មិនមែនចៃដន្យដែល ង៉ូវ ជីហ័រ បាននិទ្ទេស A តែជាការគ្រោងទុក

2016-09-14 16:41:24
ចំនួនមតិ 0 | ចំនួនចែករំលែក 0

ចន្លោះមិនឃើញ

វិទ្យាល័យហ៊ុនសែនល្វា ស មានយុវជនម្នាក់គត់ទទួលបាននិទ្ទេស A។ យុវជន ង៉ូវ ជីហ័រ បានប្រាប់ថា និទ្ទេស A នេះមិនមែនជារឿងចៃដន្យនោះទេគឺជាការគ្រោងទុក ព្រោះគេប្ដេជ្ញាក្នុងចិត្តថាដាច់ខាតត្រូវយកនិទ្ទេស A ឲ្យបាន ។

ដោយសារតែមានមហិច្ឆតាខ្ពស់បែបនេះ អ្នកកើតក្នុងខេត្តកណ្ដាលប្រាប់ថា គេបានកំណត់គោលដៅខ្លួនឯង ដូច្នេះហើយជីហ័រក៏រៀបផែនការរៀនសូត្រសម្រាប់ខ្លួនឯងច្បាស់លាស់។

ជាទូទៅ ក្រោយបាយល្ងាចរួច ជីហ័រតែងទៅរំលឹកមេរៀន ធ្វើលំហាត់រហូតដល់ម៉ោង១០ទើបចូលគេង។ "ខ្ញុំចូលចិត្តរៀនពេលយប់ជាងពេលទាបភ្លឺ ព្រោះបើក្រោកពេលទាបភ្លឺគេងមិនគ្រប់គ្រាន់ធ្វើឲ្យឈឺ ដូច្នេះផែនការយើងក៏មិនជោគជ័យដែរ"។ យុវសិស្សអាយុ១៨ឆ្នាំ បញ្ជាក់។

ប្រការសំខាន់មួយទៀត យុវជនបានលំដាប់ពិន្ទុ 99.582 បន្តថា ដោយសារមើលឃើញអ្នកជំនាន់មុនៗពូកែ ម្ល៉ោះហើយខ្លួនចង់ពូកែដូចគេដែរ ទើបដាក់ផែនការត្រូវតែយកនិទ្ទេស A ឲ្យបាន ដែលពេលនេះបានសម្រេចដូចក្តីប្រាថ្នាហើយ។

ជយលាភីនេះ ជីហ័ ថា នឹងទទួលបានម៉ូតូ Zoomer X ពីឯកឧត្ដម ម៉ៅ ភីរុណ អភិបាលខេត្តកណ្ដាលដែលបានសន្យាថានឹងជូនដល់សិស្សនិទ្ទេស A ក្នុងខេត្តកណ្ដាល។ ចំណែកថ្ងៃអនាគត កូនច្បងក្នុងគ្រួសាររូបនេះចង់ក្លាយជាវេជ្ជបណ្ឌិត និងចង់រៀនក្នុងប្រទេសសឹង្ហបុរី៕

អត្ថបទ៖ លឹម សុនា