សម្លម្ជូរពោះគោនៅផ្សារថ្នល់ទទឹងល្បីឆ្ងាញ់ អ្នកទិញបន្តគ្នាអត់ដាច់

2016-10-23 22:21:52
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្លម្ជូរពោះគោផ្សារថ្នល់ទទឹងល្បីថាឆ្ងាញ់គួរសម រហូតដល់អ្នកដំណើរឆ្លងកាត់នាំគ្នាឈប់ឡានទិញផ្ញើអ្នកផ្ទះជាហូរហែ។ ទីនេះមិនមែនជាភោជនីយដ្ឋាន ឬហាងអ្វីធំដុំទេ គ្រាន់តែជាតូបតូចប្រក់ស្លឹកជាប់គ្នាប្រមាណជា ២០កន្លែង អមសងខាងផ្លូវ រកស៊ីលក់បាយសម្លធម្មតាប៉ុណ្ណោះ។

គ្រប់តូប ដែលនៅជាប់គ្នានោះ លក់តែសម្លម្ជូរពោះគោដូចគ្នាទាំងអស់ ដែលជាមុខម្ហូបមួយដ៏ល្បីប្រចាំតំបន់។ អ្នកស្រី សន នឹម ជាម្ចាស់តូបលក់អាហារមួយកន្លែងនៅផ្សារថ្នល់ទទឹងប្រាប់ Sabayថា មួយថ្ងៃគាត់ទិញពោះគោអស់ ៥គីឡូក្រាម មកស្លម្ជូរលក់ដើម្បីបានប្រាក់ចំណេញខ្លះផ្គត់ផ្គង់ជីវភាពគ្រួសារ ហើយភាគច្រើនគឺលក់ដាច់អស់មិនដែលសល់ឡើយ។

ម្ចាស់តូបដដែលរៀបរាប់ថាសម្លម្ជូរឆ្ងាញ់សំខាន់គឺលើការផ្សំគ្រឿងអោយបានល្អរួមមានប្រហុក(យកប្រហុកឆ្ងាញ់លេខ១) ម្ជូរក្រសាំង រមៀត ស្លឹកគ្រៃ មើមខ្ទឹម ស្លឹកក្រូចបុកបញ្ចូលគ្នាអោយម៉ត់។រីឯរបៀបធ្វើវិញ គឺហាន់ពោះគោដាក់ក្នុងឆ្នាំងរួចចិញ្ច្រាំប្រហុកដាក់ពីលើ ហើយកូលាយគ្រឿងបញ្ចូលគ្នា បន្ទាប់មកថែមទឹកបន្តិចដាក់លើចង្ក្រាន រម្ងាស់អោយឆ្អិនរយៈពេល ២០នាទី។

ក្រោយមកទៀត យើងអាចថែមទឹកកុំអោយវាគោកពេក និងរម្ងាស់អោយពុះជាការស្រេច។ទោះបីយ៉ាងណា អ្នកលក់រូបនេះបញ្ជាក់ថាសម្លម្ជូរនេះឆ្ងាញ់មិនឆ្ងាញ់នៅលើប្រហុក រួមទាំងទឹកដៃប៉ិនប្រសប់នៃចុងភៅផងដែរ។

ក្នុងមួយថ្ងៃ អ្នកស្រី នីម អាចរកចំណូលបាន ៥ម៉ឺនរៀល ពីមុខរបរនេះ ប៉ុន្តែបើថ្ងៃណាលក់ដាច់ខ្លាំងអាចបានជិត ១០ម៉ឺនរៀល។ ចំណែកអតិថិជនរបស់គាត់ភាគច្រើនអ្នកដំណើរ ជាពិសេសថ្ងៃចុងសប្ដាហ៍សំបូរភ្ញៀវឆ្លងកាត់ទីនេះ។ អ្នកចូលចិត្តសម្លម្ជូរខ្មែរ សូមអញ្ជើញមកភ្លក់រសជាតិ!