ពាក្យខុសបច្ចេកទេសលែងមានទៀតហើយ ឥឡូវ អាជ្ញាធរបញ្ជាឲ្យដកកំណាត់ដែកអស់ហើយ

2014-11-05 16:36:12
ចំនួនមតិ 0 | ចំនួនចែករំលែក 0

ចន្លោះមិនឃើញ

កំណាត់ដែកស្រួចនៅលើសួនច្បារ ដែលធ្វើឲ្យភ្ញាក់ផ្អើលដល់សង្គម Facebook ដែលត្រូវបានគេឃើញបង្ហោះព្រោងព្រាត ដោយសារវាអាចធ្វើឲ្យមុតជើងអ្នកដំណើរនោះ ឥលូវនេះនៅល្ងាចមិញ និង ព្រឹកនេះ អាជ្ញាធរបានដើរដករួចអស់ហើយ។

កំណាត់ដែកទាំងនោះ គេដាក់ជាជន្ទល់ទ្រព្រះឆយាល័ក្ស ឬបដាថ្វាយព្រះពរនានា តែពេលក្រោយចប់ពិធី ក្រុមកម្មកររបស់អ្នកម៉ៅការរបស់គណៈកម្មការរៀបចំបុណ្យជាតិ មិនបានដកចេញពីក្នុងដី គេគ្រាន់តែកាត់តម្រឹមត្រឹមគល់រួចយកបដាទាំងនោះចេញដោយមិនបានដកបង្គោលទាំងនោះចេញពីក្នុងដីនោះទេ ដែលជាហេតុធ្វើឲ្យភ្ញាក់ផ្អើលជាខ្លាំងក្នុងសង្គមFacebook។

អ្នកប្រើប្រាស់បណ្ដាញសង្គម Facebook ម្នាក់បានបញ្ចេញមតិថា ចាំដល់មានការបាត់បង់ជីវិតមនុស្សដោយសារតែរឿងមិនយកចិត្តដាក់អាបន្តិចបន្តួចហ្នឹង ហើយមានលេះថាខុសបច្ចេកទេសមែនទេ!!! ។

ចំណែក ម្នាក់ទៀតបានបញ្ចេញមតិថា សំណាងហើយមានគេថតមក post នៅលើ Facebook កុំអីមានអ្នកគ្រោះថ្នាក់ទៀតហើយ ។ ហើយដូចរាល់ដង គ្មានអ្នកទទួលខុសត្រូវ? អ្នកណាអ្នកទទួលបន្ទុកមើលក្រុមកម្មករនោះ?

កំណាត់ដែកស្រួចនោះមាននៅសួនច្បារមុខវាំងខ្លះ នៅសួនវិមានឯករាជ្យខ្លះ សួនចោមចៅខ្លះ ហើយកន្លងមក កំណាត់ដែកនេះនៅមិនទាន់បានធ្វើឲ្យសាធារណជន មុតឬគ្រោះថ្នាក់ដូចនៅក្នុងព័ត៌មានសង្គម Facebookនោះទេ ម្យ៉ាងទៀតកំណាត់ដែកនេះស្ថិតនៅលើសួនច្បារក្នុងតំបន់ហាមឃាត់មិនឲ្យដើរ។ នេះបើតាមpageផ្លូវការសាលារាជធានីភ្នំពេញ បញ្ជាក់។

សាលារាជធានីភ្នំពេញ បានឆ្លើយតបវិញទៅប្រជាពលរដ្ឋ តាមរយៈ Page ផ្លូវការរបស់ខ្លួនថា ទោះជាយ៉ាងណា កំណាត់ដែកទាំងនោះត្រូវបានដកចេញរួចរាល់អស់ហើយ គ្មានទៀតទេ។

សាលារាជធានីភ្នំពេញនៅបានសរសេរតបវិញថា សូមអគុណសម្រាប់ការចូលរួមរបស់ប្រជាពលរដ្ឋ និងដើម្បីឱ្យការងារក្នុងព្រះរាជពិធីអុំទូកទទួលបានជោគជ័យ សង្ឃឹមថាបងប្អូនទាំងអស់មេត្តាចូលរួមផ្ដល់ និងរាយការណ៍នូវបញ្ហា ឬផលលំបាកនានា មកទំព័រហ្វេសបុករបស់យើង ឬអាជ្ញាធរដែលនៅជិតខ្លួន ដើម្បីដោះស្រាយឱ្យបានទាន់ពេលវេលា។