២ចំណុចសំខាន់ អ្នកកាសែតហុងកុងសួរលោកគ្រូ Lee និង សុខ សុវណ្ណ ល្ងាចមិញ

2016-09-01 16:11:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងសន្និសីទសារព័ត៌មានកាលពីល្ងាចមិញមុនពេលការប្រកួតរវាងម្ចាស់ផ្ទះហុងកុង និងកម្ពុជាចាប់ផ្តើមល្ងាចថ្ងៃនេះ អ្នកសារព័ត៌មានហុងកុងបានចោទសួរលើចំណុចសំខាន់២ចំពោះលោកគ្រូបង្វឹកកម្ពុជា Lee Tae Hoon និងប្រធានក្រុម សុខ សុវណ្ណ។

សំនួររបស់សារព័ត៌មានហុងកុងលើកឡើងថា តើលោកស្គាល់ Kim Pan Gon ជាគ្រូបង្វឹករបស់ក្រុមហុងកុងដល់កម្រិតណាដែរ? គ្រូបង្វឹកជម្រើសជាតិកម្ពុជាលោក Lee Tae Hoon បានឆ្លើយនឹងសំនួរនេះថា ៖«លោក Kim Pan Gon ជាអ្នកធ្លាប់លេងបាល់ជាមួយគ្នានៅលីគបាល់ទាត់កំពូលកូរ៉េនៅពេលពួកខ្ញុំជាកីឡាករដូចគ្នា ប៉ុន្តែលោក Kim មានអាយុច្រើនជាងខ្ញុំ២ឆ្នាំ។ យ៉ាងណាខ្ញុំគោរពស្រលាញ់គាត់ជានិច្ច។ មួយទៀត លោក Kim ជាគ្រូបង្វឹកហុងកុងបានចូលសញ្ជាតិហុងកុងហើយ ខ្ញុំសង្ឃឹមថា បានចូលសញ្ជាតិខ្មែរដែរ (សើច)»។

ចំណែក ខ្សែការពារសុខ សុវណ្ណ ក៏ត្រូវបានអ្នកសារព័ត៌មានហុងកុងចោទសួរដែរដោយលើកឡើងថា ហេតុអ្វីបានជាក្រុមកីឡាករកម្ពុជាក្មេងៗ? ខ្សែការពារមកពីក្លឹបបឹងកេងអង្គររូបនេះឆ្លើយថា ជាការពិតកីឡាកររបស់កម្ពុជាក្មេងៗជាងហុងកុង ហើយហុងកុងជាក្រុមខ្លាំង តែយ៉ាងណា ក្រុមកម្ពុជានឹងប្រឹងប្រែងលេងប្រកបដោយឆន្ទៈដើម្បីយកជ័យជម្នះជូនជាតិ។

សំនួរនេះដែរ លោកគ្រូ Lee បានឆ្លើយថា ទោះជាកីឡាករកម្ពុជាក្មេងៗក៏គ្មានបញ្ហាអ្វីទេ។ តាមពិតកីឡាករកម្ពុជាដែលមានអាយុច្រើនមិនសូវបានហ្វឹកហាត់ដិតដល់ទេពេលដែលពួកគេនៅក្មេង។ ដូច្នេះហើយទើបបានជាលើកនេះ លោកបានកោះហៅកីឡាករក្មេងចូលរួមច្រើន។

ចុងក្រោយលោកគ្រូបង្វឹកជនជាតិកូរ៉េថា ការប្រកួតនេះពិតជាសំខាន់ខ្លាំងណាស់សម្រាប់កម្ពុជាដែលកំពុងត្រៀមខ្លួនប្រកួតជម្រុះ Suzuki Cup 2016 នៅខែតុលាខាងមុខនេះដែលកម្ពុជាជាម្ចាស់ផ្ទះ។ ក្រុមរបស់លោកនឹងប្រែងប្រែងប្រកួតឲ្យបានល្អបំផុតសម្រាប់ការប្រកួតល្ងាចនេះ៕