ប្រជាជននៅតែបារម្ភរឿងជាន់គ្នានៅកោះពេជ្រមិនទាន់បាត់

2014-11-04 23:40:36
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅមុនមួយថ្ងៃ នៃពិធីបុណ្យអុំទូកមកដល់ ប្រជាជនមួយចំនួនសម្ដែងការភ័យខ្លាចពីហេតុការណ៍ជាន់គ្នានៅស្ពានពេជ្រ កាលពីថ្ងៃទី ២២ វិច្ឆិកា ២០១០ នៅឡើយ។

លោក ប៊ុន ឡេង អតីតនិស្សិតវិទ្យាស្ថានបច្ចេកវិទ្យាកម្ពុជា បាននិយាយថា លោកនូវតែចងចាំមហាសោកនាដកម្មដ៏អាក្រក់មួយនេះជានិច្ច ហើយលោកនៅតែខ្លាចនិងមិនចង់ដើរលេងនៅកោះពេជ្រពេលអុំទូកហ្នឹងទេ ព្រោះគិតថា មិនមានសុវត្ថិភាព។

មិនខុសគ្នាប៉ុន្មាន លោក ពេជ្រ បុគ្គលិកនៅក្រុមហ៊ុន Beeline ប្រាប់ថា ដោយសារតែខ្លាចជួបរឿងមិនល្អ ដូច្នេះឆ្នាំនេះមិនដើរទៅណាទេគឺនៅផ្ទះ។ លោកបន្តថា៖ "រឿងហេតុការណ៍នៅកោះពេជ្រកាលពីប៉ុន្មានឆ្នាំមុន នៅតែដក់ជាប់ និង ចងចាំអត់មានភ្លេចសោះ ព្រោះមានមនុស្សស្លាប់ច្រើន។ ខ្ញុំគិតថា អុំទូកខានបីឆ្នាំហើយ ដូច្នេះឆ្នាំនេះប្រហែលមានមនុស្សមកច្រើន ដល់អញ្ចឹងចេះតែបារម្ភមិនចង់ដើរទៅណាឡើយ"។

ចំណែក លោក វិសាល បុគ្គលិកនៅក្រុមហ៊ុនឯកជនមួយក្នុងរាជធានីភ្នំពេញ រៀបរាប់ថា អុំទូកឆ្នាំនេះ លោកទៅលេងស្រុក មិនបាននៅលេងភ្នំពេញឡើយ មិនមែនភ័យខ្លាចរឿងជាន់គ្នាហ្នឹងទេ តែទោះយ៉ាងណាលោកនៅតែនឹកឃើញហេតុការណ៍នេះមិនភ្លេចដែរ ។ ព្រឹត្តិការណ៍នេះ រំលងទៅ ៣ -៤ ឆ្នាំ ដូច្នេះប្រជាជនគួររំសាយចិត្តខ្លះហើយ បើនៅតែខ្លាចនិងទុទិដ្ឋិនិយម បុណ្យទាននៅស្រុកខ្មែរប្រាកដជាគ្មានមនុស្សដើរលេងឡើយ។

"បើមិនចង់មានរឿងទៀត មិនគួរនាំគ្នាដើរលេងពេលល្ងាចទេ ពិសេសចាប់ពីម៉ោង ៦ ល្ងាចឡើងទៅ ព្រោះម៉ោងនេះមានមនុស្សច្រើនប្រជ្រៀតគ្នាដើរលេង និងទិញអីវ៉ាន់ព្រមទាំង មើលតារាល្បីៗច្រៀង។ យកល្អគួរដើរលេងពេលព្រឹកព្រោះត្រជាក់ស្រួលខ្យល់អាកាសល្អ និងមានសុវត្ថិភាពជាង"។

