អត់ពូកែ ក៏មានឱកាសបានអាហារូបករណ៍

2016-09-13 18:20:02
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតមួយចំនួនយល់ថា ការទទួលបានអាហារូបករណ៍ទៅសិក្សានៅបរទេស ទាល់តែឆ្លាតហើយពូកែទើបអាចទៅរួច។ ប៉ុន្តែវាមិនត្រឹមត្រូវតែទាំងអស់នោះឡើយ ដោយពេលខ្លះក៏អាស្រ័យទៅលើការតាំងចិត្តខ្ពស់របស់បុគ្គលខ្លួនឯងផងដែរ។

រឿងទទួលអាហារូបករណ៍នេះ រចនា និស្សិតថ្នាក់អនុបណ្ឌិតព័ត៌មានវិទ្យាផ្នែក Social Informatics នៅជប៉ុនឲ្យដឹងថា មិនមែនទាល់តែនិស្សិតពូកែទើបបានអាហារូបករណ៍នោះទេ តែពេលខ្លះការអត់ធ្មត់ ការតាំងចិត្ត កម្លាំងចិត្ត ការចេះរៀបចំខ្លួនបានត្រឹមត្រូវសម្រាប់ការប្រឡង ក៏អាចឲ្យបេក្ខជនជោគជ័យដូចគ្នា។

“មិនមែនទាល់តែឆ្លាត ទើបបានអាហារូបករណ៍ទេបង។ ដូចពាក្យមួយគេនិយាយថា ការតាំងចិត្តខ្ពស់ យកឈ្នះទេពកោសល្យ"។

រឿងសំខាន់ រចនា ថានិស្សិតខ្លួនឯងត្រូវចេះប្រែក្លាយសមត្ថភាពរបស់ខ្លួនឲ្យកាន់រីកចម្រើន។ លើសពីនេះ ត្រូវប្រឹងប្រែងនិងមានការបំផុសទឹកចិត្តឲ្យខ្លាំងក្លាហើយត្រៀមខ្លួននិងឯកសារឲ្យបានសព្វគ្រប់ ដើម្បីដាក់អាហារូបករណ៍ទាន់ពេលវេលា មិនមែនគ្រាន់តែដាក់ពាក្យនិងប្រឡងចោលនោះទេ។ ការតាំងចិត្តនិងកម្លាំងចិត្តខ្លាំងក្លា នឹងជួយបេក្ខជនជោគជ័យលើអាហារូបករណ៍។

រចនាខ្លួនឯងសារភាពថា ក៏ធ្លាប់បរាជ័យរឿងប្រឡងអាហារូបករណ៍ដែរ តែដោយចិត្តស្រឡាញ់ជំនាញ IT នេះ ហើយមានការគាំទ្រពីគ្រួសារនិងទទួលបានដំបូន្មានល្អៗពីរៀមច្បងទៀតនោះ យុវតីរូបនេះក៏សម្រេចបានអាហារូបករណ៍ទៅសិក្សាថ្នាក់អនុបណ្ឌិតផ្នែក Social Informatics នៅជប៉ុនទាល់តែបាន។

មួយវិញទៀត យុវតីរៀន IT ខាងលើបញ្ជាក់ថា កុំខ្លាចនិងមិនត្រូវបោះបង់ដាច់ខាត ទោះបីប្រឡងធ្លាក់ក៏ដោយ។ កាលណាប្រឹងអស់លទ្ធភាព ការប្រឡងធ្លាក់ជាបទពិសោធន៍ល្អ ដែលបេក្ខជនអាចរៀនសូត្រពីចំណុចខ្វះខាតរបស់ខ្លួន៕

អាន៖ ង៉ែត រចនា៖ “ខ្ញុំចង់ឈ្នះ ពាក្យគេថា ស្រីៗរៀន IT មិនកើត”

អាន៖ អ្នកវិទ្យាសាស្ត្រស្ត្រីវ័យក្មេង ទេស ពុទ្ធីរ៉ា ប្រាប់គន្លឹះរៀន IT ឱ្យពូកែ

អត្ថបទ៖ ប៉ែត ផាន់និត