ក្រុមហ៊ុន Apple កំពុង​តែ​ធ្វើ​ការ​ស៊ើប​អង្កេត ពាក្យ​បណ្ដឹង​ដែល​ថា ទូរស័ព្ទ iPhone 7 ក្តៅ​ខ្លាំង​ពេក រហូត​ផ្ទុះ​ឆាប​ឆេះ និង​បាន​បំផ្លាញ​រថយន្ត​មួយ​គ្រឿង នៅ​ប្រទេស​អូស្ត្រាលី។

បើ​យោង​តាម​របាយការណ៍ នៅ​លើ​គេហទំព័រ Fortune បាន​ឲ្យ​ដឹង​ថា បុរស​ជន​ជាតិ​អូស្ត្រាលី​ម្នាក់ មាន​ឈ្មោះ​ថា Mat Jones បាន​ទុក​ទូរស័ព្ទ iPhone 7 របស់​ខ្លួន នៅ​ក្នុង​រថយន្ត​មួយ​គ្រឿង ខណៈ​ពេល​គាត់ ទៅ​រៀន​ជិះ​ក្ដារ​លើ​ទឹក។ នៅ​ពេល​ដែល Jones ត្រលប់​មក​វិញ គាត់​បាន​ឃើញ​រថយន្ត ពោរពេញ​ដោយ​ផ្សែង ហើយ​ឆាបឆេះ​ត្រង់​កន្លែង​ដែល​គាត់ ទុក​ទូរស័ព្ទ iPhone 7 ចោល។ ជា​មួយ​គ្នា​នេះ​ដែរ ខោ​របស់ Jones ដែល​បាន​ដាក់​គ្រប​ពី​លើ​ទូរស័ព្ទ​នោះ មុន​ពេល​គាត់​ចេញ​ទៅ ក៏​ត្រូវ​ភ្លើង​ឆេះ​ដែរ។

យ៉ាងណាមិញ អ្នក​នាំ​ពាក្យ​របស់​ក្រុមហ៊ុន Apple បាន​និយាយ​ថា ក្រុមហ៊ុន​កំពុង​តែ​ទំនាក់​ទំនង ជា​មួយ Jones ហើយ​ក៏​កំពុង​តែ​ធ្វើ​ការ​ស៊ើប​អង្កេត លើ​បញ្ហា​នេះ​ផង​ដែរ៕

ប្រែសម្រួល ៖ សេង ឡុង ប្រភព ៖ gadgetsnow