ល្ងាចនេះ ណាហ្គាវើល ប៉ះ Three Star វគ្គជម្រុះ AFC Cup 2017 នៅម៉ុងហ្គោលី

2016-08-23 13:02:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ណាហ្គាវើល នឹងធ្វើការប្រកួតបើកឆាកក្នុងយុទ្ធនាការជម្រុះ AFC Cup 2017 ក្នុងពូល B ប៉ះក្រុមខ្លាំងរបស់ប្រទេសនេប៉ាល់ Three Star Club នៅទឹកដីប្រទេសម៉ុងហ្គោលីនាវេលាម៉ោង៤:០០ (ម៉ោងនៅកម្ពុជា)។ តើណាហ្គាវើលអាចយកបាន ៣ពិន្ទុពី Three Star Clup បានអត់?

ក្លឹប Three Star Clup ទើបតែយកឈ្នះក្រុមរបស់ម្ចាស់ផ្ទះ Erchim ២-០ កាលពី២ថ្ងៃមុន ដើម្បីឈរកំពូលតារាងពូល B បណ្ដោះអាសន្ន។ ប៉ុន្តែល្ងាចនេះពួកគេនឹងត្រូវជួបក្រុមរបស់កម្ពុជា ណាហ្គាវើល ដែលទើបប្រកួតដំបូង។ បើឈ្នះការប្រកួតល្ងាចនេះ មានន័យថា ក្រុមរបស់នេប៉ាល់មួយនេះ នឹងបានឡើងទៅវគ្គជម្រុះជុំទី២បន្តទៀតប្រចាំពូល B។

លោក មាស ចាន់ណា គ្រូបង្គោលក្លឹបណាហ្គាវើលធ្លាប់បានឲ្យដឹងថា ដៃគូល្ងាចនេះ និងដៃគូបន្ទាប់ក្នុងការប្រកួតវគ្គជម្រុះតាមពូលBនៃពានរង្វាន់ខាងលើ មានកម្រិតមិនលើសណាហ្គាវើលប៉ុន្មានឡើយ។ ដូច្នេះការប្រកួតល្ងាចនេះក្រុមរបស់លោក មិនមានការព្រួយបារម្ភច្រើនទេ។

ណាហ្គាវើលទៅចូលរួមប្រកួតពានរង្វាន់ AFC Cup 2017 នេះ ជំនួសក្រុមភ្នំពេញក្រោន ដែលត្រូវបានសហព័ន្ធបាល់ទាត់អាស៊ីដកសិទ្ធិចូលរួម។ ប្រកួតចុងក្រោយរបស់ណាហ្គាវើលត្រូវប៉ះម្ចាស់ផ្ទះ Erchim នាថ្ងៃទី២៥ ខែសីហា ឆ្នាំ២០១៦ វេលាម៉ោង៤:០០ (ម៉ោងនៅកម្ពុជា)៕