាន់ជើងឯកទូទាំងប្រទេសក្នុងពិភពប្រដាល់ ថតកុន និងថតចម្រៀងខារ៉ាអូខេជាដើម។

អតីតអ្នកប្រដាល់រូបនេះបានឲ្យដឹងថា ចូលប្រលូកក្នុងវិស័យប្រដាល់នៅឆ្នាំ១៩៩៨ តែរហូតដល់ឆ្នាំ២០០០ ទើបលោកប្រកួតឈ្នះមេដាយមាសថ្នាក់ជាតិម្តងក្នុងប្រភេទទម្ងន់៦០គីឡូក្រាម។ អំឡុងឆ្នាំ២០០៤ លោកជាពិធីករកម្មវិធីប្រដាល់ម្នាក់នៅស្ថានីយទូរទស្សន៍ប៉ុស្តិ៍លេខ៥ ផងដែរ និងធ្លាប់បើកក្លឹបកីឡា ព្រមទាំងភោជនីយដ្ឋានផង។

បុរសមានខ្សែជីវិតរសាត់អណ្ដែតតាំងពី ឆ្នាំ២០០៤ដល់ឆ្នាំ២០១៦រូបនេះបន្តថា ក្រៅពីអាជីពប្រដាល់លោកក៏ជាតារាសម្ដែងកុន និងថតចម្រៀងខារ៉ាអូខេ។ បើតាមលោកចាំចូលសិល្បៈអំឡុងឆ្នាំ២០០៤ ហើយកាលនោះលោកថតកុនបានប្រហែល ៨រឿងមានដូចជា ជ្រោះស្នេហ៍ពេជ្រនិល អ្នកទោសដូងចិត្ត ស្នេហ៍ក្មេងវ័យក្មេង ភូមិតិរច្ឆាន ប្រពន្ធខ្មោច ចំប៉ា៤ទង បេះដូងអ្នកប្រដាល់ ក្របីលាក់កូន ចំណែកចម្រៀង និងថតខារ៉ាអូខេបានមួយបទគឺបេះដូងអ្នកប្រដាល់ ដែលច្រៀងដោយលោក ខេមរៈ សិរីមន្ត។

លោក ជៀស ស្រួច ឈប់ប្រដាល់និងចាកចេញពីសិល្បៈព្រមទាំងបាត់មុខឈឹងកំឡុងឆ្នាំ២០០៤។ រហូតមកដល់ពាក់កណ្ដាលខែកក្កដា ឆ្នាំ២០១៦នេះ ទើបលោកសម្រេចចិត្តបង្ហាញមុខនិងចូលថតកុន ព្រមទាំងធ្វើជាអាជ្ញាកណ្ដាល និងចៅក្រមកីឡាប្រដាល់វិញ៕

អត្ថបទ៖ នួន ស៊ីណា