សុមអាន៖ ទីតាំង១២កន្លែងត្រូវដឹងបើដួលសន្លប់ឬគ្រេាះថ្នាក់ពេលដើរលេងអុំទូកស្អែកនេះ

សម្រាប់អតីតនិស្សិតជំនាញ សង្គមវិទ្យា នៃសាកលវិទ្យាល័យភូមិន្ទភ្នំពេញ លោក នូ រដ្ឋា បញ្ចេញទស្សនៈថា លោកនូវតែមានការបារម្ភ ព្រោះរដ្ឋាភិបាលក៏ដូចជាសមត្ថកិច្ចហាក់ខ្វះចន្លោះក្នុងការគ្រប់គ្រងស្ថានភាពហើយពុំដែលមានការទទួលខុសត្រូវចំពោះហេតុការណ៍ទាំងអស់នោះទេ។

ឧបទ្ទវហេតុនៅបរិវេណស្ពានពេជ្រ នៃតំបន់កោះពេជ្រដែលជនរងគ្រោះស្លាប់ គឺបណ្ដាលមកពីការរត់ជាន់ និង ដេកដួលលើគ្នា ព្រមទាំងកង្វះខ្យល់អុកស៊ីហ្សែន នាយប់ថ្ងៃទី ២២ ខែវិច្ឆិកា ដែលយ៉ាងហោចណាស់មានមនុស្សប្រុសស្រី ក្មេងចាស់ ប្រមាណ ៣៤៩ នាក់ស្លាប់ និង ជាង៧០០នាក់ទៀតបានរងរបួស។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញធ្លាប់បានប្រាប់ Sabay ថា ដើម្បីការពារសន្តិសុខ សណ្តាប់ធ្នាប់សាលារាជធានីភ្នំពេញ នឹងដាក់ពង្រាយសមត្ថកិច្ចចម្រុះជិត១ម៉ឺននាក់ នៅតាមគោលដៅផេ្សងៗគ្នា រួមទៅនឹងផែនការច្បាស់លាស់មួយ ដោយផ្អែកលើបទពិសោធន៍ ដែលធ្លាប់ឆ្លងកាត់នាពេលកន្លងមក។

លោក ឡុង ឌីម៉ង់ បន្ថែម៖ “បុណ្យអុំទូកបីថ្ងៃនេះ នឹងមានប្រជាពលរដ្ឋមិនក្រោម២លាននាក់ទេ សម្រុកមករាជធានីភ្នំពេញ។ ដូច្នេះ យើងបានរៀបចំផែនការច្បាស់លាស់រួចហើយ ដើម្បីការពារសន្តិសុខសណ្តាប់ធ្នាប់”។

ក្រោយឧបទ្ទវហេតុប៉ុន្មានម៉ោងតាមកញ្ចក់ទូរទស្សន៍ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញសេចក្ដីថ្លែងការជាបន្តបន្ទាប់នៅវេលារំលងអធ្រាត្រ និង វេលាទៀបភ្លឺស្ដីពីឧបទ្ទវហេតុនេះ និង បានប្រកាសយកថ្ងៃទី ២៥ ខែវិច្ឆិកា ឆ្នាំ២០១០ ជាថ្ងៃកាន់មហាទុក្ខទូទាំងប្រទេស ដោយគ្រប់ស្ថាប័នរដ្ឋ គ្រឹះស្ថានសាធារណៈ និង គ្រឹះស្ថានឯកជនត្រូវបង្ហូតទង់ជាតិត្រឹមពាក់កណ្ដាលដង ជានិមិត្ដសញ្ញានៃការកាន់ទុក្ខដ៏ក្រៀមក្រំនេះ។ ជនរងគ្រោះដែលស្លាប់គឺបណ្ដាលមកពីការរត់ជាន់ និងដេកដួលលើគ្នា ព្រមទាំងកង្វះខ្យល់អុកស៊ីហ្សែន។

សូមអាន៖ ជិត១ម៉ឺននាក់ត្រៀមការពារសន្តិសុខបុណ្យអុំទូកឆ្នាំនេះ

អត្ថបទ៖ លឹម សុនា