យុវជនវាយកូនបាល់១៣ប្រទេសមកប្រកួតពាន ទេព ឃុនណាអន្តរជាតិ នៅកម្ពុជា
- 2016-10-25 22:17:49
- ចំនួនមតិ 0 | ចំនួនចែករំលែក 0
យុវជនវាយកូនបាល់១៣ប្រទេសមកប្រកួតពាន ទេព ឃុនណាអន្តរជាតិ នៅកម្ពុជា
ចន្លោះមិនឃើញ
ពានរង្វាន់ Tep Khunna Memorial Cup I.T.F Junior 2016 បានចាប់ផ្តើមដំណើរការប្រកួតហើយដោយកីឡាករមកពី១៣ប្រទេសចូលរួមប្រកួតជាមួយម្ចាស់ផ្ទះកម្ពុជាចាប់ពីថ្ងៃទី២៣ ដល់២៩ តុលា ឆ្នាំ២០១៦នេះ។
តាមការឲ្យដឹងពីលោក ទេព រិទ្ធិវីទ្ធ អគ្គលេខាធិការសហព័ន្ធកីឡាវាយកូនបាល់កម្ពុជាបានមានប្រសាសន៍ នៅសន្និសីទសារព័ត៌មានថា ពាន Tep Khunnah Memorial Cup I.T.F Junior 2016 នេះជាលើកទី២១ដែលរៀបចំឡើងដើម្បីរំលឹកដល់លោកទេព ឃុនណា។
លក្ខណៈពិសេសសម្រាប់ព្រឹត្តិការណ៍អន្តរជាតិនេះគឺសម្រាប់កីឡាករ កីឡាការិនីស្វែងរកពិន្ទុសម្រាប់ចំណាត់ថ្នាក់ I.T.Fអន្តរជាតិ។ កីឡាករ កីឡាការិនីដែលជាយុវជនក្នុងកម្មវិធីនេះអាយុចាប់ពី១៤ដល់១៨ឆ្នាំដែលមានចំនួន៨៤នាក់ ក្នុងនោះមានកីឡាការិនី៣៧នាក់។ ប្រទេសដែលចូលរួមមានថៃ ហ្វីលីពីន ម៉ាឡេស៊ី សិង្ហបុរី តៃប៉ិ ចិន ហុងកុង ម៉ាកាវ ជប៉ុន កូរ៉េ អាមេរិក អូស្ត្រាលី ស៊ុយអែត និងកម្ពុជាម្ចាស់ផ្ទះ។
បន្ទាប់ពីព្រឹត្តិការណ៍ឆ្នាំ២០១៦នេះ កម្ពុជាគ្រោងរៀបចំព្រឹត្តិការណ៍ចំនួន៥នៅឆ្នាំ២០១៧ដែលជាចំណែកដ៏សំខាន់សម្រាប់កីឡាករ កីឡាការិនីវាយកូនបាល់កម្ពុជាដើម្បីពង្រឹងសមត្ថភាព។
សម្រាប់ម្ចាស់ផ្ទះកម្ពុជាមានកីឡាករ ទេព ទីម៉ូថេ, ឈាង វណ្ណាសិទ្ធ, ឃ្លាំង ពន្លក, សែន សុផុន, ឡេង សារិនរាជ្យ,សម ដេវីត និងកីឡាការិនី ហូ ស្រីណុច និងកីឡាការិនី ហួរ ស្រីពៅ៕
អត្ថបទ៖ ជាន ចាន់រ៉ា