ហាប់គីដូកម្ពុជា ធ្វើមហាសន្និបាតចាប់ផ្ដើមអាណត្តិថ្មីតែងតាំងថ្នាក់ដឹកនាំថ្មី៨រូប
- 2016-10-05 23:35:03
- ចំនួនមតិ 0 | ចំនួនចែករំលែក 0
ហាប់គីដូកម្ពុជា ធ្វើមហាសន្និបាតចាប់ផ្ដើមអាណត្តិថ្មីតែងតាំងថ្នាក់ដឹកនាំថ្មី៨រូប
ចន្លោះមិនឃើញ
សហព័ន្ធកីឡាហាប់កីដូកម្ពុជាបានធ្វើមហាសន្និបាតកាលពីព្រឹកថ្ងៃទី៥ ខែតុលា ឆ្នាំ២០១៦ នៅទីស្ដីការគណៈកម្មាធិការជាតិអូឡាំពិកកម្ពុជា និងបានតែងតាំងសមាជិកថ្នាក់ដឹកនាំថ្មីចំនួន៨រូបក្នុងអាណត្តិទី៦គិតចាប់ពីឆ្នាំ២០១៦-២០២០។
អាណត្តិទី៥បានចាប់ផ្ដើមកាលពីឆ្នាំ២០១១ និងផុតវេលាកំណត់ត្រឹមឆ្នាំ២០១៥។ មកដល់ពេលវេលាខាងលើសហព័ន្ធមួយនេះបានធ្វើការបង្ហាញពីសមាសភាពរបស់សមាជិកប្រតិបត្តិថ្មី ដើម្បីពង្រឹងវិស័យកីឡារបស់ខ្លួនឲ្យកាន់តែល្អប្រសើរឡើង។
ឯកឧត្ដម វ៉ាត់ ចំរើន អគ្គលេខាធិការ NOCC បានចូលរួមធ្វើជាសាក្សីក្នុងការផ្លាស់ប្ដូរមុខតំណែងសមាជិកថ្មី របស់សហព័ន្ធកីឡាហាប់គីដូខាងលើ។ សម្រាប់សមាជិកថ្មីទាំង៨រូបរួមមានលោក ម៉ក់ សំអុល ជាប្រធាន, លោក ជា ប៊ុនហេង ហុង ស៊ុនហេង និងលោក សៅ សេងហាក់ ជាអនុប្រធាន, លោក គង់ ចាន់ធីណា ជាអគ្គលេខាធិការ, លោក ស៊ុយ វឌ្ឍី និងលោក ហៅ គឹមឡុង ធ្វើជាអគ្គហិរញឹក និងអគ្គហិរញឹករង រួមទាំងលោក ពុំ ណាង និងលោក ឡាច ស្រីវីរិន្ទ ជាសមាជិក ។
ចំណែកសមាជិកប្រតិបត្តិចាស់ ដែលបានលាឈប់ពីសហព័ន្ធរួមមានលោក សេង ប៊ុនសុង ជាប្រធាន, លោក គឹម ច័ន្ធមន្នី និងលោក អេង ហ៊ី ធ្វើជាអនុប្រធាន, លោក ទេព ភក្ដី អគ្គលេខាធិការរង, លោក សូ សំណាង និងលោក ជុប មេត្ដា ជាអគ្គហិរញឹក និងអគ្គហិរញឹករង រួមទាំងលោក កន ពេញសុង និងលោក ថោង សុគុណ្ណា ធ្វើជាសមាជិក ។
ជាមួយគ្នានោះលោក សេង ប៊ុនសុង អតីតប្រធានសហព័ន្ធចាស់ បញ្ជាក់ពីការលាឈប់ពីតួនាទីនេះថា ដោយសារលោកមានភារកិច្ចច្រើនមិនអាចបំពេញការងារដិតដល់។ ប៉ុន្ដែលោកមិនបានបោះបង់ការរួមចំណែកជួយកីឡានេះឲ្យមានសកម្មភាពបន្ដក្នុងប្រទេសកម្ពុជានោះទេ៕
អត្ថបទ៖ ស្រី សុវណ្ណដារ៉ា