ប្រាក់ មុន្នីឧត្ដម បញ្ជាក់កម្រិតលេងយល់ចិត្តគ្នាត្រៀមប៉ះហុងកុង

2016-08-30 15:52:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើប្រយុទ្ធរបស់ក្លឹបស្វាយរៀង ប្រាក់ មុន្នីឧត្ដម បញ្ជាក់ពីកម្រិតនៃការលេងរបស់ក្រុមជម្រើសជាតិកម្ពុជាមិនទាន់យល់ចិត្តគ្នាបាន ១០០%ឡើយ ក្នុងការប្រកួតមិត្តភាពអន្តរជាតិជាមួយ ក្រុមហុងកុងនាវេលាម៉ោង ៧:០០(ម៉ោងនៅកម្ពុជា)នាទីថ្ងៃទី១ ខែកញ្ញា ឆ្នាំ២០១៦ ខាងមុខនេះនៅទឹកដីហុងកុង។

តារាឆ្នើមក្នុងក្រុមជម្រើសជាតិកម្ពុជារូបនេះបានឲ្យដឹងថា ក្រុមរបស់ពួកគេអាចលេងយល់ចិត្តគ្នាបានប្រមាណ៨០% ក្នុងការហាត់សម និងប្រកួតមិត្តភាពក្នុងស្រុកកាលពីពេលថ្មីៗនេះ។ ចំពោះរបៀបលេងរបស់ហុងកុង វិញមិនបានដឹងអ្វីច្រើនទេ ប៉ុន្តែក៏បានតាមដានមើលតាមរយៈវីដេអូខ្លះៗដែរ។

ប្រាក់ មុន្នីឧត្តម ដែលចំណាយពេលជាង១០ ឆ្នាំលេងបាល់ទាត់បន្តថា បើមើលវីដេអូប្រកួតកន្លងមកខ្លះៗ ហុងកុងជាក្រុមខ្លាំងមួយ ដែលក្រុមកម្ពុជាត្រូវតែលេងឲ្យបានល្អបំផុតទើបអាចមានសង្ឃឹមយកឈ្នះបាន។ ជំនួបនៅលើទឹកដីហុងកុង (ក្រៅដី ) ពិតមែន ប៉ុន្តែពួកគេក៏ត្រូវការកម្លាំងចិត្តពីចម្ងាយទៅផងដែរ។

ក្រុមបាល់ទាត់ជម្រើសជាតិកម្ពុជា បានចាកចេញពីទឹកដីកំណើតកាលពីម៉ោង៧:៣០នាទីយប់មិញនេះ។ នៅពេលចេញដំណើរនោះដែរ ក៏មានអ្នកគាំទ្រជាច្រើនសុំកីឡាករ ដែលជានិមិត្តរូបរបស់ខ្លួនថតរូបផងដែរ៕