ទេពឥន្ទ្រីសេនាក្លាហាន (ភាគទី៦៥)
- 2016-10-22 13:30:32
- ចំនួនមតិ 0 | ចំនួនចែករំលែក 0
ទេពឥន្ទ្រីសេនាក្លាហាន (ភាគទី៦៥)
ចន្លោះមិនឃើញ
ភាគទី៦៥
គ្រោះជាដែរ ព្រោះហួងយុងដែលវៃឆ្លាតនោះ បែរជាយល់ប្លែកទៅវិញ នាងយល់ថា គូសង្សារដែលនៅក្មេងខ្ចីរមែងតែងតែអរិចិត្ត ទាស់គំនិតគ្នាមួយដងមួយយាម ហើយនឹងរឹតតែស្រឡាញ់គ្នាលើសដើមទៅទៀត។ នាងកេះកួកឆេងខ្សឹបថា៖ «យើងចេញទៅក្រៅសិន ចាំគេបាត់ខឹងនឹងគ្នាសឹមត្រឡប់មកវិញ។» កួកឆេងសើចញញឹម ដើរទៅតាមហួងយុង។ តែអង្គុយបានមួយស្របក់ ហួងយុងក៏ជជីកសួរកួកឆេងថា៖ «បងជ្រាបថាពីរនាក់នោះកំពុងនិយាយអ្វីដែរ?» «គេនិទានរឿងស្នេហាប្រាប់គ្នាណា៎។»
ហួងយុងសួរបញ្ជាក់ថា៖ «ចុះហេតុអ្វីគេបានជួបគ្នា បែរជាគេមានអាកប្បកិរិយាប្លែកពីធម្មតាទៅវិញ? គេអៀនខ្មាសទេឬ? ឥឡូវយើងទៅលបស្ដាប់មើលគេនិយាយពីរឿងអីណា៎?» កួកឆេងគ្រវីក្បាល ពោលថា៖ «ទេ! ទេ! ស្ដាប់រឿងសម្ងាត់របស់គេធ្វើអី! បងមិនចូលចិត្តចង់ដឹងពេកនោះឡើយ។» ហួងយុងធ្វើក្បាលក្ងក់ទៅម្ខាង ពោលថា៖ «បើបងមិនព្រមទៅក៏បានដែរ តែហាមមិនឱ្យជជីកសួរខ្ញុំទេណា៎ ខ្ញុំត្រូវការទៅរៀនរបៀបស្នេហាពីគេលមើល!» នាងពោលរួចក៏ហក់ផ្លោងទៅលើដំបូលគុហា ផ្ទៀងត្រចៀកស្ដាប់ចំពេលដែលមូនានឆឺខមដាក់យាងខាងបន្លឺវាចាថា៖ «ហ៊ឹះ! បងឯងទទួលពួកឈ្លានពានជិនកួកជាឪពុកនោះ គឺជាកំហុសធំមួយទៅហើយ ថែមទាំងប្រាថ្នាដឹកនាំសត្រូវមកជិះជាន់ប្រទេសសុងជាមាតុភូមិរបស់ខ្ញុំទៀត អំណើះតទៅ យើងទាំងពីរលែងមានការទាក់ទងអ្វីខាងមនោសញ្ចេតនាទៀតហើយ គឺថា…»
មូនានឆឺអួលអាក់ពោលលែងចេញទៀត នាងដកដង្ហើមធំយំសស្រាក់… ហួងយុងក្រឡេកតាមប្រហោងឥដ្ឋបែក ឃើញយាងខាងសើចបណ្ដើរនិយាយបណ្ដើរ លូកដៃរាវបណ្ដើរ… នាងទើសភ្នែកនឹងកាយវិការដ៏ឥតដំបូន្មាននេះណាស់។ ស្រាប់តែមូនានឆឺគំហកខ្លាំងៗ ថា៖ «ហ៊ឹះ! ឯងហៅអ្នកណាថាអូន! នរណាជាអូនរបស់អាមនុស្សអពមង្គលនេះ?» ផូង! គឺមូលនានឆឺបានទះចំមុខយាងខាងមួយដៃយ៉ាងធ្ងន់។ ហួងយុងខ្លាចអ្នកទាំងពីរប្រវាយប្រតប់គ្នាក៏លោតចុះម្នីម្នា ច្រានទ្វារចូលទៅឃាត់ថា៖ «ទេវតាអើយ! វាយគ្នាមែនឬ? ណ្ហើយខ្ញុំសុំឃាត់បងទាំងពីរម្ដងចុះ!» ហួងយុងប្រុងនឹងអង្វរករតទៅទៀត ស្រាប់តែយាងខាងច្រឡោតឡើងថា៖ «អឺ! អញស្គាល់ចិត្តថ្លើមឯងហើយ ឯងបានកៀកកើយជាមួយអាចង្រៃនោះ ទើបឯងលែងនឹកនាដល់អញ ថែមទាំងហ៊ានទះអញមួយដៃផង។»
ចុច Like Page ប្រលោមលោក Sabay ដើម្បីទទួលបានរឿងថ្មីៗ